Read SEBR SÕNGO, 1998 2 Korẽnt‑rãmbã sebre 11 Bible Online

2 Korẽnt‑rãmbã sebre 11 - SEBR SÕNGO, 1998 bible

2 Korẽnt‑rãmbã sebre 11

¹Mam nongẽ‑la yãmb sã n da tõe n sakẽ mam yalemdã bilfu! La yãmb sakdame.

²Bala, mam maanda sũ-kiir yãmb yĩnga, la yaa sũ-kiir sẽn yit Wẽnnaam nengẽ, tɩ bõe mam sẽn dɩk yãmb n kõ sɩd a yembr tãa wã yĩnga. Tɩ mam tõe n tall yãmb n kẽng Kiris nengẽ wa pʋg-sad sẽn ka sãam ye.

³La baoosgo, a wa waafã sẽn maan sɩlem n zãmb a Awa wã, mam yɛɛsdame tɩ yãmb yam na n wa wẽnemd n lebg wẽng n kɩt tɩ y bas y sõmblmã ne y pʋ-peelmã y sẽn tar Kiris yĩngã ye.

⁴Bala, ned a to sã n yɩ pipi n wa moon yãmb Zeezi a to, tɩ ka Zeezi ningã tõnd sẽn da moon yãmbã, wall yãmb sã n deeg sɩɩg a to sẽn ka Sɩɩg ningã yãmb sẽn dag n deegã, wall koe-noog a to tɩ ka yãmb sẽn da reeg pĩndã, yãmb sakda yẽnda soab sõama.

⁵La mam yaool n tẽedame tɩ m ka yɩ poorẽ soab bũmb baa a fʋɩ pʋgẽ, ne tẽn-tʋmdb nins sẽn yet b mens tɩ b yaa tẽn-tʋmd-kãsemsã ye.

⁶Baa mam sã n ka gom minim-soaba, mam ka ned sẽn ka tar bãngr ye. La tõnd wilga bõn-kãng vẽeneg yãmb sʋk wakat fãa, bũmb fãa pʋga.

⁷Bɩ Mam sẽn moon yãmb Wẽnnaam koe-noogã zaalma, n sik m meng n zẽk yãmbã, m maana yel-wẽnde?

⁸Mam fãa Kiris tẽedbã sẽn be zĩis a taabã, mam sẽn sak tɩ bãmb yao maam tɩ m sõng yãmbã yĩnga. La mam sẽn da wa n be yãmb nengẽ n dat sõngrã, mam ka yɩ zɩɩb ned baa a ye yĩng ye.

⁹Bala, ba-biis nins sẽn yi Masedoan n wa wã kõo maam bũmb ning sẽn da paoog maamã. Bũmba fãa pʋgẽ, mam gũusa m menga, n da wa n yɩ zɩɩb yãmb yĩng ye, la mam na n kell n gũusa m menga ne bõn-kãngã.

¹⁰Ne Kiris sɩdã sẽn be mam sũurẽ wã, mam yetame tɩ ned ka tõe n gɩdg maam tɩ m ka pẽg m meng bõn-kãng wɛɛngẽ Akayi soolmã pʋgẽ ye.

¹¹Bõe yĩng tɩ m yet a woto? Yaa mam sẽn ka nong yãmb yĩng bɩ? Wẽnnaam menga miime tɩ mam nonga yãmba.

¹²Mam sẽn maand bũmb ninga, mam na n kell n maan-a lame yɛsa, tɩ gɩdg neb nins sẽn baood weer n dat n pẽg b mens n yeel tɩ bãmb sẽn tʋmdã ne tõnd sẽn tʋmdã yaa a yembrã.

¹³Nin-bãmbã rãmb yaa zãmb tẽn-tʋmdbã, la belgr tẽn-tʋmdbã, n toeemd b mens n yaa wa Kiris tẽn-tʋmdbã.

¹⁴La yõwã ka bõn-lingdg ye. Bala, Sʋtãanã meng toeemda a meng n lebg wa malɛɛk sẽn tar vẽenem.

¹⁵Dẽ wã, yẽnda tʋmtʋmdbã me sã n toeemd b mens n lebgd wa tɩrlem tʋmtʋmdba, ka bõn-yɛɛsdg ye. Bãmb baoosg na n yɩɩ wa b tʋʋmã sẽn yaa to-to wã.

¹⁶Mam leb n yetame: Bɩ ned da ges maam wa yalem ye, wall y sã n get maam wa yalmã, bɩ y sak n deeg maam wa yalmã, tɩ mam me tõe n pẽg m meng bilfu.

¹⁷Mam sẽn gomd bũmb ningã, ka Zu-soabã n yet tɩ m gom ye. La mam gomda ne pɛl-kɛgenga, wa m yaa yalma, n pẽg m meng bõn-kãng pʋgẽ.

¹⁸Neb wʋsg sẽn pẽgd b mens ne dũni yɛlã, mam me na n pẽga m menga.

¹⁹Yãmb sẽn yaa yam dãmb n yaool n sakd n deegd yalemb ne yamleoogo!

²⁰Sɩd me, yãmb sakdame tɩ b kẽesd yãmb yembdo, tɩ b rɩt yãmba, tɩ b fãad yãmba, tɩ b ka nand yãmba, la b pãbd yãmb pegse.

²¹Mam yetame tɩ yaa yãnde. Tõnd maana pãn-komsem n ka tõog n maan a woto ye. Baoosgo, ne bũmb ning fãa ned sẽn tar raood tɩ pẽg a menga, mam me tara raoodo, mam gomda wa yalma.

²²Bãmb yaa Ebre rãmba? Mam me yaa Ebre. Bãmb yaa Israyɛll buudu? Mam me yaa Israyɛll neda. B yaa a Abrahaam yagense? Mam me yaa a Abrahaam yagenga.

²³Bãmb yaa Kiris tʋmtʋmdba? Maam n leb n yɩɩda. Mam gomda wa m zugã ka be ye. Sã n yaa ne tʋʋmã, maam n yɩɩd-ba, ne bi-bees roog kõom, maam n yɩɩd-ba, ne pãbr deegre, maam n leb n yɩɩd-ba, la mam kolga kũum naoor wʋsgo.

²⁴Zʋɩf-rãmbã pãba maam ne kalwaase, a yembr n ka pis-naase, naoor a nu.

²⁵B pãba maam ne rasab naoor a tã, b loba maam kug vugri, koom-kogend sãama naoor a tã tɩ mam be b pʋse. Mam paa koom zug daar tõre la yʋng tõre.

²⁶Kʋɩls rag n na n dɩɩ maam wakat kẽere, m kẽna pʋse. Fãadb rag n na n fãa maam. Mam tẽngẽ neb baoo n na n sãama maam. Neb nins sẽn ka Zʋɩf buudã baoo n na n sãama maam, mam paama tood tẽms pʋsẽ, mam dag n na n kii wetẽ. Mam dag n na n kii ko-kãsengã zugu, zãmb ba-biis rag n na n kʋʋ maam.

²⁷Mam tʋma tʋʋm-kegemse, mam namsame. Wakat kẽere, mam ka gũs ye. Kom la ko-yũud yõka maam. Mam gãanda kom wakat kẽere. Wakat kẽere, waood yõka maam la fut paooga maam,

²⁸tɩ m ka gomd bũmb nins sẽn ketã ye. Mam tara zɩɩb daar fãa, Kiris tẽedbã fãa yɛl sẽn pak maamã yĩnga.

²⁹Ãndã pãng n boog tɩ mam dẽnd ka booge? Ãndã n lʋɩ yel-wẽnd pʋgẽ tɩ mam sũur ka sãame?

³⁰Pẽg-m-meng sã n noomẽ, mam na pẽg m pãng-komsem.

³¹Wẽnnaam sẽn yaa tõnd Zu-soab a Zeezi Ba wã, sẽn tar-a bark wakat sẽn kõn sa wã miime tɩ mam ka yagd zĩrẽ ye!

³²Mam sẽn wa n be Damaasã, rĩm a Areta Gʋvɛrneerã ra kɩtdame tɩ b gũud Damaas tẽngã noy n dat n yõk maam.

³³La b kẽesa maam peoogẽ n tũnug roog fẽnetr n sik maam lalgã poor tɩ mam põse, t'a ka paam maam ye.