Read SEBR SÕNGO, 1998 A Zozoe 10 Bible Online

A Zozoe 10 - SEBR SÕNGO, 1998 bible

A Zozoe 10

¹Zeruzalɛm dĩm a Adoni-Sedɛk wʋmame t'a Zozoe tõoga Ayi n sãam-a zãnga, n menes-a ne a rĩmã wa a sẽn dag n maan Zeeriko ne a rĩmã to-to wã. A leb n wʋmame tɩ Gabawõ nebã yõga zood ne Israyɛll nebã n vɩ b sʋka.

²Dẽ, rabeem-kãseng yõka yẽnda, bala, Gabawõ rag n yaa tẽn-kãseng wa rĩm-dãmb tẽmse. A rag n yaa tẽn-kãseng n yɩɩd Ayi tẽngã menga, la a nebã fãa yaa nin-wobdo.

³Zeruzalɛm dĩm a Adoni Sedɛk yeela Ebrõ rĩm a Hokam ne Yarmut rĩm a Piram, ne Lakiis rĩm a Yafiya, ne Eglõ rĩm a Debɩɩr yaa:

⁴«Wa-y n sõng-y maam tɩ d kẽng n tɩ zab ne Gabawõ nebã, bala, b kẽng n tɩ yõga zood ne a Zozoe ne Israyɛll nebã.»

⁵Dẽ, Amoor-dãmbã rĩm-dãmb a nu wã lagma taaba: Yaa Zeruzalɛm dĩmã, Ebrõ rĩmã, Yarmut rĩmã, Lakiis rĩmã, ne Eglõ rĩmã. Bãmb yii ne b tãb-biisã fãa n tɩ tilg b tãb-sikã Gabawõ tẽngã noor n na n zab ne-ba.

⁶La Gabawõ nebã tʋmame tɩ b kẽng sikã zĩigẽ Gilgall n tɩ yeel a Zozoe yaa: «Da bas-y y tʋmtʋmdbã ye. Wa-y tao-tao n wa fãag-do, sõng-y-do. Bala, Amoor-dãmbã rĩm-dãmbã fãa sẽn be tãmsã sʋkã tigma taab n dat n zab ne tõndo.»

⁷A Zozoe yii Gilgall ne a tãb-biisã fãa, ne yẽnda gãndaadã n tũ taab n kẽnge.

⁸Sẽn-Ka-Saab yeela a Zozoe yaa: «Ra zoe-b lɛlɛ ye. Bala, mam na n kɩtame tɩ f tõog-ba, la b ned ba a ye kõn tol n tõog n teeg a yãoog fo taoor ye.»

⁹A Zozoe yii Gilgall n kẽn yʋngã tõre. La a tɩ ling-b lame.

¹⁰Sẽn-Ka-Saab kɩtame tɩ Israyɛll nebã rig-b tɩ b zoe. Bãmb tõog-b-la ne pãng Gabawõ sɛɛga, la b rig-b lame n dɩk sor ning sẽn teesd Bɛt-Horon tãngã rʋʋdgã, n kʋ-b hal n tɩ ta Azɛka ne Makeda.

¹¹Israyɛll nebã sẽn wa n digd Amoor-dãmbã tɩ b zoetẽ wã, b sẽn wa n ta Bɛt-Horon tãngã sigdgã, Sẽn-Ka-Saab kɩtame tɩ sapɩlem bɛd-bɛd yi yĩngr n lʋɩ n pãb bãmb n tɩ tãag Azɛka, la b kiime. Neb nins sapɩlmã sẽn kʋ wã sõor yɩɩda Israyɛll nebã sẽn kʋ-b rãmb ne zabr sʋʋgã.

¹²Dẽ, daar ning Sẽn-Ka-Saab sẽn kɩt tɩ Israyɛll nebã tõog Amoor-dãmbã, a Zozoe goma ne Sẽn-Ka-Saab Israyɛll nebã nifẽ n yeel yaa: «Wĩntoogã, yals Gabawõ zugẽ! Kiuugã, fo me yals Ayalõ longẽ wã.»

¹³La wĩntoogã ka serg a zĩigẽ ye, la kiuugã me yalsame, hal tɩ nebã rok b sũur ne b bɛɛbã. B gʋlsa a woto nin-tɩrg sebrẽ wã: Wĩntoogã yalsa sa-gãongã sʋk n kaoos sẽn kolg daar tõre, n ka kẽ ye.

¹⁴Daar sẽn wẽnd woto dag n nan zɩ n zĩnd ye. A buud ka zĩnd sẽn deng rẽndã, wall rẽ loogr poore, tɩ Sẽn-Ka-Saab sak ninsaal noor a woto ye. Bala, yaa Sẽn-Ka-Saab n dag n zabd n sõngd Israyɛll nebã.

¹⁵A Zozoe ne Israyɛll nebã fãa lebg n leba b sikã zĩigẽ Gilgalle.

¹⁶La mikame tɩ rĩm-dãmb a nu wã zoeeme n tɩ soond tãng bokẽ Makeda.

¹⁷B tɩ togsa a Zozoe tɩ rĩm-dãmb a nu wã tɩ soonda tãng bokẽ Makeda.

¹⁸A Zozoe yeelame: «Bilm-y kug-bɛd n pag bokã noore, la y yãk neb n ning be tɩ b gũ-a.

¹⁹La bɩ yãmb da yals ye. Pʋgl-y y bɛɛbã, n gɩdg-ba, tɩ b ra tõog n kẽ b tẽmsẽ wã ye. Bala, Sẽn-Ka-Saab sẽn yaa yãmb Wẽnnaamã ning-b-la yãmb nusẽ.»

²⁰A Zozoe ne Israyɛll nebã zaba ne pãng hal n tõog n kʋ-b zãnga. La ned ka kell ye. Yaa neb kẽer sẽn zoe n paam n tɩ kẽ tẽms sẽn gũbg ne lalsã pʋgã bal n põse.

²¹Israyɛll nebã fãa lebg n wa a Zozoe nengẽ Makeda sik zĩigẽ wã ne laafɩ, tɩ ned baa a yembr ka saag n gom Israyɛll nebã wẽng ye.

²²A Zozoe yeelame yaa: «Pak-y tãngã bok noor n yiis rĩm-dãmb a nu wã n wa kõ-ma.»

²³Woto, b yiisa rĩm-dãmb a nu wã tãngã bokẽ n tɩ kɩs a Zozoe. Yaa Zeruzalɛm dĩmã, Ebrõ rĩmã, Yamut rĩmã, Layiis rĩmã ne Eglõ rĩmã.

²⁴La b sẽn yiis rĩm-dãmb a nu wã n tall-b n kẽngã, yẽnda boola Israyɛll nebã fãa, n yeel tãb-biis nanambs nins sẽn dag n tũ yẽnda wã yaa: «Kolg-y-yã! Tabg-y nanambs a nu wã yubli ne y naoore.» B kolgame n tabg b yubli wã.

²⁵La a Zozoe yeela bãmb yaa: «Da zoe-y rabeem la y ra yɛɛs ye! Keng-y y mense, la y paam raoodo. Bala, Sẽn-Ka-Saab na n maana yãmb bɛɛb nins fãa y sẽn zab ne wã a woto.»

²⁶Dẽ poore, a Zozoe kʋʋ rĩm-dãmbã. Yẽnda kɩtame tɩ b luul-b tɩɩs a nu zutu, la b bas-b-la tɩɩsã zut hal tɩ ta zaabre.

²⁷Wĩndgã sẽn wa n kolg kõom, a Zozoe kɩtame tɩ b sik-b tɩɩsã zutu, n tall b kũumã n tɩ lob bok ning bãmb sẽn dag n zoe n tɩ soondã pʋga, n bilim kug-bɛd n pag bokã noore. La kugã ket n bee be hal tɩ ta rũndã.

²⁸Badaar bala, a Zozoe tõoga Makeda tẽngã, n kʋ a nebã ne b rĩmã ne zabr sʋʋga. Yẽnda kʋʋ nebã fãa ne neb nins fãa sẽn dag n be tẽngã pʋgẽ be wã, n ka bas tɩ ned ba a yembr põs ye. Yẽnda maana Makeda rĩmã wa yẽnda sẽn dag n maan Zeeriko rĩmã to-to wã.

²⁹A Zozoe ne Israyɛll nebã tũu taab n kẽng Libna n tɩ zab ne Libna nebã.

³⁰Sẽn-Ka-Saab kɩtame tɩ Israyɛll nebã tõog Libna nebã ne b rĩmã n kʋ-b ne zabr sʋʋga, la b kʋ neb nins fãa sẽn dag n be tẽn-kãngã fãa. Bãmb ka bas ned ba a yembr tɩ põs ye. Yẽnda maana Libna rĩmã wa yẽnda sẽn dag n maan Zeeriko rĩmã to-to wã.

³¹A Zozoe ne Israyɛll nebã tũu taab n yi Libna n kẽng Lakiisi. Bãmb tɩ tilga b sik zĩigã Lakiis neng-taoorã n na n zab ne-a.

³²Sẽn-Ka-Saab ninga Lakiis Israyɛll nebã nugẽ n kɩt tɩ b tõog-a rasem a yiibã daare, n kʋ b nebã fãa, ne neb nins fãa sẽn dag n be tẽnga pʋgã ne zabr sʋʋga, wa bãmb sẽn dag n maan Libna to-to wã.

³³La Gezɛɛr rĩm a Horam yikame n na n sõng Lakiis rĩmã. La a Zozoe kʋʋ yẽnda ne a nebã zãnga, n ka bas tɩ ned baa a yembr põs ye.

³⁴A Zozoe ne Israyɛll nebã tũu taab n yi Lakiis n kẽng Eglõ. Bãmb tɩ tilga b sik zĩigã Eglõ neng-taoorã n na n zab ne-a.

³⁵La b tõoga Eglõ badaar bala, n kʋ a nebã ne neb nins fãa sẽn dag n be tẽngã pʋgã ne zabr sʋʋga. A Zozoe sãama tẽngã zãng badaar wa a sẽn dag n maan Lakiis to-to wã.

³⁶A Zozoe ne Israyɛll nebã fãa tũu taab n yi Ɛglõ n kẽng Ebrõ n tɩ zab ne-a.

³⁷Bãmb tõog-a lame n kʋ a nebã ne zabr sʋʋga. Yẽnda kʋʋ tẽngã nebã, ne a rĩmã, la b sãam a tẽn-bãoonegã sẽn gũbg-a wã fãa. La b kʋ neb nins fãa sẽn dag n be tẽn-kãng pʋgã, wa b sẽn maan Eglõ to-to wã. A Zozoe ka bas ned baa a yembr tɩ põs ye. A sãama b fãa, ne neb nins sẽn dag n be beenẽ wã.

³⁸A Zozoe ne Israyɛll nebã wẽnemdame n kẽng n tɩ zab ne Debɩɩre.

³⁹Bãmb tõoga Debɩɩr tẽngã ne a rĩmã, ne tẽn-bãooneg nins fãa yẽnda sẽn so wã. Israyɛll nebã kʋʋ Debɩɩr nebã ne zabr sʋʋga, baa ne neb nins fãa sẽn dag n be tẽngã pʋgẽ wã, n ka bas ned ba a yembr tɩ põs ye. A Zozoe maana Debɩɩr tẽngã ne a rĩmã wa yẽnda sẽn dag n maan Ebrõ la Libna neb rĩm-dãmbã to-to wã.

⁴⁰A Zozoe tõogã kɩren-kãng tẽmsã. Yaa tẽms nins sẽn be tãms sʋkã, ne sẽn be-b Negɛɛvã, la sẽn be-b kunkubã sʋkã, ne b rĩm-dãmbã. Bãmb ka bas ned ba a yembr tɩ põs ye, la b sãama bũmb ning fãa sẽn vʋʋsd ne yõore, wa Sẽn-Ka-Saab sẽn yaa Israyɛll Wẽnnaamã sẽn dag n yeelã.

⁴¹A Zozoe tõog n deega tẽmsã fãa, sẽn sɩng ne Kadɛɛs Barneya n tɩ ta Gaaza ne Gosɛn hal n tɩ tãag Gabawõ.

⁴²A Zozoe tõoga rĩm-dãmb-kãens ne b tẽmsã wakat a ye pʋgẽ. Bala, Sẽn-Ka-Saab sẽn yaa Israyɛll Wẽnnaamã rag n zabd n sõngda Israyɛlle.

⁴³A Zozoe ne Israyɛll nebã tũu taab n lebg n leb b sikã zĩigẽ Gilgalle.