Read SEBR SÕNGO, 1998 Efɛɛs‑rãmba 4 Bible Online

Efɛɛs‑rãmba 4 - SEBR SÕNGO, 1998 bible

Efɛɛs‑rãmba 4

¹Woto yĩnga, mam sẽn be bi-bees roogẽ Zu-soabã tũudum yĩngã, mam sagenda yãmb tɩ y kẽn wa sẽn zems boolg ning Wẽnnaam sẽn bool yãmbã.

²Kẽn-y ne sik-m-meng la sũ-bʋgsem la sũ-mare, la y sak n deeg taab ne nonglem,

³n mao tɩ Sɩɩg-sõng lagem-n-taar zĩndi, laafɩ ning sẽn loe-a yãmb ne taabã yĩnga.

⁴Yĩng a yembr bal n be, la Sɩɩg-sõng a yembr bal n be, wa b sẽn bool yãmb tɩ y paam tẽeb pidsg gũudum a yembr y boolgã yĩngã.

⁵Zu-soab a yembr bala n be, la tẽeb a yembr bala, la lisg a yembr bala.

⁶Wẽnnaam a yembr bal n be n yaa nebã fãa ba, n so bũmb fãa, la b be b fãa sʋka, la b fãa pʋse.

⁷La b kõo tõnd ned kam fãa barkã, wa sẽn zems Kiris kũun makdgã.

⁸Yaa woto yĩng tɩ gʋls-sõamyã yetẽ yaa: Bãmb sẽn dʋ yĩngrã, b zãa yembse, la bãmb kõo ninsaalb kũuni.

⁹La gomd ning sẽn yet tɩ bãmb dʋʋme wã võor yaa bõe, sã n ka tɩ bãmb reng n siga tẽngã tẽngr me?

¹⁰Soab ning sẽn dag n sig-a wã, yaa soab‑kãng bal n zẽk yĩngr hal n loog saasẽ, tɩ bãmb tõe n pid bũmb fãa.

¹¹Yaa bãmb n kɩt tɩ neb kẽer yɩ tẽn-tʋmdbã, tɩ kẽer yɩ bãmb no-rɛɛsdba, tɩ kẽer yɩ koe-noogã moaandba, tɩ kẽer yɩ pe-kɩɩmba la karen-saam-dãmba,

¹²b nebã bɩɩsg yĩnga. Wẽnnaam maana a woto bãmb tʋʋmdã na tõog n maan yĩnga, la Kiris yĩngã bɩɩsg yĩnga,

¹³hal tɩ tõnd fãa na lagem taab n paam tẽeb a yembre, la d bãng Wẽnnaam Bi-riblã, n yɩ neb sẽn bɩ, n lebg wa a Zeezi sẽn yaa bũmb ningã, n zems zãngã.

¹⁴Woto, tõnd kõn leb n yɩ wa kamb sẽn lengde, tɩ zãmsg buud fãa rɩkd-d n loogdẽ, tɩ ninsaalbã zãmbã ne b belgr tʋʋmã tar tõnd n leebdẽ ye.

¹⁵La yaa tɩ tõnd sẽn togsd sɩd ne nonglmã yĩnga, tõnd na n bɩɩ bɩʋʋngã ne bũmb fãa, Kiris sẽn ya tõnd naabã pʋgẽ.

¹⁶Yaa bãmb yĩng la yĩngã wil gill fãa sẽn sog taab sõama, sũgdsã sẽn zãad yĩngã sõama wã yĩngã, yĩngã will fãa bɩtame n zems a sẽn tog n bɩ to-to, la a bɩɩsd a meng ne nonglem.

¹⁷Woto yĩnga, ad bũmb ning mam sẽn yet yãmba, la m sẽn kɩt a kaset Zu-soabã pʋgẽ: Yaa tɩ yãmb ka tog n leb n kẽn wa neb nins sẽn ka pʋʋsd Wẽnnaamã ye. Bãmb kẽnda wa sẽn zems b tagsg sẽn ka yõodã.

¹⁸Zɩɩlmã sẽn be nin-kãens pʋgẽ la b sũyã sẽn diglmã yĩnga, b yamã ka liki, la b ka vɩ wa Wẽnnaam sẽn datã ye.

¹⁹Yel-wẽnã maaneg yãnd ka leb n tar-b baa bilfu. B basame tɩ raglem soog-ba, tɩ b maand tʋʋm dẽgd buud fãa la rat-wʋsgo.

²⁰La yãmba, ka yɛl a woto maaneg pʋgẽ la yãmb zãms tɩ bãng Kirisã ye,

²¹sã n yaa tɩ yãmb wʋma bãmb yelle, la y paam zãmsg bãmb pʋgẽ, n zems ne sɩd ning sẽn be a Zeezi pʋgẽ wã. Sɩdã võor yaa tɩ yãmb bas y tʋʋm kʋdã sẽn yaa nin-kʋdgã rẽndã, nin-kʋdg ning sẽn dẽgemd a meng nana, ratem wẽngã sẽn tudgd nedã yĩnga,

²³la tɩ Sɩɩgã tek yãmb yamã,

²⁴la y yeelg nin-paalgã wa fuugu, nin-paalg ning Wẽnnaam sẽn naan wa b sẽn data, tɩrlem la sõmblem sɩd sẽn wat ne wã pʋgẽ.

²⁵Woto yĩnga, bas-y zĩrẽ yagbo, la bɩ yãmb ned kam fãa togs a to sɩda. Bala, tõnd yaa yĩng a yembr wil ne taaba.

²⁶Yãmb sũur sã n yiki, da sak-y tɩ wĩndg tɩ kẽ tɩ y sũurã nan ka sig ye.

²⁷Da kõ-y-yã a Sʋtãan weer ye.

²⁸Bɩ ned ning sẽn dag n zuud da leb n zu ye. A mao n tʋm pʋ-peelem tʋʋmd ne a nusi, t'a tõe n paam bũmb sẽn na kõ ned ning sẽn tog ne sõngrã.

²⁹Da sak-y tɩ gom yook ba a yembr yi yãmb noorẽ ye. Gomd sã n na n wa yi, bɩ yɩ gom-sõng sẽn na sõng ned t'a bɩ la a wa ne bark neb nins sẽn wʋmdã zutu.

³⁰Da maan-y tɩ Wẽnnaam Sɩɩg-sõngo, Sɩɩg ning b sẽn tall n ning yãmb bãnd fãagr daarã yĩngã sũur sãam ye.

³¹Yiis-y sũ-toogo la kisgri, la tẽn-kãnem, la pʋ-toog buud fãa y sʋka.

³²Maan-y taab neere, n kũmd taaba, la y kõ taab sugri, a wa Wẽnnaam sẽn kõ yãmb sugr Kiris maasem yĩngã.