Read SEBR SÕNGO, 1998 A Zozoe 16 Bible Online

A Zozoe 16 - SEBR SÕNGO, 1998 bible

A Zozoe 16

¹Zĩis nins b sẽn yãk n kõ a Zozɛf kambã sɩngda ne Zʋrdẽ kʋɩlgã sẽn pẽ Zeeriko wã, n dabd Zeeriko ko-bundsã yaangã, n tũud weoogã n yit Zeeriko n dʋʋd Betɛll tãngã sẽnẽ.

²Toadgã yii Betɛll n dabd Luuzi, n pɩʋʋgd Ark rãmbã ne Atarot rãmbã toadg sẽnẽ.

³La toadgã wẽnemdame n dabd nin-taoore n teesd Yaflɛt rãmbã toadg sẽnẽ, n tɩ tãag Bɛt-Horon longã, n sigd n dabd Gezɛɛr n tɩ yek ko-kãsengã.

⁴Rẽndã yɩ a Zozɛf kamb a Manaase ne a Efrayiim pʋɩɩre.

⁵Ad a Efrayiim kambã toadga, wa sẽn zems b rotã. Bãmb soolmã toadg sɩngda nin-taoore, Atrot-Adaare, hal n tãag Bɛt-Horon zugẽ.

⁶Toadgã yekda sẽn dabd nin-taoor sẽnẽ, n tall n tɩ tãag Mikmetat rɩtgo, n gõdg goabg n teesd Taanat-Silo sẽnẽ, n pɩʋʋgd rɩtgã n dabd Yanoa sẽnẽ.

⁷A yii Yanoa n sigd n dabd Atarot ne Naarata, n tɩ teeg Zeeriko n ta Zʋrdẽ kʋɩlgã.

⁸Toadgã yii Tapuwa n teesd nin-taoore, Kana ko-soogã sẽnẽ, n na n tɩ tãag ko-kãsengã. Rẽndã yɩɩ a Efrayiim kambã pʋɩɩre, wa sẽn zems b rotã.

⁹La a Efrayiim kambã kell n sooga tẽms nins b sẽn dag n kõ bãmb tɩ be Manaase kambã pʋɩɩrã sʋkã, tẽmsã fãa ne b tẽn-kɩremsã.

¹⁰Bãmb ka tõog n dig Kana nebã sẽn dag n be Gezɛɛrã n deeg tẽngã ye. Dẽ, Kana nebã kell n paa Efrayiim nebã sʋk hal tɩ ta rũndã. La Efrayiim nebã modga bãmb tɩ b tʋmd b tʋʋm-wɛgl wa yembs n kõt-ba.