Read SEBR SÕNGO, 1998 Filip‑rãmba 1 Bible Online

Filip‑rãmba 1 - SEBR SÕNGO, 1998 bible

Filip‑rãmba 1

¹Maam a Poll ne a Tɩmote sẽn yaa a Zezi-Kiris nonglem yembsã n tʋmd seb-kãngã Wẽnnaam nebã fãa sẽn tẽed a Zeezi Kirisã la karen-saam-dãmba ne yel-gɛtbã sẽn be Filip tẽngã.

²Bɩ y reeg bark la laafɩ sẽn yit tõnd ba a Wẽnnaam ne Zu-soab a Zeezi Kiris nengẽ.

³Wakat fãa mam sẽn tẽegd yãmb yelle, mam pʋʋsda Wẽnnaam bark y yĩnga.

⁴Mam pʋʋsda yãmb fãa yĩng wakat fãa ne sũ-noog n ka basdẽ ye,

⁵yãmb sẽn sõngd ne koe-noogã tʋʋmd hal sẽn sɩng daar ning yãmb sẽn wʋm-a, tɩ ta moasã wã yĩnga.

⁶Mam mii hakɩɩk tɩ Wẽnnaam sẽn sɩng tʋʋm sõng-kãng yãmb sũyã pʋsã na n kell n maan-a lame n baase, hal tɩ ta a Zeezi Kiris daarã.

⁷A Zemsame tɩ mam paam tagsg a woto yãmb fãa yĩnga, bala, mam yam bee ne yãmb sõama, bala, sã n yaa mam sẽn be bi-bees roog pʋg moasã wã, wall sã n yaa mam sẽn da gomd n wilgdẽ tɩ koe-noogã yaa sɩdã, yãmb fãa lagemda ne maam n paamd bark a yembre.

⁸Bala, Wẽnnaam yaa mam kaset soab tɩ mam nonga yãmb fãa ne a Zeezi Kiris nonglem,

⁹la mam sẽn pʋʋsd n kot bũmb ninga, yaa tɩ yãmb nonglem na paasd daar fãa n yɩɩda, ne bãngre la yam-vẽnegre.

¹⁰Tɩ woto, yãmb na n bãnga bũmb ning sẽn yaa sõama n yɩɩda sẽn na n yɩlẽ tɩ Kiris waoongã daare, bɩ y yɩ neb sẽn yaa sɩd dãmb tɩ rõadg kaẽ ye,

¹¹n pid ne tɩrlem biis sẽn yit a Zeezi Kiris nengẽ, Wẽnnaam waoogre la b pẽgr yĩnga.

¹²M ba-biisi, mam datame tɩ yãmb bãng tɩ bũmb nins sẽn paam maamã kɩtame tɩ koe-noogã saag n yɩɩda.

¹³Sɩd me, na-yirã nebã fãa la zĩiga fãa nebã bãngame tɩ yaa mam sẽn maand Kiris tʋʋmdã yĩng la b balg maam.

¹⁴Ba-biisã kẽer sẽn tũud Zu-soabã fãa paama raood mam balgrã yĩnga, n moon Wẽnnaam koɛɛgã ne raood n ka zoe rabeem ye.

¹⁵Yaa sɩd tɩ neb kẽer moonda a Kiris koɛɛgã sũ-kiir la geesem-geesem yĩnga. La neb kẽer moond-a-la ne yam sẽn yaa sõama.

¹⁶Bãmb dãmba moonda ne nonglem, b sẽn mi tɩ Wẽnnaam yãka maam tɩ m gom koe-noogã yĩngã.

¹⁷La neb a tãabã yaool n moonda Kiris koɛɛgã ne geesem-geesem, la ka ne pʋ-peelem ye. La b tẽedame tɩ bõn-kãng na n paasa maam namsg m balgrã pʋgẽ.

¹⁸Dẽ, ka yell ye, baa sẽn yaa bũmb ning fãa, sã n yaa ne yam-wẽng wall yaa ne pʋ-peelem, b baas n moonda Kiris koɛɛgã, la mam maanda sũ-noog bõn-kãng yĩnga. La m na n leb n maana sũ-noog yɛsa.

¹⁹Bala, yãmb pʋʋsgã la a Zeezi Sɩɩgã sõngrã yĩnga, mam miime tɩ bõn-kãng na n wẽneg n waa ne mam yolsgo.

²⁰Wa sẽn zems mam datem la m tẽeb pidsg gũudmã, bũmb ba a yembr yãnd ka na n yõk maam ye. Moasã ne wakat fãa, mam na n goma ne pɛl-kɛgenga. Woto, Kiris na n paama waoogr mam yĩngã pʋgẽ, sã n yaa mam sẽn vɩ wall m sẽn ki.

²¹Bala, ne maam, Kiris yaa mam vɩɩm. La tɩ ki yaa yõod ne maam.

²²La mam sẽn na n kell n vɩ m yĩngã pʋgẽ wã sã n tara yõod ne mam tʋʋmdã, mam ka mi m sẽn yãkd a soab ye. Bũmb a yiib ratem n tar maam.

²³Mam dat n loog n kẽnga Kiris nengẽ. Rẽnda n yaa neer wʋsg ne maam.

²⁴La yãmb yĩnga, mam sẽn na n kell n vɩɩmd n yaa sõama n yɩɩda.

²⁵Mam sũur keemame. La mam miime tɩ mam na n kell n paa me, la m na n zĩnda yãmb fãa sʋk n sõng-y tɩ y kẽng taoore la y paam sũ-noog tẽebã pʋgẽ.

²⁶Mam sã n leb n wa yãmb nengẽ, a na n kõo yãmb waoogr yɛs mam yĩnga, a Zeezi Kiris tũudmã pʋgẽ.

²⁷Bũmb sẽn be bala, kɩt-y tɩ yãmb tʋʋmã zems ne Kiris koe-noogã, sẽn na n yɩlẽ tɩ mam sã n wa n na ges yãmba, wall m sã n ka wa, bɩ m wʋm yãmb kibar sẽn yet tɩ y yasa kãenkãe ne yam a yembre, n lagemd taab ne tagsg a yembr n zabd koe-noogã tẽeb yĩnga.

²⁸La y ka sakd n bas tɩ y bɛɛba kẽes yãmb rabeem ne bũmb baa yembr ye. Bõn-kãng yaa kaset bãmb yĩng tɩ b na n sãamame, la a yaa fãagr yãmb yĩnga. Rẽ yita Wẽnnaam nengẽ.

²⁹Bala, Wẽnnaam sẽn maan bark ning Kiris maasem yĩngã, ka tɩ yãmb tẽ Kirisã bal ye, yaa tɩ yãmb na nams bãmb yʋʋrã yĩng me,

³⁰n maood maoor ning yãmb sẽn yã tɩ mam maoome wã, la y wʋmd moasã tɩ mam maoodame wã.