Read SEBR SÕNGO, 1998 Filip‑rãmba 4 Bible Online

Filip‑rãmba 4 - SEBR SÕNGO, 1998 bible

Filip‑rãmba 4

¹Woto yĩnga, m ba-bi-nongdse, mam sẽn tʋlg ne m sũur fãa tɩ leb n yãnd yãmb sẽn yaa mam sũ-noog la m maanfã, bɩ y yals a woto kãenkãe Zu-soabã tũudum pʋga m zo-nongdse.

²Mam sagenda a Evodi ne a Sẽntiis tɩ b paam yam a yembr Zu-soabã tũudum pʋgẽ.

³La foom me, m tʋmd-n-ta-sõngo, mam kota foom tɩ f sõng pʋg-kãense. B ra tʋma ne maam koe-noogã yĩnga, ne a Kelma la ne mam tũud-n-taas a taabã yʋy sẽn be vɩɩm sebrã pʋgẽ wã.

⁴Maan-y sũ-noog daar fãa Zu-soabã tũudum pʋgẽ. Mam leb n yetame, maan-y sũ-noogo.

⁵Kɩt-y tɩ nebã fãa bãng yãmb sũ-bʋgsem. Zu-soabã waoong kolgame.

⁶Da maan-y yɩɩr ne bũmb baa fʋɩ ye. La bũmba fãa pʋga, pʋʋs-y Wẽnnaam n kose la y pʋʋs barka la y wilg Wẽnnaam bũmb nins yãmb sẽn datã.

⁷La Wẽnnaam laafɩ wã sẽn yɩɩd ninsaalbã bãngr fãa wã na n gũu yãmb sũyã ne y tagsdã a Zeezi Kiris pʋga.

⁸Koɛɛg sẽn keta, m ba-biisi, bɩ y tags bũmb nins fãa sẽn yaa sɩda, la bũmb nins fãa sẽn tar waoogre, la bũmb nins fãa sẽn yaa tɩrse, la bũmb nins fãa sẽn be pʋ-peelem, la bũmb nins fãa sẽn zems nonglem, la bũmb nins fãa sẽn tar kaset sõngo, ne bũmb nins sẽn yaa neer zãng n zems pẽgrã yelle.

⁹Maan-y bũmb nins yãmb sẽn zãms la y reege, la y wʋm la y yã mam nengẽ wã. La Wẽnnaam sẽn yaa laafɩ soabã na zĩnd ne yãmba.

¹⁰Mam maana sũ-noog Zu-soabã tũudum pʋgẽ, m sẽn yã tɩ yãmb leb n geta mam yell moasã wã yĩnga. Sɩdã, yãmb da tagsda mam yelle, la y ka paam weer n maan bũmb ye.

¹¹Ka mam sẽn ka tar bũmbã yĩng la m sẽn gomd a woto wã ye, tɩ bõe mam zãmsame tɩ maan sũ-noog ne bũmb ning mam sẽn tarã bala.

¹²Mam miime tɩ vɩɩmd naong pʋga, la m miime tɩ vɩɩmd arzɛk pʋg me. Bũmba fãa pʋga, la zĩiga fãa mam zãmsame tɩ rɩ n tɩge la tɩ gãand kom me. Mam zãmsame tɩ paam wʋsgo la tɩ konge.

¹³Kiris sẽn kõt maam b pãngã yĩnga, mam tõe n maana fãa.

¹⁴La baoosgo, yãmb maana neer y sẽn sõng maam m yel-pakrã pʋgẽ wã.

¹⁵Filip nebã, yãmb mens tẽrame tɩ koe-noogã mooneg sɩngrẽ, mam sẽn wa n yit Masedoannã, sã n ka yãmb bala, Kiris tẽedbã sẽn be zĩig ba a yembr ka naag maam m paoong pʋgẽ wall m naong pʋgẽ ye.

¹⁶Yaa yãmb bal n maan a woto. Bala, mam sẽn da be Tesalonikã yãmb da zoe n tʋma sõngr sẽn yɩɩd vugr n kõ maam.

¹⁷Ka tɩ mam baooda kũun ye, mam sẽn baood bũmb ninga yaa tɩ yãmb wom biis wʋsgo. Rẽnda n na n yɩ yãmb yõodo.

¹⁸Mam deega fãa la m tara wʋsgo. Mam sẽn deeg bũmb nins yãmb sẽn tʋm a Epafordit t'a kõ maamã, mam tarame tɩ sek n gɩmbe. Kũun-kãens yaa wa kaam sẽn tar yũ-noogo, la maoong Wẽnnaam sẽn deegda la sẽn tat bãmb yam.

¹⁹Mam Wẽnnaam na kõ yãmb bũmb fãa tɩ sek-yã wa sẽn zems bãmb arzeg-kãsemsã a Zeezi Kiris maasem yĩnga.

²⁰Bɩ tõnd ba a Wẽnnaam paam waoogr daar fãa, wakat sẽn ka sɛta. Ãmina.

²¹Pʋʋs-y Wẽnnaam nebã fãa sẽn tũud a Zeezi Kirisã. Ba-biis nins sẽn be ne maamã pʋʋsda yãmba.

²²Wẽnnaam nebã fãa pʋʋsda yãmba, la neb nins sẽn be Sezaar zakẽ wã n toond yãmb b pʋʋsem n yɩɩda.

²³Bɩ Zu-soab a Zeezi Kiris barkã zĩnd ne yãmb fãa.