Read SEBR SÕNGO, 1998 A Zozoe 2 Bible Online

A Zozoe 2 - SEBR SÕNGO, 1998 bible

A Zozoe 2

¹A Nun biig a Zozoe zĩnda Sitim n tʋm tẽn-gũusdb a yiib n yeel-b yaa: «Kẽng-y n tɩ soos-y n ges-y Zeeriko tẽngã, n bãng a yell neere.» Bãmb kẽngame, la b tɩ siga pʋg-yoodr a yembr yʋʋr sẽn boond t'a Rahaab zakẽ, n yõg gãag sobendo.

²La neb n tɩ togs Zeeriko rĩmã tɩ Israyɛll neb n wa badaar yʋng n na n gũus tẽngã.

³Dẽ, Zeeriko rĩmã tʋmame tɩ b tɩ yeel a Rahaab yaa: «Kɩt tɩ raop nins sẽn wa n sig fo zakẽ wã yi, bala, b waame n na n gũus tẽngã fãa n bãng a yell neere.»

⁴La a Rahaab peega raop a yiibã n tɩ solge. A leoka nebã n yeel yaa: «Yaa sɩda, raop a yiibã sɩd waa mam nengẽ, la mam ka mi b sẽn yitẽ ye.

⁵Zĩ-sobdã wakate, b sẽn wa n dat n pag tẽngã kʋɩlemsã, raopã soos n loogame tɩ mam ka bãng b sẽn teesẽ ye. La yãmb sã n pʋgl-b tao-tao, y na n paam-b lame.»

⁶La mikame tɩ pagã rag n peega raopã n dʋʋs a roogã yĩngri, n wʋk lẽ wil raado yẽnda sẽn dag n bĩng n lud-ba.

⁷Dẽ, rĩmã sẽn tʋm-b rãmbã pʋgla raopã n tees Zʋrdẽ kʋɩlgã sẽnẽ n tɩ ta zĩ-rʋʋgdgẽ wã, la b bãmb loogrã zugẽ, b paga tẽngã noyã.

⁸Sẽn deng raop a yiibã sẽn nan ka gũsi, a Rahaab rʋ n bʋʋg-b-la roogã zugu,

⁹n yeel-b yaa: «Mam miime tɩ Sẽn-Ka-Saab rɩka tẽngã n ning yãmb nugẽ, la yãmb rabeem tara tõndo, la tẽngã nebã fãa rigdame.

¹⁰Bala, tõnd wʋmame tɩ wakat ning yãmb sẽn wa n yi Ezɩpt tẽngã, Sẽn-Ka-Saab kɩtame tɩ tãnwĩis ko-kãsengã lebg koɛɛng tɩ yãmb tõog n pɩʋʋg-a. Tõnd leb n wʋma bũmb ning yãmb sẽn maan Amoor-dãmbã rĩm-dãmb a yiibã, a Sihon ne a Oog sẽn dag n be Zʋrdẽ kʋɩlgã rʋʋndã. Yãmb sãam-b-la zãnga.

¹¹Tõnd sẽn wʋm woto wã, tõnd gĩinã fãa maagame, tɩ tõnd ned ba a yembr ka tõe n yals yãmb taoor ye. Bala, Sẽn-Ka-Saab sẽn yaa yãmb Wẽnnaamã yaa yĩngr la tẽng Wẽnnaam.

¹²Moasã, mam kota yãmb tɩ y wẽen ne Sẽn-Ka-Saab yʋʋre, tɩ yãmb me na wa n maana mam ba wã zak rãmb neere, wa mam sẽn maan yãmb neerã. Kõ-y maam bãnd sẽn wilgd tɩ na n yɩ wa yãmb sẽn yeelã.

¹³Wẽen-y tɩ y na n basa m ba wã ne m ma wã, la m tãopã ne m ba-bi-pogsã ne bũmb nins fãa bãmb sẽn so wã tɩ b vɩɩmde, la y na n kɩtame tɩ tõnd põs kũum.»

¹⁴Raop a yiibã yeela yẽnda yaa: «Fo sã n ka wilg ned tõnd zĩiga, tõnd na n gẽnega d yõy yãmb yĩnga. Sẽn-Ka-Saab sã n wa n ning tẽngã tõnd nugẽ, d na n wilga foom d pʋ-peelem n maan-f neere.»

¹⁵A Rahaab rɩka wĩir n tũnug a roogã võorẽ n sik raopã, bala, yẽnda roogã rag n tonga ne tẽngã lalga.

¹⁶Pagã yeela raopã yaa: «Zoe-y n tɩ soond-y tãmsã sẽnẽ, n pa be rasem a tãabo, hal tɩ neb nins sẽn baood-b yãmbã lebg n wa. Rẽ poore, y na yaool n dɩk sor n looge.»

¹⁷Raopã yeela a Rahaab yaa: «Ad tõnd sẽn na n maan bũmb ning n pids wẽeneg ning fo sẽn kɩt tɩ tõnd wẽenã:

¹⁸Tõnd sã n wa n kẽ tẽngã, bɩ f rɩk wĩ-kãngã sẽn yaa miuugã n loe võor ninga fo sẽn tũnug n sik tõndã, la f peeg f ba wã ne f ma wã, fo tãopã ne fo buudã fãa n wa tigim fo roogã pʋga.

¹⁹Ned ning sẽn na n yi-a fo roogã pʋg badaare, yaa yẽnda soab n bao a kũum, la taal ka be tõnd zug ye. La ned sã n kẽ fo roogã pʋg n sɩɩs neda, yel-kãng taal bee tõnd zugu.

²⁰La fo sã n togs ned tõnd sẽn yẽs ne taabã, fo sẽn kɩt tɩ tõnd wẽen wẽeneg ningã ka leb n be tõnd zug ye.»

²¹Pagã yeelame: «A na yɩɩ wa yãmb sẽn yeelã bala.» Yẽnda kõ-b-la sor tɩ b looge, la b loogame. La yẽnda loee wĩ-miuugã roogã võorẽ.

²²Raop a yiibã loogame, la b sẽn ta tãmsẽ wã, b paa be rasem a tãabo, hal tɩ neb nins sẽn dag n baood bãmbã lebg n kuili. Neb nins sẽn dag n pʋgl bãmbã baoo bãmb sorã zugu, la b ka yãnd-b ye.

²³Dẽ, raop a yiibã yii tãmsã zut n sig n pɩʋʋg Zʋrdẽ kʋɩlgã, n lebg n wa a Nun biig a Zozoe nengẽ. B togsa a Zozoe bũmb nins fãa sẽn maanã.

²⁴Bãmb yeela a Zozoe yaa: «Sɩd hakɩɩkã, Sẽn-Ka-Saab rɩka tẽngã zãng n ning tõnd nugẽ, hal tɩ tẽngã nebã fãa rigd ne rabeem, b sẽn wʋm tõnd kibarã yĩnga.»