Read SEBR SÕNGO, 1998 2 Korẽnt‑rãmbã sebre 7 Bible Online

2 Korẽnt‑rãmbã sebre 7 - SEBR SÕNGO, 1998 bible

2 Korẽnt‑rãmbã sebre 7

¹Woto yĩnga, m zo-nongdse, tõnd sẽn tar kãab-kãensã wã, bɩ d yɩlg d mens ne rẽgd ning sẽn dẽgemd yĩngã ne sɩɩgã, n bɩ sõmblem sẽn zems zãng pʋgẽ n paase, Wẽnnaam dabeem zoees pʋgẽ.

²Bas-y tɩ d paam weer y sũyã pʋsẽ. Tõnd ka maan ned baa a yembr wẽnga, tõnd ka sãam ned baa a yembr yelle, tõnd ka zãmb ned n deeg a bũmbu.

³Mam sẽn gomd a woto wã, ka sẽn na n mong yãmb bʋʋm ye. Bala, mam dag n zoe n yeelame tɩ tõnd tagsda yãmb yelle, d sã n vɩ wall d sã n ki.

⁴Mam sũur keema wʋsg ne yãmba, mam sũur nooma ne yãmba. Mam paamda belsgo. Baa tõnd yel-pakrã fãa pʋgẽ, mam tara sũ-no-kãsenga.

⁵Bala, tõnd sẽn ta Masedoan soolmẽ wã tɛka, tõnd yĩnsã ka tol n paam vʋʋsg baa bilf ye. Tõnd paama namsg buud fãa. Yɩng yaa maoore, la pʋgẽ yaa rabeem.

⁶La Wẽnnaam sẽn belsd sũ-sãang rãmbã, b belsa tõnd ne a Tit waoongã.

⁷La ka ne a Tit waoongã bal ye, leb n yaa ne belsg ning yẽnda sẽn paam yãmb nengẽ wã me. Yẽnda togsa tõnd yãmb sẽn dat maam wʋsg to-to wã, yãmb nintãm la y sẽn dat n sõng maam to-to wã. Rẽ kɩtame tɩ mam paam sũ-noog wʋsg n paase.

⁸Baa mam sebrã sã n sãama yãmb sũyã, mam ka maand m bãngẽ ye. La baa mam sã n maana m bãngẽ, yɩɩ wakat bilf pʋgẽ, mam sẽn yã tɩ seb-kãngã sãama yãmb sũyã yĩnga.

⁹Mam maanda sũ-noog moasã, la ka m sẽn sãam yãmb sũyã yĩng ye. Yaa yãmb sũ-sãangã sẽn kɩt tɩ yãmb tek yam n kos sugrã yĩnga. Bala, yãmb sũ-sãangã yii Wẽnnaam nengẽ. Rẽ wã, tõnd ka maan yãmb bũmb sẽn na n sãam-y ye.

¹⁰Sɩd me, sũ-sãang ning sẽn yit Wẽnnaam nengẽ wã kɩtdame tɩ ned tek yam n kos sugr n paam fãagre, la ned ka maand a bãngẽ rẽ yĩng ye. La dũni wã sũ-sãang wata ne kũum.

¹¹La ad sũ-sãang ning sẽn yit Wẽnnaam nengẽ wã sẽn modg yãmb tɩ y maan bũmb ninsi: A kɩtame tɩ y yiis yell y mens zutu, a waa ne sũ-pa-noaanga, a waa ne rabeem, a waa ne ratem kãsenga, a waa ne yamleoogo, a waa ne sɩbgre. Bũmbã fãa pʋgẽ, yãmb wilgame tɩ y ka tar yell yel-kãngã pʋg ye.

¹²Rẽ wã, mam sẽn gʋls yãmbã, ka sẽn maan-a yellã yĩnga, a ka ned ning yẽnda sẽn beegã me yĩng ye. La yaa sẽn na n yɩl tɩ yãmb sẽn nong tõnd to-to wã yɩ vẽeneg yãmb sʋk Wẽnnaam taoore.

¹³Yaa rẽ n kɩt tɩ tõnd paam belsgã. La sẽn paasd tõnd sẽn paam belsgã, a Tit sẽn paam raood ning yãmb fãa nengẽ t'a sũurã noomẽ wã leb n kõo tõnd sũ-noog wʋsg n yɩɩd yɛsa.

¹⁴Sã n yaa mam sẽn pẽg m meng bilf a Tit taoor yãmb wɛɛngẽ wã, bõn-kãng yãnd ka tar maam ye. Wa tõnd sẽn dag n togs yãmb sɩd daar fãa wã, woto me, tõnd sẽn pẽg d mens yãmb wɛɛngẽ a Tit taoorã me yɩɩ sɩda.

¹⁵La a Tit sã n tẽeg yãmb fãa sakrã yelle, a paamda nonglem wʋsg yãmb yĩng n paasdẽ, bala yãmb deega yẽnda ne rabeem la rigbu.

¹⁶Mam maanda sũ-noogo, mam sẽn tõe n kɩs sɩd ne yãmb bũmb fãa pʋgẽ wã yĩnga.