Read SEBR SÕNGO, 1998 Galat‑rãmba 4 Bible Online

Galat‑rãmba 4 - SEBR SÕNGO, 1998 bible

Galat‑rãmba 4

¹La mam yaool n yeta yãmb tɩ ned ning sẽn na n soog a ba wã paoong sã n ket n yaa biiga, welgr ka be yẽnda ne yamb sʋk ye, tɩ yaool n yaa yẽnda n na n soog bũmba fãa.

²Ba-wubdsi la tʋʋm-gɛtb n so yẽnda hal tɩ ta wakat ning ba wã sẽn yãkã.

³Tõnd me sẽn dag n yaa kambã, tõnd dag n bee dũni wã bũmb buud toor-toor yembd pʋgẽ.

⁴La wakat sẽn ta, Wẽnnaam tʋma b bi-riblã tɩ pag rog-ba, n dog-b tõogã pʋgẽ,

⁵tɩ b tõe n yols neb nins sẽn dag n be tõogã yembd pʋgẽ, n tõog n deeg tõnd n maan Wẽnnaam kamba.

⁶La yãmb sẽn yaa Wẽnnaam kambã yĩnga, Wẽnnaam tʋma b bi-riblã Sɩɩg yãmb sũyã pʋse, la Sɩɩgã yetame tɩ «abba» sẽn dat n togs tɩ «m ba!»

⁷Woto, fo ka leb n yaa yamb yɛs ye, fo yaa Wẽnnaam biiga. La fo sã n yaa Wẽnnaam biiga, fo yaa bãmb pʋɩ-rɛɛgd me, bãmb maasem yĩnga.

⁸Pĩndã, yãmb dag n ka mi Wẽnnaam ye, la yãmb dag n sakda wẽnnaam-dãmb sẽn ka wẽnnaam-dãmb sɩd-sɩd ye.

⁹La moasã, yãmb sẽn bãng Wẽnnaamã, la sẽn yɩɩd fãa Wẽnnaam sẽn bãng yãmbã, yɩta a wãn tɩ yãmb leb n kẽed dũni bõn-kãensã sẽn ka pãnga la sẽn ka yõodã, n na n leb n lebg b yembse?

¹⁰Yãmb tũuda rayã, kitã, wakatã la yʋʋmã.

¹¹Dabeem tara maam ne m sẽn nams yãmb yĩngã kõn yɩ zaalem.

¹²M ba-biisi, mam bõosda yãmb tɩ y yɩ wa maam, bala, mam me yaa wa yãmba.

¹³Yãmb ka beeg maam baa bilf ye. Yãmb miime tɩ mam sẽn na n moon yãmb koe-noogã pipi, yɩɩ mam ka laafɩ yĩnga.

¹⁴Mam yĩnsã ka-laafɩ wã yɩɩ makr yãmb yĩnga. Ka tɩ yãmb ka ges maam n ka nandẽ, wall y yam yii maam ye. Ayo! Yãmb pʋs n deega maam wa Wẽnnaam malɛɛka, la wa a Zeezi Kirisi.

¹⁵La yaa bõe n wa ne yãmb sũ-noogã? Bala, mam kɩta yãmb kaset n yetẽ tɩ yãmb sã n dag n tõeẽ, y dag n na yãgs y ninã n kõ maam.

¹⁶Mam sẽn togs yãmb sɩdã yĩnga, mam lebga yãmb bɛ la?

¹⁷Bãmb sẽn wɩngd ne yãmbã ka sõama ye. B sẽn datã yaa tɩ welg yãmb ne tõndo, tɩ yãmb na wẽnemd n kẽ bãmba.

¹⁸Yaa sõama tɩ y wɩng ne bũmb ning sẽn yaa sõama wakat fãa, la ka mam sẽn be ne yãmb wakat bal ye.

¹⁹Mam kamba, rogem toog leb n tara maam yãmb yĩnga, hal n na ta wakat ning yãmb sẽn nan wẽneg Kirisã.

²⁰Mam da nong n bee yãmb sʋk moasã n tek m sẽn gomd to-to wã, bala, mam ka mi m sẽn na n maan to-to ne yãmb yellã ye.

²¹Yãmb dãmb sẽn dat n be tõog sakr pʋgẽ wã, leok-y maam wɛ! Yãmb ka kelgd tõogã la?

²²Bala, b gʋlsame t'a Abrahaam paama kom-dibli a yiibu: A yembr yaa yem-poakã biiga, t'a to wã ya burkĩn-poakã biiga.

²³Yaa ne ninsaal datem la b rog yem-poakã biigã, la b roga burkĩn-poakã biig wa sẽn zems Wẽnnaam sẽn kãabã.

²⁴Mamsg n be yel-kãngã pʋgẽ, bala, pagbã a yiibã mamsda kaool a yiibu. Pag a yembr mamsda kaool ning sẽn maan Sinayi tãngẽ wã, la a sẽn dogd b rãmbã yaa yembse. Pʋg-kãng yaa a Agaare.

²⁵A Agaar yaa Sinayi tãng sẽn be Araabi wã, la kell n zemsa ne rũndã-rũndã Zeruzalɛmã, bala, a bee yembdẽ ne a kambã.

²⁶La Zeruzalɛm sẽn yit-a yĩngrã yaa burkĩna, la yaa yẽnda n yaa tõnd ma.

²⁷Sɩd me, b gʋlsame n yeel yaa: pʋg-kiir sẽn ka rogda, maan sũ-noogo. Fo sẽn ka yã rogem toogã, kɩdem la f kaase! Bala, pag ning b sẽn basã kamb na n yɩɩga pag ning b sẽn nongã kamba.

²⁸La yãmba, m ba-biisi, yãmb yaa kãabg kamb wa a Izake.

²⁹La a wa biig ning b sẽn dog yĩng ratem yĩngã sẽn dag n namsd biig ning b sẽn dog wa sẽn zems Wẽnnaam Sɩɩgã raabã, ket n yaa a woto bal moasã.

³⁰La Wẽnnaam gʋls-sõamyã yetame tɩ bõe? Dig yem-poakã ne a biigã, bala, yem-poakã biig ka na n naag ne burkĩnã biig n deeg rogem‑pʋɩɩr ye.

³¹Woto, m ba-biisi, tõnd ka yem-poakã kamb ye, tõnd yaa burkĩn‑poakã kamba.