Read SEBR SÕNGO, 1998 A Zozoe 5 Bible Online

A Zozoe 5 - SEBR SÕNGO, 1998 bible

A Zozoe 5

¹Amoor-dãmbã rĩm-dãmb nins fãa sẽn be Zʋrdẽ kʋɩlgã rʋʋnd nin-taoorã, ne Kana rĩm-dãmb nins fãa sẽn be ko-kãsengã sẽnẽ wã sẽn wʋm tɩ Sẽn-Ka-Saab kɩtame tɩ Zʋrdẽ koomã kʋɩ tɩ Israyɛll nebã pɩʋʋgã, rabeem yõk-b lame tɩ b ka leb n tar daood Israyɛll nebã taoor ye.

²Wakat-kãnga, Sẽn-Ka-Saab yeela a Zozoe yaa: «Rɩk kug n maan sʋʋse, n leb n kẽes Israyɛll nebã bãongo.»

³A Zozoe rɩka kug n maan sʋʋse, n kẽes Israyɛll nebã bãongo, tãng ning b sẽn boond tɩ bãong kẽoosg tãngã sɛɛga.

⁴Ad bũmb ning sẽn kɩt t'a Zozoe kẽes bãmb bãongã: Yaa tɩ wakat ning nebã fãa sẽn yi Ezɩptã, raop nins fãa sẽn dag n tõe n kẽng zabrã fãa kiime, b sẽn wa n ket n be weoogã pʋg n kẽndã wakate.

⁵Raop nins fãa sẽn dag n yi Ezɩpt tẽngã rag n kẽe bãongo, la neb nins sẽn dog weoogẽ wã wakat ning b sẽn be sorã zug n kẽndã ned ba a yembr ka kẽ bãong ye.

⁶Sɩd me, Israyɛll nebã rag n kẽna yʋʋm pis-naas weoogã pʋga, hal tɩ raop nins fãa sẽn tõe n kẽng zabrã sẽn dag n yi Ezɩpt n yaool n ka sak Sẽn-Ka-Saab noorã fãa ki. Bala, Sẽn-Ka-Saab wẽena ne bãmb n yeel tɩ bãmb ka na n kɩt tɩ b yãnd tẽng ning bãmb sẽn kãab b yaab-rãmbã tɩ b na n kõ-d lame wã ye. Yaa tẽng sẽn pid ne bĩisim la sɩɩdo.

⁷Wẽnnaam kɩtame tɩ bãmb kom-dibli wã led bãmb zĩigẽ n kẽ tẽngẽ wã, la yaa kom-dibl-kãens la a Zozoe sẽn kẽes bãongã. Bala, b rag n nan ka kẽ bãong ye, b sẽn ka tõog n kẽes-b bãongã wakat ning b sẽn be sorã zugã yĩnga.

⁸B sẽn kẽes nebã fãa bãong n sɛ, b kell n paa sikã zĩigẽ hal tɩ b noadã maage.

⁹Sẽn-Ka-Saab yeela a Zozoe yaa: «Rũndã, mam yiisa Ezɩpt rãmbã yãnd yãmb zutu.» La b pʋda zĩ-kãng yʋʋr tɩ Gilgalle,[1] la a yʋʋrã kell n paa woto hal tɩ ta rũndã.

¹⁰Israyɛll nebã siga Gilgalle, n maan Pakã tigr kiuugã rasem piig la a naas daarã zaabre, Araba tẽn-nabdrã sẽn be Zeeriko sẽnẽ wã.

¹¹Pakã tigr vẽkembeoogo, badaar bala, Israyɛll nebã rɩɩ tẽngã koodo. Yaa bur sẽn ka ning rã-bɩlle, la bɩle b sẽn kɩɩme.

¹²Bãmb sẽn dɩ tẽngã koodã n sɛ, mandã sẽn dag n dʋʋgdã yalsame. La Israyɛll nebã ka leb n paam mandã ye. Dẽ, bãmb dɩɩ Kana tẽngã bõn-koaadl yʋʋm-kãnga.

¹³Daar a yembre, a Zozoe sẽn kolg Zeeriko tẽngã, n zẽk a neng n getẽ, a yãnda rao sẽn yas yẽnda taoore, n zãad zabr sʋʋga. A Zozoe kẽng n kolg-a lame n sok-a yaa: «Fo bee ne tõnd bɩ f bee ne tõnd bɛɛbã?»

¹⁴Raoã leokame: «Mam ka yãmb baa a yembr ned ye, mam yaa Sẽn-Ka-Saab tãb-biisã naaba, mam waa moas-moasã bala.» A Zozoe wõgemdame, n fõgen a neng tẽng n yeele: «M Zu-soaba y yeta y tʋmtʋmda t'a maan bõe?»

¹⁵Sẽn-Ka-Saab tãb-biisã naab yeela a Zozoe yaa: «Piid f neooda wã, bala, zĩig ning fo sẽn yasã welga toor n yaa zĩ-sõngo.» La a Zozoe maana wa b sẽn yeelã.