Read SEBR SÕNGO, 1998 A Zozoe 12 Bible Online

A Zozoe 12 - SEBR SÕNGO, 1998 bible

A Zozoe 12

¹Ad tẽngã rĩm-dãmb nins Israyɛll nebã sẽn tõog n kʋ n deeg b tẽmsã Zʋrdẽ kʋɩlgã yaangã, sẽn sɩng ne Arno ko-soogã hal n tɩ tãag Hɛrmo tãngã ne Araba tẽn-nabdrã zãng sẽn dabd yaangã.

²Amoor-dãmbã rĩm a Sihon sẽn dag n be Hɛsbonnã, n dag n so Arowɛɛr sẽn be Arno ko-soogã noorã, la sẽn sɩng ne Galaad tẽngã pʋɩ-sʋka, hal n tɩ tãag Yabok ko-soogã sẽn yaa Amoor-dãmbã toadgã,

³n paas ne Araba tẽn-nabdrã, Kinerɛt ko-kãsengã sẽn be yaangã, n tãag Araba ko-kãsengã sẽn yaa yamsem ko-kãsengã sẽn be yaangã n teesd Bɛt-Yesimot sẽnẽ, ne sẽn dabd goabgã, n sigd n dabd Pisga sigdgã sẽnẽ.

⁴Rĩm a to sẽn põs yaa Basan rĩm a Oog sẽn be Refayim soolmã sẽn be Astarot ne Edreyi wã.

⁵Rĩm-kãng rag n soo tãng ning sẽn boond tɩ Hɛrmo wã, ne Salka la Basan gillã fãa n tall n tɩ tãag Gesʋʋr dãmbã ne Maaka rãmbã tẽnga, ne Galaad pʋɩ-sʋkã sẽn yaa Hɛsbon rĩm a Sihon toadgã.

⁶Sẽn-Ka-Saab tʋmtʋmd a Moyiis ne Israyɛll nebã kʋʋ bãmb fãa, n dɩk b tẽngã n kõ Rubɛn buudã, Gaad buudã ne Manaase buudã pʋɩ-sʋka.

⁷Moasã, ad tẽngã rĩm-dãmb nins a Zozoe ne Israyɛll nebã sẽn tõog Zʋrdẽ nin-taoor rʋʋndã, yaa sẽn sɩng ne Baall-Gaad sẽn be Libã tãn-longẽ wã, n tall n tɩ tãag Tãn-Beellã sẽn teesd Seyɩɩr sẽnẽ wã. A Zozoe rɩka tẽn-kãens n kõ Israyɛll nebã wa sẽn zems b buudã sõorã sẽn yaa to-to wã.

⁸Yaa tãngã zugã ne kunkubã la Araba tẽn-nabdrẽ wã, la tãngã sigdgẽ wã, ne sẽn teesd weoogã la Negɛɛve, ne Hɛt-rãmbã, la Amoor-dãmbã ne Kana-rãmbã, la Ferɛɛz rãmbã, ne Hevi-rãmbã, n paas Zebuus-rãmbã tẽmsã.

⁹Rĩm-dãmb nins b sẽn tõogã yaa Zeeriko rĩmã, Ayi sẽn pẽ Betɛllã rĩmã,

¹⁰yaa Zeruzalɛm rĩmã, Ebrõ rĩmã,

¹¹Zarmut rĩmã, Lakiis rĩmã,

¹²Eglõ rĩmã, Gezɛɛr rĩmã,

¹³Debɩɩr dĩmã, Gedɛɛr rĩmã,

¹⁴Horma rĩmã, Araad rĩmã,

¹⁵Libna rĩmã, Adulam rĩmã,

¹⁶Makeda rĩmã, Betɛll rĩmã,

¹⁷Tapuwa rĩmã, Hefɛɛr dĩmã,

¹⁸Afɛk rĩmã, Lakarõ dĩmã,

¹⁹Madõ rĩmã, Hasoor rĩmã,

²⁰Simron-Meron rĩmã, Aksaf rĩmã,

²¹Taanak rĩmã, Megido rĩmã,

²²Kedɛɛs rĩmã, Zokneyam rĩmã, Karmell rĩmã,

²³Door sẽn be Door soolmẽ wã rĩmã, Goyim sẽn pẽ Gilgallã rĩmã,

²⁴Tirtsa rĩmã. Rĩm-dãmbã fãa sõor yaa rĩm-dãmb pis-tã la a yembre.