Read SEBR SÕNGO, 1998 A Zozoe 13 Bible Online

A Zozoe 13 - SEBR SÕNGO, 1998 bible

A Zozoe 13

¹A Zozoe rag n kʋʋla wʋsgo. Dẽ, Sẽn-Ka-Saab yeel-a lame yaa: «Fo lebga nin-kẽema, fo kʋʋla wʋsgo, la tẽms nins sẽn ket yãmb sẽn tog n deegã yaa wʋsgo.

²Ad tẽms nins sẽn ket yãmb sẽn tog n deegã: Yaa Filistẽ-dãmbã sẽn so wã fãa, ne Gesʋʋr dãmbã soolem zãnga.

³Sẽn sɩng ne Sɩhoor kʋɩlgã sẽn zoet n dabd Ezɩptã hal n tãag Ekrõ sẽn be rɩtgã, bãmb fãa rag n yaa Kana-rãmbã n so-ba. La b lebga Filistẽ-dãmbã rĩm-dãmb a nu wã soolem: yaa Gaaza, Asdoode, Askalon, Gate, ne Ekrõ rĩmã, n paas ne Ave-rãmbã.

⁴Sẽn sɩng ne goabgã, yaa Kana-rãmba tẽng zãnga, ne Meytara sẽn yaa Sɩdõ nebã soolmã, hal n tãag Afɛke, n tɩ ta Amoor-dãmbã tẽng toadga,

⁵la ne Geball rãmbã tẽnga, ne Libã yaang tẽmsã, sẽn sɩng ne Baall-Gaad sẽn be Hɛrmo tãngã pendã n tɩ tãag Hamat tẽngã noore,

⁶n paas neb nins sẽn be-b tãmsã zutã, sẽn sɩng ne Libã n tɩ tãag Misrefot-Mayim, ne tẽms nins fãa Sɩdõ nebã sẽn so wã. Mam na n deesa tẽn-bãmbã fãa tɩ yɩ Israyɛll nebã pʋɩɩre. La bũmb sẽn be bala, pʋɩ tẽngã n kõ Israyɛll nebã tɩ yɩ b pʋɩɩre wa mam sẽn dag n yeel foomã.

⁷Moasã, bɩ f pʋɩ-a n kõ Israyɛll buud a wɛ wã ne Manaase buudã pʋɩ-sʋkã.»

⁸Manaase buudã pʋɩ-sʋk a yembrã, ne Rubɛn buudã la Gaad buudã rag n zoe n deega b zĩis Zʋrdẽ kʋɩlgã yaanga, wa Wẽnnaam tʋmtʋmd a Moyiis sẽn dag n kõ-bã.

⁹Yaa sẽn sɩng ne Arowɛɛr sẽn be Arno ko-soogã noorã, la ne tẽng ning sẽn be longã pʋgẽ wã, n paas Medeba tẽn-nabdrã hal n tãag Dibõ.

¹⁰Yaa sẽn naag ne Amoor-dãmbã rĩm a Sihon tẽmsã fãa. Rĩm-kãng rag n dɩta naam Hɛsbon, la a so tẽngã hal n tɩ tãag Amo-rãmbã toadga,

¹¹n paas Galaad sẽn yaa Gesʋʋr dãmbã ne Maaka rãmbã soolmã, ne Hɛrmo tãngã zug rãmbã ne Basan gillã fãa n tɩ tãag Salka.

¹²Tẽn-kãens yaa rĩm a Oog sẽn be Basan wã soolem. A Oog rag n soo Astarot ne Edreyi sẽn dag n yaa Refayim dãmbã yaoolem tẽngã. A Moyiis n dag n zab n tõog n dees tẽn-bãmba.

¹³La baoosgo, Israyɛll nebã ka reeg Gesʋʋr dãmbã ne Maaka rãmbã tẽms ye. Rẽ kɩtame tɩ Gesʋʋr tẽngã ne Maaka tẽngã neb ket n be Israyɛll nebã sʋk hal tɩ ta rũndã.

¹⁴Yaa Leevi buudã bal la b ka kõ tẽms tɩ yɩ b pʋɩɩre. Bãmb pʋɩɩr yaa maoong sẽn yõogd bugum Sẽn-Ka-Saab sẽn yaa Israyɛll Wẽnnaamã yĩngã, wa bãmb sẽn dag n yeel b tʋmtʋmd a Moyiisã.

¹⁵Dẽ, a Moyiis kõo Rubɛn nebã b pʋɩɩre, wa sẽn zems b roto.

¹⁶Bãmb soolmã sɩngda Arowɛɛr sẽn be Arno ko-soogã noorã, ne tẽng ning sẽn be longã pʋgẽ wã, n paas tẽn-nabdrã sẽn pẽ Medeba wã,

¹⁷n paas Hɛsbon ne a tẽn-kɩremsã fãa sẽn be tẽn-nabdrẽ wã. Yaa Dibõ, Bamot-baalle, Bɛt-baale, Meyõ,

¹⁸Yatsa, Kedmote, Mifaate,

¹⁹Kiriyatayim la Sibma ne Serɛt-Sahaar sẽn be longã pʋgẽ kunkubrã zugã,

²⁰n paas Bɛt-pewoor ne Pisga sigdsã, la Bɛt-Yesimote,

²¹n paas tẽms nins fãa sẽn be tẽn-nabdrẽ wã, n naag ne Amoor-dãmbã rĩm a Sihon sẽn dag n dɩt naam Hɛsbonnã sẽn so tẽms ninsã. A Moyiis rag n tõoga yẽnda ne a nanamb-bãoonegã fãa: Yaa Madiyã rãmbã, Evi rãmbã, Rekɛm dãmbã, Suur dãmbã, Ʋʋr dãmbã, ne Reba rãmbã, b fãa rag n yaa Sihon nanamb-bi n be tẽn-kãngã.

²²Israyɛll nebã sẽn kʋ neb nins ne zabr sʋʋgã sʋka, a Bewoor biig a Balaam sẽn yaa bagã rag n naaga be.

²³Zʋrdẽ kʋɩlgã ne a kʋɩl-koakã n dag n yaa Rubɛn nebã toadga. Ad Rubɛn nebã pʋɩɩr wa sẽn zems b roog-roogo: Yaa tẽmsã ne b tẽn-kɩremsã.

²⁴A Moyiis kõo Gaad buudã b pʋɩɩre, wa sẽn zems b rotã.

²⁵Bãmb soolmã yaa Yazɛɛre, ne Galaad tẽmsã fãa, n paas Amo-rãmbã soolem pʋɩ-sʋka, n tall n tɩ tãag Arowɛɛr sẽn teesd Raba sẽnẽ,

²⁶sẽn sɩng Hɛsbon n tɩ ta Ramat-Mitspe, ne Betonim, sẽn sɩngd ne Mahanayim n tɩ tãag Debɩɩr toadgã,

²⁷n paas ne longẽ wã, la Bɛt-Haram, ne Bɛt-Nimra, Sukote, n paas ne Safon sẽn yaa Hɛsbon rĩm a Sihon soolmã kellã, ne Zʋrdẽ kʋɩlgã ne a kɩremsã, hal n tãag Kinerɛt ko-kãsengã zãng sẽn be Zʋrdẽ kʋɩlgã rʋʋndã yaangã.

²⁸Ad pʋɩɩr ning b sẽn kõ Gaad rãmbã wa sẽn zems b roto. Yaa tẽmsã ne b tẽn-kɩremsã.

²⁹A Moyiis dag n kõo Manaase buudã pʋɩ-sʋkã b pʋɩɩre, wa sẽn zems b roto.

³⁰Bãmb soolmã toadg sɩngda Mahanayim ne Basan gillã fãa, Basan rĩm a Oog soolmã fãa, ne Yayɩɩr tẽms pis-yoobã fãa sẽn dag n be Basan soolmẽ wã.

³¹Galaad soolmã pʋɩ-sʋka, ne Astarot la Edreyi sẽn yaa Basan rĩm a Oog soolmã tẽmsã yɩ a Makɩɩr sẽn yaa a Manaase yagensã pʋɩ-sʋkã pʋɩɩre, wa sẽn zems b roto.

³²Tẽn-bãmbã yaa tẽms nins a Moyiis sẽn dag n pʋɩ Moaab tẽn-nabdrã pʋgã, Zʋrdẽ kʋɩlgã rʋʋndã, sẽn teesd yaangã, Zeeriko tẽngã sẽnẽ wã.

³³A Moyiis ka kõ Leevi buudã pʋɩɩr ye. Bala, Sẽn-Ka-Saab sẽn yaa Israyɛll Wẽnnaamã n yaa bãmb pʋɩɩre, wa Sẽn-Ka-Saab sẽn dag n yeel a Moyiis bãmb wɛɛngẽ wã.