Read SEBR SÕNGO, 1998 Galat‑rãmba 2 Bible Online

Galat‑rãmba 2 - SEBR SÕNGO, 1998 bible

Galat‑rãmba 2

¹Rẽ poore, yʋʋm piig la a naas zugẽ, mam leb n kẽnga Zeruzalɛm la mam peega a Tit me.

²Yaa vẽnegr mam sẽn paam yĩng la mam kẽng be. Mam wilg-b la koe-noogã mam sẽn moond bu-zẽmsã. Yaa taoor dãmbã la m gom ne, ka yɩ nebã fãa taoor ye. Bala, mam dag n zoeta tʋʋmdã m sẽn maan la m ket n maandẽ wã na n wa yɩ zaalem.

³La pʋs n ka yɩ tɩlɛ t'a Tit sẽn yaa Gɛrk n be ne maamã kẽ bãong ye.

⁴Baoosgo, baa ne neb nins sẽn belg tɩ b yaa tõnd ba-biisã sẽn kẽ tõnd sʋk n na n gũus tõnd n ges lohorem ning tõnd sẽn tar d lagem-n-taar a Zeezi Kirisã pʋgẽ wã, n dat n kẽes tõnd yembdẽ wã.

⁵La tõnd ka tũ b raabã baa bilf ye, sẽn na n yɩlẽ tɩ koe-noogã sɩdã na kell n yals yãmb sʋka.

⁶La sã n yaa ne neb nins nebã sẽn dag n get wa taoor dãmbã, la b sẽn dag n yaa bũmb ning pĩndã ka pak maam ye, Wẽnnaam ka welgd neb ye. Taoor dãmb-kãens ka modg maam tɩ m maan baa fɩ ye.

⁷Ayo, b sẽn yã tɩ Wẽnnaam kõo maam koe-noogã neb nins sẽn ka-b Zʋɩf‑rãmbã yĩnga, wa b sẽn kõ a Pɩyɛɛr Zʋɩf‑rãmbã yĩngã,

⁸(bala, ned ning sẽn tʋm a Pɩyɛɛr pʋgẽ n kɩt t'a lebg Zʋɩf‑rãmbã tẽn-tʋmdã, nin‑kãng me n tʋm mam pʋgẽ bu-zẽmsã yĩnga).

⁹La b sẽn bãng bark ning Wẽnnaam sẽn kõ maamã, a Zak ne a Sefaas la a Zã, nebã sẽn get wa ra-lugsã yõga maam ne a Barnabaas nus-rɩtgo, n wilg tɩ lagem-n-taar bee tõnd ne bãmb sʋka. Woto, tõnd na n teesa bu-zẽmsã sẽnẽ, tɩ bãmb tees Zʋɩf‑rãmbã sẽnẽ.

¹⁰Tõnd togame bal n tẽeg naong rãmbã yelle, la mam maana rẽndã ne m sũur fãa.

¹¹La a Sefaas sẽn wa Ãntiyoosã mam leng-a-la nebã taoore, bala, a dag n maana sẽn ka zemse.

¹²Sɩd me, sẽn deng neb kẽer sẽn yi a Zak nengẽ wã waoongo, a Sefaas dag n dɩta ne bu-zẽmsã. La nin-kãens waoongã zugẽ, a welgame n ka leb n dɩt ne bu-zẽmsã ye, a sẽn zoet zũnsã yĩnga.

¹³Zʋɩf-rãmb a taabã me rag n kuusd n maanda wa yẽnda sẽn maandã, hal t'a Barnabaas mengã tũ n kẽ b zãmbã pʋgẽ.

¹⁴La mam sẽn yã tɩ b ka kẽnd tɩrg wa sẽn zems koe-noogã sɩdã yĩnga, mam yeela a Sefaas nebã fãa taoor yaa: Fo sẽn yaa Zʋɩfã, fo sã n maand wa bu-zẽmsã fo na n maana a wãn n modg bu-zẽmsã tɩ b sak Zʋɩf‑rãmbã kaorengo?

¹⁵Tõnd yẽ rogame n yaa Zʋɩf-rãmba, la d ka yel-wẽn-maandb soolem dãmbã sʋk ye.

¹⁶Tõnd sẽn mi tɩ ka ne tõogã tʋʋm la ned yɩt tɩrga, la yaa ne tẽeb ne a Zeezi Kirisã, tõnd me tẽe a Zeezi Kirisã, tɩ tẽeb ne Kirisã na kɩt tɩ tõnd lebg tɩrse, la ka tõogã tʋʋm ye. Bala, tõog tʋʋm kõn kɩt tɩ ned baa a yembr yɩ tɩrg ye.

¹⁷La tõnd sẽn baood tɩ Kiris kɩt tɩ tõnd yɩ tɩrsã, b sã n mik tɩ tõnd me yaa yel-wẽn maandb wa bu-zẽmsã, dẽ, Kiris yaa yel-wẽna tʋmtʋmd la? Yaa vẽeneg tɩ ka a woto ye.

¹⁸Bala, bũmb nins mam sẽn yeel tɩ b ka sõngdã, mam sã n wẽnemd n yeel tɩ b sõngdame, rẽnd mam lebga m meng kɩɩsda.

¹⁹Sɩd me, sã n yaa ne tõogã wɛɛngẽ, mam yaa kũum tõogã maasem yĩnga, tɩ m tõe n vɩɩmd Wẽnnaam yĩnga.

²⁰B kaa maam ne Kirisã, la ka maam n vɩ yɛs ye, yaa Kirisã n vɩ mam pʋgẽ. Mam sẽn vɩ m yĩngã pʋgẽ moasã wã, yaa tẽeb ne Wẽnnaam Bi-riblã, soab ning sẽn kõ a vɩɩm a toor mam yĩngã pʋgẽ la mam vɩ.

²¹Mam ka tõdgd Wẽnnaam barkã ye. Bala, sã n dag n yaa ne tõog la ned paamd tɩrlem, dẽnd Kirisã kii zaalem.