Read SEBR SÕNGO, 1998 2 Korẽnt‑rãmbã sebre 6 Bible Online

2 Korẽnt‑rãmbã sebre 6 - SEBR SÕNGO, 1998 bible

2 Korẽnt‑rãmbã sebre 6

¹Tõnd sẽn yaa Wẽnnaam tʋmd-n-taasã yĩnga, tõnd kota yãmb tɩ y ra bas bark ninga yãmb sẽn deeg Wẽnnaam nengẽ wã tɩ yɩ zaalem ye.

²Bala, bãmb yetame: Mam leoka foom sẽn zems a wakate, la fo sẽn dat fãagr wakate, mam waa n sõnga foom. Ade, moasã yaa wakat sẽn zemse. Ade, moasã yaa fãagr daare.

³Tõnd ka rat tɩ d yel-manesem baa yembr lub ned ye, tɩ ned da wa n gom tõnd tʋʋmdã wẽng ye.

⁴La bũmb fãa pʋga tõnd wilgdame tɩ tõnd yaa Wẽnnaam tʋmtʋmdba, n maand sũ-mar wʋsg yel-pakrã pʋgẽ, la naongã pʋgẽ, la sũ-sãamsã pʋgẽ,

⁵la pãbre, la bi-bees rot kõom, la tẽn-dãmbg pʋgẽ, la tʋʋm-wɛgl pʋgẽ, la gõeem sẽn ka be, la kom pʋgẽ.

⁶Tõnd wilgdame tɩ d yaa Wẽnnaam tʋmtʋmdba, ne pʋ-peelem, ne bãngre, ne sũ-maasem ne sõmblem, ne Sɩɩg-sõngo, la ne nonglem sẽn ka naag ne zãmbo,

⁷ne koɛɛg sẽn yaa sɩda, la ne Wẽnnaam pãnga, ne tɩrlem zab-teed sẽn tar n zabdẽ, la sẽn tar n kogend d menga, waoogre, la paoogr pʋgẽ,

⁸yʋ-beedo la yʋ-noog pʋgẽ, neb geta tõnd wa zĩrẽ‑be-nebã baa ne tõnd sẽn togsd sɩdã.

⁹B geta tõnd wa sãamba, baa ne b fãa sẽn mi tõndã. B geta tõnd wa kiidba, la tõnd yaool n vɩɩme. B geta tõnd wa neb b sẽn sɩbgde, la b ka kʋʋd tõnd ye.

¹⁰B geta tõnd wa sũ-sãang rãmba, la tõnd tara sũ-noog daar fãa. B geta tõnd wa naong rãmba, la tõnd kɩtdame tɩ neb wʋsg lebgd arzegs rãmba. B geta tõnd wa neb sẽn ka tar baa fʋɩ, la tõnd yaool n tara bũmb fãa.

¹¹Korẽnt nebã, tõnd goma vẽeneg ne yãmba. D pelga d pʋs ne yãmba.

¹²Tõnd ka solg yãmb d nonglem ye. La yãmb ka wilg tõnd y nonglem ye.

¹³Mam gomda ne yãmb wa m kamba, bɩ y tags tõnd yell wa tõnd sẽn tagsd yãmb yellã. Yãmb me pelg y pʋs ne tõndo.

¹⁴Bɩ y da paam lagem-n-taar ne neb nins sẽn ka Kiris tẽedbã ye. Bala, bõe lagem-n-taar n be tɩrlem ne wẽng sʋka? Wall bõe lagem-n-taar n be vẽenem ne lik sʋka?

¹⁵La bõe zems-n-taar n be Kiris ne a Belyall sʋka? Wall ned ning sẽn tẽedã tara bõe pʋɩɩr ne ned ning sẽn ka tẽedã?

¹⁶Bõe lagem-n-taar n be Wẽnnaam doogã ne wẽn-naands sʋka? Bala, tõnd yaa Wẽnnaam sẽn vɩ roogo, wa Wẽnnaam sẽn yeel tɩ: Mam na n zĩnda ne bãmba, la m kẽn bãmb sʋka. Mam na n yɩɩ bãmb Wẽnnaam, la bãmb na n yɩɩ mam nebã.

¹⁷Yaa woto yĩng tɩ Zu-soabã yetẽ yaa: Yi-y bãmb sʋka, welg-y toor ne-ba. La y ra sɩɩs bũmb sẽn yaa rẽgd ye, la mam na reeg yãmba.

¹⁸Mam na n yɩɩ yãmb Ba, la yãmb na n yɩɩ mam kom-dibli la m kom-pugli. Yaa Zu-soabã, Sẽn-Tõe-Fãa fãa wã n yeele.