Read SEBR SÕNGO, 1998 Efɛɛs‑rãmba 3 Bible Online

Efɛɛs‑rãmba 3 - SEBR SÕNGO, 1998 bible

Efɛɛs‑rãmba 3

¹Yaa woto yĩng n kɩt tɩ maam a Poll yaa Kiris bi-bɛɛg yãmb sẽn yaa bu-zẽmsã yĩnga.

²M tẽed tɩ yãmb wʋmame tɩ b gomd Wẽnnaam bark koɛɛgã b sẽn kõ maam tɩ m togs yãmbã yelle.

³Yɩɩ ne vẽnegr la Wẽnnaam wilg maam yel-solemd ning mam sẽn gʋls a goamã bilf n wilg yãmbã.

⁴Yãmb sã n karem-ba, y na n bãnga yam-vẽnegr ning mam sẽn paam Kiris yel-solemdã pʋgẽ wã võore.

⁵Wakat sẽn looge, Wẽnnaam rag n ka kɩt tɩ ninsaalbã kamb bãng yel-solem-kãng wa b sẽn vẽneg-a moasã ne b tẽn-tʋmdb sõamyã la ne b no-rɛɛsdbã, ne Sɩɩg-sõng pãngã ye.

⁶Yel-solem-kãng yaa tɩ bu-zẽmsã naagda Zʋɩf-rãmbã n paamd pʋɩɩr a yembre, la b lebg yĩng a ye ne bãmba, la pʋɩt-n-taas ne kãab-noog ning sẽn be a Zeezi Kiris pʋgẽ, koe-noogã maasem yĩngã.

⁷Mam lebga koe-no-kãng tẽn-tʋmda, wa sẽn zems Wẽnnaam barkã kũunã b sẽn kõ maam, tɩ bãmb pãngã maand tʋʋmdã yĩnga.

⁸Mam sẽn yaa Wẽnnaam nebã fãa yao-zʋʋgã, Wẽnnaam kõo maam bakr‑kãnga, tɩ m moon koe-noog ning sẽn wilgd Kiris arzegs sẽn ka sɛtã bu-zẽmsã sʋka,

⁹la m vẽneg yel-solemd ning sẽn dag n solg Wẽnnaam sẽn yaa bũmb fãa naandã nengẽ, wakat sẽn kaoosã n wilg nebã.

¹⁰Dẽ, sẽn sɩng ne moasã, Kiris tẽedbã maasem yĩng na n kɩtame tɩ nanambsã ne yĩngr pãens rãmbã bãng Wẽnnaam yamã, bũmb wʋsg pʋgẽ.

¹¹Bõn-kãng zemsa ne Wẽnnaam yam-yãkr sẽn kõn sa, b sẽn pids-a tõnd Zu-soab a Zeezi Kiris maasem yĩngã.

¹²Tõnd sẽn be Kiris pʋgẽ la d tẽed bãmbã yĩnga, tõnd tara lohorem tɩ kolg Wẽnnaam ne pɛl-kɛgenga.

¹³Sẽn paase, mam kota yãmb tɩ y ra bas tɩ mam sẽn nams yãmb yĩngã boog yãmb raood ye. Mam namsgã yaa yãmb waoore.

¹⁴Yaa woto yĩng tɩ mam yĩgimdid d ba wã taoore,

¹⁵soab ning buud fãa sẽn be yĩngr la sẽn be tẽng zug sẽn paamd b yʋy b nengẽ wã taoore,

¹⁶tɩ b na kõ yãmb wa sẽn zems b naamã arzɛka, n kɩt tɩ ne bãmb Sɩɩg-sõng pãnga, bɩ yãmb paam pãng y sũyã pʋse,

¹⁷tɩ ne tẽebo, Kiris na zĩnd yãmb sũyã pʋse, la m kotẽ tɩ yãmb na kɩ yẽg n yals kãenkãe nonglem pʋgẽ,

¹⁸tɩ yãmb tõe n naag ne Wẽnnaam nebã fãa n tõog n bãng nonglmã yalem la a woglem la a zulum ne a zãntlem sẽn yaa to-to,

¹⁹la tɩ y bãng Kiris nonglmã sẽn yɩɩd ninsaalb bãngre, sẽn na n yɩlẽ tɩ yãmb na pid ne bũmb fãa, hal n pid ne Wẽnnaam yalẽ wã.

²⁰Bɩ soab ning sẽn tõe n tall-a pãng ning sẽn be tõnd pʋgẽ n tʋmdẽ wã n maan hal wʋsg n yɩɩg tõnd sẽn kot fãa, wall d sẽn tagsd fãa wã

²¹paam ziir Kiris tẽedbã sʋka, a Zeezi Kiris pʋgẽ, zamaan woo zamaanã, wakat sẽn kõn sa, ãmina.