Read SEBR SÕNGO, 1998 A Zozoe 14 Bible Online

A Zozoe 14 - SEBR SÕNGO, 1998 bible

A Zozoe 14

¹Ad Israyɛll nebã sẽn paam pʋɩɩr ning Kana tẽngã pʋga, yaa maan-kʋʋd a Eleyazaar ne a Nun biig a Zozoe ne Israyɛll rotã kãsem-dãmb n kõ-b rẽndã tɩ yɩ b pʋɩɩre.

²Bãmb maana poeer n kõ bãmb b pʋɩɩrã wa Sẽn-Ka-Saab sẽn dag n togs a Moyiis t'a kõ Israyɛll buud a wɛ wã la pʋɩ-sʋkã.

³Bala, a Moyiis rag n kõo buud a yiibã ne pʋɩ-sʋkã b pʋɩɩr Zʋrdẽ kʋɩlgã rʋʋnde. La yẽnda rag n ka kõ Leevi buudã pʋɩɩr b taabã sʋk ye.

⁴A Zozɛf kambã rag n yaa buud a yiibu: yaa a Manaase ne a Efrayiim. La b ka kõ Leevi buudã soolem tɩ yɩ b pʋɩɩr ye. B kõo bãmb tẽms tɩ b zĩnd bala, la b tõog n wãbneg b rũmsã tẽmsã pʋ-weesẽ wã, la b tõog n ges b paoongã yelle.

⁵Israyɛll nebã pʋɩɩ tẽngã wa Sẽn-Ka-Saab sẽn dag n yeel a Moyiis to-to wã.

⁶Zʋʋda nebã wa a Zozoe nengẽ Gilgalle, la Kenaaz tẽng rao a Yefune biig a Kalɛɛb yeela a Zozoe yaa: «Yãmb ket n tẽra bũmb ning Sẽn-Ka-Saab sẽn dag n gom ne Wẽnnaam dao a Moyiis Kadɛɛs-Barneya sẽn kẽed ne maam ne yãmb wɛɛngẽ wã?

⁷Wakat ning Sẽn-Ka-Saab tʋmtʋmd a Moyiis sẽn na n tʋm maam tɩ m kẽng Kadɛɛs-Barneya n tɩ soos n ges tẽngã, rẽ tɩ mam dag n tara yʋʋm pis-naase, la mam wa n togsa bãmb bũmbã fãa sẽn yɩ to-to ne pʋ-peelem.

⁸Mam ba-biis nins sẽn dag n tũ maam n kẽngã kẽesa nebã rabeem, la mam yẽ, mam kell n saka Sẽn-Ka-Saab sẽn yaa mam Wẽnnaamã zãnga.

⁹Badaare, a Moyiis wẽename n yeele: Mam wẽendame tɩ tẽng ning fo naoorã sẽn tabgã na n yɩɩ foom ne f kambã pʋɩɩre, wakat sẽn kõn sa yĩnga, fo sẽn sak Sẽn-Ka-Saab sẽn yaa mam Wẽnnaamã zãngã yĩnga.

¹⁰La moasã, Sẽn-Ka-Saab kõo maam yõ-woko, wa bãmb sẽn dag n yeelã. Yaa yʋʋm pis-naas la a nu sẽn looge, la Sẽn-Ka-Saab rag n gom a woto ne a Moyiisi, wakat ning Israyɛll nebã sẽn dag n ket n be weoogã pʋg n kẽndã. La rũndã-rũndã wã, mam tara yʋʋm pis-nii la a nu.

¹¹La mam ket n tara pãng wa wakat ning a Moyiis sẽn wa n tʋm maamã. Mam ket n tara pãng wa wakat-kãngã, n tõe n kẽng zabre, n kẽng la m lebg n wa.

¹²Dẽ wã, bɩ y kõ maam tãng ning Sẽn-Ka-Saab sẽn dag n gom a yell badaarã. Bala, yãmb wʋma b sẽn yeel tɩ yaa Anak yagensã n be beenẽ, la b tara tẽms sẽn tar pãngã. Sẽn-Ka-Saab sã n zĩnd ne maam, mam na n diga bãmb n deeg b tẽngã, wa Sẽn-Ka-Saab sẽn dag n yeelã.»

¹³A Zozoe ninga a Yefune biig a Kalɛɛb zug barka, n dɩk Ebrõ n kõ-a t'a sooge.

¹⁴Yaa woto n kɩte, t'a Yefune biig a Kalɛɛb ne Kenaaz yagensã ket n so Ebrõ tɩ yaa b pʋɩɩr hal tɩ ta rũndã. Bala, b saka Sẽn-Ka-Saab sẽn yaa Israyɛll Wẽnnaamã zãnga.

¹⁵Wakat sẽn looge, b rag n boonda Ebrõ tɩ Arba tẽnga. Anak nebã fãa sʋka, a Arba n yɩ bãmb nin-wobg n yɩɩd nebã fãa.