Read SEBR SÕNGO, 1998 A Zozoe 23 Bible Online

A Zozoe 23 - SEBR SÕNGO, 1998 bible

A Zozoe 23

¹Sẽn-Ka-Saab kɩtame tɩ Israyɛll nebã tõog b bɛɛbã fãa sẽn gũbg bãmbã. Dẽ poore, Israyɛll nebã zĩnda ne bãan n kaoose. A Zozoe rag n kʋʋla wʋsgo.

²Dẽ, a Zozoe boola Israyɛll nebã fãa ne b kãsem-dãmbã, b nanambsã, b bʋ-kaoodbã, la b tãb-biis nanambsã, n yeel-b yaa: «Mam yaa nin-kẽema, m kʋʋla wʋsgo.

³La yãmb yãnda bũmb nins fãa Sẽn-Ka-Saab sẽn yaa yãmb Wẽnnaamã sẽn maan buud a taabã n sõng yãmbã. Bala, yaa Sẽn-Ka-Saab sẽn yaa yãmb Wẽnnaamã n zab n sõng yãmba.

⁴Mam maana poeer n pʋɩ soolmã n kõ yãmb tɩ y sooge, wa sẽn zems y buudã rot sõore. Yaa tẽms nins sẽn ket sẽn sɩng ne Zʋrdẽ kʋɩlgã tɩ y tog n deegã, ne tẽms nins fãa mam sẽn zab n deegã, hal n tãag ko-kãsengã, wĩndgã sẽn lʋɩtẽ wã sẽnẽ.

⁵Sẽn-Ka-Saab sẽn yaa Israyɛll Wẽnnaamã na n dig-b lame tɩ b zãag ne yãmba, n kɩt tɩ y tõog-ba, la y reeg b tẽngã, wa yãmb Zu-soab a Wẽnnaam sẽn dag n yeel yãmbã.

⁶Modg-y ne y sũyã fãa, n nang pãng n sak bũmb nins fãa sẽn gʋls a Moyiis tõogã sebr pʋgẽ wã, la y maan wa b sẽn yeel be wã, la y ra bʋdg n bas-a n kẽng goabg bɩ rɩtg ye,

⁷la y ra naag buud a taabã sẽn ket n be ne yãmbã ye. Da sak-y n pʋd-y bãmb wẽnnaam-dãmbã yʋy y sʋka, la y ra saag n wẽen ne-ba, la y ra waoog-b ye. La y ra saag n wõgemd b wẽnnaam-dãmbã taoor ye.

⁸Kell-y n gãd-y Sẽn-Ka-Saab sẽn yaa yãmb Wẽnnaamã wa yãmb sẽn sɩng n maandẽ hal tɩ ta rũndã wã.

⁹Sẽn-Ka-Saab kɩtame tɩ yãmb dig buud wʋsg sẽn tar pãnga. La hal tɩ ta rũndã, ned ba a yembr nan ka tõog n yals n teeg a yãoog ne yãmb ye.

¹⁰Yãmb ned a yembr tõe n diga bãmb neb tusri, bala, yaa Sẽn-Ka-Saab sẽn yaa yãmb Wẽnnaamã n zabd n sõngd yãmb wa bãmb sẽn dag n yeelã.

¹¹Dẽ wã, bɩ y gũus y mens neere, la y nong Sẽn-Ka-Saab sẽn yaa yãmb Wẽnnaamã.

¹²Yãmb sã n wẽnemd n naag buud a taabã sẽn be yãmb sʋkã, la y bao zood ne-b n dɩgs b kom-pugli wã n maan y pagba, la y maan lagem-n-taar ne bãmba,

¹³bɩ y bãng neere, tɩ Sẽn-Ka-Saab sẽn yaa yãmb Wẽnnaamã ka na n leb n sõng yãmb tɩ y tõog n dig bu-kãensã ye. Bu-kãensã na n kɩtame tɩ yãmb lʋɩ bẽdg pʋg n paam toogo, b na n namsa yãmb wa b sẽn pãbd ned ne kalwaase, la wa gõos sẽn kõs ned nini, hal tɩ yãmb wa menem n bas tẽn-sõng-kãng Sẽn-Ka-Saab sẽn yaa yãmb Wẽnnaamã sẽn kõ yãmbã.

¹⁴La ne maam, sã n yɩ bilfu, mam na n yii dũniyã, wa neb a taabã. Moasã, yãmb mens mi y sũyã pʋse, tɩ Sẽn-Ka-Saab sẽn yaa yãmb Wẽnnaamã sẽn dag n kãab yãmb kãab-nood ninsã fãa paama pidsg n ka vaal ye. Kãabdã fãa paama pidsg yãmb yĩnga, la bãmb ba a yembr ka vaal ye.

¹⁵Beneere, Sẽn-Ka-Saab sẽn yaa yãmb Wẽnnaamã kãab-noodã fãa sẽn paam pidsg wa bãmb sẽn dag n kãab yãmb to-to wã, woto me, yãmb sã n sãam kaool ning Sẽn-Ka-Saab sẽn yaa yãmb Wẽnnaamã sẽn maan ne yãmbã, bãmb na n pidsa kãab-wẽns nins fãa b sẽn dag n kãab yãmb n kɩt tɩ y menem n bas tẽn-noog ning Sẽn-Ka-Saab sẽn yaa yãmb Wẽnnaamã sẽn kõ yãmbã, la yãmb sã n tɩ pʋʋs wẽnnaam-dãmb a taaba, n wõgemd n waoog-ba, Sẽn-Ka-Saab sũur na n yika tao-tao ne yãmba, la b na n menesa yãmb tao-tao n kɩt tɩ y yi n bas tẽn-sõng ning b sẽn kõ yãmbã.»