Read SEBR SÕNGO, 1998 2 Korẽnt‑rãmbã sebre 4 Bible Online

2 Korẽnt‑rãmbã sebre 4 - SEBR SÕNGO, 1998 bible

2 Korẽnt‑rãmbã sebre 4

¹Wẽnnaam sẽn zoe tõnd nimbãaneg n kõ tõnd tʋʋm kãnga wã yĩng n kɩt tɩ tõnd ka boogd d raood ye.

²Tõnd kɩɩsda bũmb nins sẽn solg n yaa yãn-tʋʋmã, tõnd ka tʋmd ne sɩlem ye. La tõnd ka tekd Wẽnnaam goamã ye. Tõnd wilgda sɩdã vẽenega, n paamd kaset-sõng nebã fãa sũyã pʋs Wẽnnaam taoore.

³La tõnd sẽn moond koe-noog ningã wã sã n ket n solgame, a solga ne neb nins sẽn na n sãama.

⁴Yaa neb nins sẽn ka tẽed-bã. Dũni‑kãngã na-wẽngã sẽn yaa a sʋtãan sẽn lud b yamã tɩ b ka tõe n yãnd Kiris sẽn yaa Wẽnnaam mengã wẽnegã koe-noogã ziirã yĩnga.

⁵Ka tõnd mens koɛɛg la d moond ye, yaa a Zeezi Kiris koɛɛg la tõnd moonda. La a Zeezi maasem yĩnga, tõnd boonda d mens tɩ yãmb tʋmtʋmdba.

⁶Bala, Wẽnnaam sẽn yeel tɩ vẽenem na n yãga lik pʋgẽ wã, yaa Wẽnnaam n kɩt tɩ vẽenemã yãg tõnd sũyã pʋse, tɩ tõnd yãnd Wẽnnaam ziirã sẽn pɩnd Kiris nengã zugu.

⁷Tõnd zãada paoon-kãngã d yĩnsã sẽn yaa wa yagd laasã pʋse. Tɩ pãn-kãsen‑kãngã na yɩ Wẽnnaam dẽnda, la kõn yɩ tõnd dẽnd ye.

⁸Tõnd paamda namsg buud toor-toore, la b ka kʋʋd tõnd ye. Tõnd dag n ka mi d sẽn na n maaneg ye, la tõnd ka boogd raood ye.

⁹Neb namsda tõndo, la Wẽnnaam sõngda tõndo. B pãbda tõnd n lubdẽ, la d ka kiid ye.

¹⁰Tõnd tara a Zeezi kũumã mamsg d yĩnsã pʋs daar fãa, tɩ nebã na yã a Zeezi vɩɩmã tõnd yĩnsã pʋse.

¹¹Bala, tõnd sẽn vɩ wã, b kẽnda ne tõnd kũum zĩigẽ wakat fãa a Zeezi yĩnga, sẽn na n yɩl t'a Zeezi vɩɩmã me na puk tõnd yĩn-kiidsã pʋse.

¹²Woto, kũum n maand a tʋʋmd tõnd pʋse, tɩ vɩɩm maand a tʋʋmd yãmb pʋse.

¹³La a wa Wẽnnaam gʋls-sõamyã sẽn yeel tɩ: Mam tẽeme. Yaa woto yĩng la m gom yã. Tõnd me tẽedame, la yaa woto yĩng me n kɩt tɩ tõnd gomdã.

¹⁴La d miime tɩ sẽn vʋʋg-a Zu-soab a Zeezi wã na n naaga tõnd me ne a Zeezi n vʋʋge, la na n kɩtame tɩ tõnd ne yãmb naag taab n yals bãmb taoore.

¹⁵Bala, bõn-kãens sẽn maandã yaa yãmb yĩnga, tɩ barkã sẽn tat neb wʋsgã kɩt tɩ b pʋʋs Wẽnnaam barka, Wẽnnaam waoogr yĩnga.

¹⁶Yaa woto yĩng n kɩt tɩ tõnd ka boogd d daood ye. La baa tõnd yĩngã sã n sãame, tõnd sɩɩgã lebgda paalg daar fãa.

¹⁷Bala, tõnd sẽn na n paam namsg bilf wakat bilf pʋgẽ wã kɩtdame tɩ tõnd na n paam ziir kãseng sẽn kõn sa n yɩɩda.

¹⁸Sẽn paase, tõnd sẽn getã, ka bũmb nins nin sẽn ne wã ye, tõnd geta bũmb nins nin sẽn ka tõe n yãndã wã. Bala, bũmb nins nin sẽn ne wã loogdame, la bũmb nins nin sẽn ka ne wã paada wakat sẽn kõn sa.