Read SEBR SÕNGO, 1998 A Zozoe 11 Bible Online

A Zozoe 11 - SEBR SÕNGO, 1998 bible

A Zozoe 11

¹Hasoor dĩm a Zabẽ sẽn wʋm bõn-kãense, yẽnda tʋma neb Madõ rĩm a Yokaab nengẽ, ne Simron dĩmã nengẽ, la Akaf rĩmã nengẽ,

²ne rĩm-dãmb nins sẽn be rɩtg kɩrengã sẽn be tãmsẽ wã, la sẽn be-b Araba tẽn-nabdrẽ wã, la sẽn be Kinerɛt ko-kãsengã goabgã, ne sẽn be-b kunkubã sʋkã, la sẽn be-b Door tẽngã nin-taoorã,

³la Kana neb nins sẽn be-b yaang la taoorã nengẽ, la Amoor-dãmbã nengẽ, la Hɛt-rãmbã nengẽ, la Ferɛɛz rãmbã nengẽ, la Zebuus-rãmbã sẽn be tãngã zugã nengẽ, la Hevi-rãmbã sẽn be Hɛrmo tãngã pendã, Mispa tẽngã nengẽ.

⁴Rĩm-dãmb-kãens naaga taab n yi ne b tãb-biisã fãa, n yaa wʋsg wa bĩisrã sẽn be ko-kãsengã noorã, tɩ ka tõe n sõd n sɛ ye. La b waa ne wiidi, la zabr saar-dãmb wʋsgo.

⁵Rĩm-dãmb-kãens zemsa taaba, n wa tilg b tãb-sikã Merom koomã sɛɛga, n na n zab ne Israyɛll nebã.

⁶Sẽn-Ka-Saab yeela a Zozoe yaa: «Da zoe-b ye. Bala, beoog woto wẽnde, mam na n ning-b-la yãmb nugẽ n kɩt tɩ y kʋ-b zãnga. Bɩ f kɛ b wiidã nao-gĩin n pase, la y yõog b zabr saar-dãmbã bugum.»

⁷A Zozoe ne a tãb-biisã wa n linga b bɛɛbã Merom kooma sɛɛgẽ n zab ne-ba.

⁸Sẽn-Ka-Saab kɩtame tɩ Israyɛll nebã tõog-ba. B kʋ-b lame n dig-b n tɩ ta Sɩdõ kãsengẽ wã, hal n tɩ tãag Misrefot-mayim, n tɩ tãag Mispa longã sẽn dabd yaangã sẽnẽ. Israyɛll nebã kʋʋ bãmb n ka bas tɩ ned ba a yembr põs ye.

⁹A Zozoe maana bãmb wa Sẽn-Ka-Saab sẽn dag n yeel yẽnda t'a maan-b to-to wã. Yẽnda kɛɛ wiidã nao-gĩin n pase, la a yõog b zabr saar-dãmbã bugum.

¹⁰Badaare, a Zozoe sẽn yi beenẽ n lebgdẽ, bãmb tees n wẽe Hasoor n deege, n kʋ a rĩmã ne zabr sʋʋga. Hasoor n dag n yaa soolem-kãens fãa na-tẽnga.

¹¹B kʋʋ bãmb fãa ne zabr sʋʋga, la b sãam neb nins fãa sẽn dag n be tẽngã pʋgã, n ka bas ned ba a yembr tɩ põs ye. La b yõoga Hasoor tẽngã bugum.

¹²A Zozoe tõoga tẽn-bãmb fãa ne b rĩm-dãmbã n kʋ ne zabr sʋʋga. Yẽnda sãama b fãa wa Sẽn-Ka-Saab tʋmtʋmd a Moyiis sẽn dag n yeel yẽnda wã.

¹³Israyɛll nebã ka tol n yõog tẽms nins sẽn be kunkubã zutã ba a yembre, sã n ka a Zozoe sẽn yõog Hasoor tẽngã bugmã bala.

¹⁴Israyɛll nebã wʋka tẽn-bãmb paoongã fãa ne b rũmsã n sooge. La b kʋʋ nebã fãa ne zabr sʋʋg n ka bas ned baa yembr tɩ vɩɩmd ye.

¹⁵Sẽn-Ka-Saab sẽn dag n yeel b tʋmtʋmd a Moyiis bũmb ningã, a Moyiis togs-a-la a Zozoe, la a Zozoe maana wa b sẽn yeel yẽnda wã. A Zozoe ka bas bũmb ning Sẽn-Ka-Saab sẽn wilg a Moyiisã tɩ vaal ye.

¹⁶Woto, a Zozoe reega tẽn-kãensã fãa: Tãngã ne Negɛɛv fãa, la Gosɛn tẽngã zãnga, la kunkubã ne Araba tẽn-nabdrã, la Israyɛll tãngã ne a tãmsã sigdsã fãa.

¹⁷Sẽn sɩng ne tãn-beellã sẽn teesd Seyɩɩr sẽnẽ hal tɩ ta Baall-Gaad sẽn be Libã, Ɛrmon tãngã pendã, a Zozoe reega bãmb fãa. A Zozoe tõoga tẽn-bãmb rĩm-dãmbã, n kʋ-ba.

¹⁸A Zozoe zaba ne rĩm-dãmb-kãens n kaoos wʋsgo.

¹⁹Tẽng ba a yembr ka zĩnd sẽn dag n dat n bao laafɩ ne Israyɛll nebã ye, sã n ka Hɛt nebã sẽn dag n be Gabawõ wã bala. Israyɛll zaba ne zabr sʋʋg n deeg b fãa.

²⁰Bala, yaa Sẽn-Ka-Saab n kɩt tɩ b riglim b sũyã n na n zab ne Israyɛlle, sẽn na n yɩlẽ tɩ Israyɛll nebã sãam-b zãng n ka zoe b nimbãanega, n menes-b wa Sẽn-Ka-Saab sẽn dag n yeel a Moyiisã.

²¹Wakat-kãens bala, a Zozoe kẽngame n tɩ zab ne Anak-rãmbã sẽn dag n be Ebrõ tãngã, Debɩɩr tãngã, Anaab tãngã, ne tãms nins fãa sẽn be Zʋʋda, la Israyɛll tãmsã fãa, a Zozoe sãama bãmb fãa ne b tẽmsã.

²²Anak-rãmba ned baa a yembr ka kell Israyɛll nebã tẽngẽ ye. Yaa b neb nins sẽn dag n be Gaaza, Gate ne Asdoodã bal n kelle.

²³Dẽ, a Zozoe tõog n deega tẽngã gill wa Sẽn-Ka-Saab sẽn dag n yeel a Moyiisã. La a Zozoe rɩka tẽngã n pʋɩ n kõ Israyɛll nebã wa sẽn zems b buudã sõore. La tẽngã zĩnda bãane, tɩ zabr ka leb n beẽ ye.