Read SEBR SÕNGO, 1998 A Zozoe 18 Bible Online

A Zozoe 18 - SEBR SÕNGO, 1998 bible

A Zozoe 18

¹Israyɛll nebã tigma taab Silo, n tilg b sɛk roogã beenẽ. Rẽ tɩ b zab n tõoga tẽngã zãnga.

²Wakat-kãng tɩ yaa Israyɛll buud a yopoe n ket n dag n nan ka paam b pʋɩɩr ye.

³A Zozoe yeela Israyɛll nebã yaa: «Yãmb na n basame tɩ ta dabʋr tɩ y yaool n deeg tẽng ning Sẽn-Ka-Saab sẽn yaa yãmb ba-rãmbã Wẽnnaamã sẽn kõ yãmbã?

⁴Yãk-y neb a tãab buud fãa sʋka, tɩ mam na n tʋm-b lame. Bãmb na n kẽng n gilga tẽngã n gese, n gʋls b sẽn na n pʋɩ tẽngã to-to wa sẽn zems b buudã, la b lebg n wa wilg maam.

⁵Bãmb na n pʋɩ-a-la zĩis a yopoe. Zʋʋda buudã na n kell n paa b toadgã sẽn be goabgã pʋga, t'a Zozɛf buudã me kell n pa b soolmã sẽn be rɩtgã pʋga.

⁶Yãmb na n pʋɩɩ tãngã zĩis a yopoe, n gʋls n tall n wa ne ka. Dẽ, mam na n maana poeer Sẽn-Ka-Saab sẽn yaa tõnd Wẽnnaamã taoor ka.

⁷La a Leevi yagensã ka tog n paam pʋɩɩr yãmb sʋk ye. Bala, Sẽn-Ka-Saab maan-kʋʋrã tʋʋmd n yaa bãmb puɩɩre. Dẽ, a Gaad buudã ne a Rubɛn buudã la a Manaase buudã pʋɩ-sʋkã reega Zʋrdẽ kʋɩlgã rʋʋnde, wa sẽn zems pʋɩɩr ning Sẽn-Ka-Saab tʋmtʋmd a Moyiis sẽn dag n pʋɩ n kõ bãmb yaangã.»

⁸B sẽn yãk neb nins sẽn tog n tɩ ges tẽnga pʋɩɩb yellã sẽn yik n na n looge, a Zozoe yeela bãmb yaa: «Kẽng-y n gilg-y n ges-y tẽngã sẽn yaa to-to, n gʋls n tall n wa mam nengẽ. Dẽ, mam na n maana poeer Sɩlo ka Sẽn-Ka-Saab taoor yãmb yĩnga.»

⁹La nin-kãens gilga soolmã gilli. La b gʋlsame n bilg tẽngã zĩis a yopoe wã sẽn yaa to-to sebr zugu, wa sẽn zems tẽmsã sẽn yaa bũmb ningã. La bãmb lebg n waa Sɩlo a Zozoe nengẽ.

¹⁰A Zozoe maana poeer bãmb yĩng Sẽn-Ka-Saab taoore, n pʋɩ tẽngã n kõ Israyɛll nebã wa sẽn zems b pʋɩɩrã sẽn yaa to-to.

¹¹B maana poeerã pipi n yãk Benzame yagensã pʋɩɩr wa sẽn zems b rotã, la bãmb soolmã toadg be a Zʋʋda yagensã ne a Zozɛf yagensã soolem sʋka.

¹²B toadgã sẽn be rɩtgã sɩngda ne Zʋrdẽ kʋɩlgã. B toadgã kell n yegda Zeeriko rɩtgo, n zẽk n dʋʋd tãngã n dabd nin-taoorã sẽnẽ, n tɩ yek Bɛt-Avɛn weoogã.

¹³Toadgã yii beenẽ n tũud Luuz n yegd a kɩreng ning b sẽn boond tɩ Betɛllã goabga, n sigd n dabd Atarot-Adaare, n pɩʋʋgd tãngã sẽn be Bɛt-Horon sẽn be longẽ wã goabga.

¹⁴Toadgã yii tãngã nin-taoor n gõdg n tees ko-kãsengã sẽn be goabgã sẽnẽ, tãngã sẽn yaa neng ne neng ne Bɛt-Horon goabgã, n tɩ yek Kiryat-Baall b sẽn boond tɩ Kiryat-Yeyarim sẽn yaa a Zʋʋda yagensã tẽngã. Nin-taoorã kɩrengã toadg la woto.

¹⁵Goabg kɩrengã toadg sɩnga Bɛt-Yeyarim satmẽ wã, n tud n tãag nin-taoor ko-bundsã sẽn be Neftoa wã.

¹⁶Toadgã sig n tãaga tãng ning sẽn tees Bɛn-Hinom longã satmã sẽn be Refayim nebã longã sẽn be rɩtgã. Toadgã sig n tũnuga Hinom longã, n yegd Zebuus nebã tẽng goabga, n kell n tɩ tãag Ɛn-Rogɛlle.

¹⁷Toadgã gõdg n yii rɩtg n tɩ tãag Ɛn-Semeese, n tɩ ta Gelilot sẽn tees Adumim kunkubrã, n lebg n sigd n dabd a Rubɛn yageng a Bohã kugrã.

¹⁸Toadgã kell n yegda rɩtg kɩrengã, sẽn tees Araba tãngã, n sigd n dabd Araba,

¹⁹la toadgã kell n tũu Bɛt-Hogla rɩtgã sẽnẽ, n na n tɩ tãag yamsem ko-kãsengã sẽn be rɩtgã sẽn yaa Zʋrdẽ kʋɩlgã yekr zĩigã sẽn be goabgã. Woto rag n yaa goabg toadgã.

²⁰Zʋrdẽ kʋɩlgã n yaa nin-taoor toadgã sɩngre. Rẽndã n yɩ Benzame yagensã pʋɩɩr wa sẽn zems b buudã sẽn yaa to-to, ne b todsã fãa sẽn gilgã.

²¹Ad tẽms nins b sẽn kõ Benzame buudã wa sẽn zems b buudã sõore: Yaa Zeeriko, Bɛt-Hogla, Emek-ketsitsi,

²²Bɛt-Araba, Semarayim, Betɛlle,

²³Avim, Para, Ofra,

²⁴Kefaar-Amonayi, Ofni ne Geba. Yaa tẽms piig la a yiib ne b tẽn-kɩremse.

²⁵Gabawõ, Rama, Beyerote,

²⁶Mitspe, Kefira, Motsa,

²⁷Rekɛm, Yirpeyɛlle, Tareyala,

²⁸Sela, Elɛfe, Zebuus-rãmbã tẽnga, sẽn yaa Zeruzalɛmã, Gibeyat ne Kiryate. Yaa tẽms piig la a naas ne b tẽn-kɩremse. Woto n yɩ a Benzame yagensã pʋɩɩr wa sẽn zems b buudã.