Read SEBR SÕNGO, 1998 A Zozoe 3 Bible Online

A Zozoe 3 - SEBR SÕNGO, 1998 bible

A Zozoe 3

¹A Zozoe ne Israyɛll nebã fãa yika yibeoog pĩnda, n yi Sitim n kẽng n tɩ sig Zʋrdẽ kʋɩlgã noore. La bãmb gãanda beenẽ yʋn-kãng sẽn deng kʋɩlgã rʋʋgre.

²Kãsem-dãmbã rɩka rasem a tãab tõre, n saag tãb-sikã gilli,

³n yeel nebã yaa: «Yãmb sã n wa n yãnd tɩ Leevi buudã sẽn yaa maan-kʋʋdbã tʋk Sẽn-Ka-Saab sẽn yaa yãmb Wẽnnaamã kaoolã koglgã, bɩ y yik n yi zĩig ning yãmb sẽn beẽ wã n pʋgl a poore.

⁴La baoosgo, bas-y vɩʋʋg sẽn tat nao-yakem tus a yi, yãmb ne kaoolã koglgã sʋka, la y ra kolg-a ye. Woto, yãmb na n bãnga sor ning y sẽn tog n dɩke, bala, yãmb nan zɩ n tũ so-kãng ye.»

⁵Dẽ, a Zozoe yeela nebã yaa: «Yɩlg-y y mense, bala beoogo, Sẽn-Ka-Saab na n maana bõn-yɛɛsds yãmb sʋka.»

⁶A Zozoe yeela maan-kʋʋdbã yaa: «Tʋk-y kaoolã koglgã n lʋɩ nebã taoore.» La bãmb tʋka kaoolã koglgã n lʋɩ nebã taoore.

⁷Sẽn-Ka-Saab yeela a Zozoe yaa: «Sẽn sɩng ne rũndã, mam na n kɩtame tɩ fo lebg nin-kãseng Israyɛll nebã fãa nifẽ. La bãmb na n bãngame tɩ mam bee ne foom wa m sẽn dag n be ne a Moyiisã.

⁸Yeel maan-kʋʋdb nins sẽn zãad-b kaoolã koglgã, tɩ b sã n ta Zʋrdẽ kʋɩlgã noore, bɩ b kẽ koomã pʋg n yalse.»

⁹A Zozoe yeela Israyɛll nebã yaa: «Kolg-y ka n kelg Sẽn-Ka-Saab sẽn yaa yãmb Wẽnnaamã goamã.»

¹⁰A Zozoe yeelame: «Ad bũmb ning sẽn na n kɩt tɩ yãmb bãng tɩ Wẽnnaam sẽn vɩ wã sɩd bee ne yãmba, la b na n diga Kana-rãmbã, Hɛt nebã, la Hevi-rãmbã, ne Ferɛɛz-rãmba, la Girgaaz nebã, ne Amoor-dãmbã ne Zebuus nebã tɩ b zoe yãmb taoore.

¹¹Ade, dũniyã gill fãa Sẽn-Ka-Saab kaoolã koglgã na n lʋɩɩ yãmb taoor n pɩʋʋg Zʋrdẽ kʋɩlgã.

¹²Moasã, yãk-y raop piig la a yiib Israyɛll buudã sʋka, la buud fãa pʋgẽ yaa rao a yembre.

¹³Maan-kʋʋdb nins sẽn tʋk-b kaoolã koglgã nao sã n tabg Zʋrdẽ koomã pʋga, koomã na n welgame. Koom ning sẽn yit-a zugẽ n watẽ wã na n yalsame n tãoos n kuil yĩngr wa lalga.»

¹⁴Nebã sẽn viig b fu-rotã n na n pɩʋʋg Zʋrdẽ kʋɩlgã, maan-kʋʋdb nins sẽn tʋk-b kaoolã koglgã lʋɩɩ bãmb taoor n kẽnda.

¹⁵Wakat-kãng rag n yaa bɩle tigsg wakate, tɩ Zʋrdẽ kʋɩlgã koom rag n pid n saale. Maan-kʋʋdb nins sẽn tʋk-b kaoolã koglgã taa Zʋrdẽ kʋɩlgã noore, la b naoã sẽn tabg koomã pʋgã bal yee,

¹⁶koomã sẽn yit zugẽ n watẽ wã sẽn ta Ãdem sẽn pẽ Sartanã wã yalsame n tãoos n kuil yĩngr n lebg wa lalga. La koom ning sẽn zoet n sigd n dabd Araba ne yamsem ko-kãsengã sẽnẽ wã welg n looga zãnga. La nebã pɩʋʋga kʋɩlgã Zeeriko sẽnẽ n kẽng rʋʋndã.

¹⁷Maan-kʋʋdb nins sẽn dag n tʋk Sẽn-Ka-Saab kaoolã koglgã yalsa Zʋrdẽ kʋɩl-koɛɛngã tẽn-sʋk n ka serg ye, hal tɩ Israyɛll nebã fãa pɩʋʋg kʋɩlgã koɛɛng n looge.