Read SEBR SÕNGO, 1998 Koloos‑rãmba 3 Bible Online

Koloos‑rãmba 3 - SEBR SÕNGO, 1998 bible

Koloos‑rãmba 3

¹Dẽ, sã n yaa tɩ yãmb naaga ne Kirisã, n vʋʋge, bɩ y bao bũmb nins sẽn be arzãna, zĩig ning Kiris sẽn zao Wẽnnaam dɩtgã.

²Tags-y bũmb nins sẽn be arzãnã yelle, la y ra tags bũmb nins sẽn be dũni zugã yell ye.

³Bala, yãmb kiime, la yãmb vɩɩmã solga ne Kirisã Wẽnnaam nengẽ.

⁴Kirisã sẽn yaa yãmb vɩɩmã sã n wa n puki, dẽ, yãmb me na n naaga bãmb b ziirã pʋgẽ n puki.

⁵Dẽ wã yĩnga, kɩt-y tɩ y dũni ka yalẽ wã ki. Yaa yoobo, tʋʋm-rẽgdo, wẽng maaneg ratem, datem wẽnse, la rat-wʋsgo, sẽn yaa wa wẽn-naands pʋʋsgo.

⁶Yaa rẽnda yĩng la Wẽnnaam sũ-puugr wat kɩɩsdbã zutu.

⁷Yãmb sẽn dag n vɩ yel-wẽn-kãens pʋgã, yãmb dag n maanda bõn-kãense.

⁸La moasã, bɩ yãmb me kɩɩs bõn-kãensã fãa: Yaa sũ-kãbre, pʋ-toogo, tẽn-kãnem la gom-dẽgd sẽn tõe n yi yãmb noorẽ wã.

⁹Da yag-y taab zĩrẽ ye. Bala, yãmb yeega y yalẽ-kʋdgã ne a tʋʋma,

¹⁰la y yelg yalẽ paalga. Wẽnnaam palemda yalẽ-paalgã bãmb sẽn naanã, n kɩtdẽ t'a wẽnegd bãmb a Wẽnnaam n paasdẽ, tɩ tõnd tõe n bãng bãmb zãnga.

¹¹Yel-kãngã pʋgẽ, ka be tɩ yaa Gɛrke, wall Zʋɩf wall zũnga, wall moaaga, wall weoog neda, wall nin-zẽmba, wall yamba, wall burkĩn ye. La Kiris yaa fãa nebã fãa pʋse.

¹²Dẽ wã yĩnga, yãmb sẽn yaa Wẽnnaam nin-tũusdsi, la neb sẽn welg toorã, la neb Wẽnnaam sẽn nong wʋsgã, bɩ y yeelg nimbãan-zoeer meng-menga, la sõmblem, la sik-m-menga, la sũ-bʋgsem, la sũ-mar wa futu.

¹³Tʋk-y taab zɩɩbo, la y maan taab sugri. Ned sã n tar yell ne a to, bɩ a maan a soab sugr wa Kiris sẽn maan yãmb sugrã.

¹⁴La sẽn yɩɩd fãa, bɩ y nong taab bala, tɩ nonglem yaa loɛtg sɩd-sɩda.

¹⁵Bɩ Kiris laafɩ, b sẽn bool yãmb a pʋgẽ tɩ y yɩ yĩng a yembrã soog yãmb sũyã. Yɩ-y neb sẽn mi y zaamẽ.

¹⁶Bɩ Kiris goamã zĩnd yãmb pʋsẽ ne yõod ning sẽn be a pʋgẽ wã. Zãms-y taab la y keoog taab ne yam meng-menga, ne yɩɩn-sõamyã, la Wẽnnaam yɩɩla, la yɩɩl Sɩɩg-sõng sẽn kõta. Yɩɩl-y bark pʋʋsg yɩɩl ne y sũyã fãa n pẽg Wẽnnaam.

¹⁷Bũmb ning fãa yãmb sẽn maanda, sã n yaa goam pʋga wall tʋʋm pʋga, maan-y fãa ne Zu-soab a Zeezi yʋʋre, n pʋʋs ba a Wẽnnaam bark a Zeezi maasem yĩnga.

¹⁸Pagba, bɩ yãmb ned kam fãa sak a sɩda, wa sẽn zems sẽn tog n yɩ to-to Zu-soaba tũudum pʋgẽ wã.

¹⁹Pʋg-sɩdbã, bɩ yãmb ned kam fãa nong a paga, la y ra maan gãgs ne-a ye.

²⁰Kamba, sak-y y ba-rãmb ne y ma-rãmb bũmb fãa pʋgẽ, bala, bõn-kãng nooma Zu-soaba sũuri.

²¹Ba-rãmba, da maan-y tɩ y kambã sũy yiki, tɩ b raood wa n boog ye.

²²Tʋmtʋmdba, sak-y y dũni zu-soben-dãmbã bũmb fãa pʋgẽ. Da sak-y bãmb b nifẽ bala, tɩ wẽnd wa yãmb baood n maana sẽn noom ninsaalb ye. Sak-y bãmb ne y sũyã fãa, Zu-soabã zoees pʋgẽ.

²³Yãmb sẽn maand bũmb ning fãa, bɩ y maan-a ne y sũur fãa wa y sẽn maand Zu-soabã yĩnga, la ka ninsaalb yĩng ye,

²⁴yãmb sẽn mi tɩ y na n deega pʋɩɩr Zu-soabã nengẽ tɩ yɩ y keoorã yĩnga. Sɩd me, yaa Kiris sẽn yaa Zu-soabã yĩng la yãmb tʋmda.

²⁵Bala, ned ning sẽn tʋmd sẽn ka zems na n wʋka a ka-tɩrlmã yaoodo, bala, Wẽnnaam ka bakd neb ye.