Read SEBR SÕNGO, 1998 A Zozoe 8 Bible Online

A Zozoe 8 - SEBR SÕNGO, 1998 bible

A Zozoe 8

¹Sẽn-Ka-Saab yeela a Zozoe yaa: «Da zoe rabeem ye, la ra yɛɛs ye. Peeg f tãb-biisã fãa, n yik n kẽng n tɩ zab ne Ayi. Gese, mam dɩka Ayi rĩmã ne a nebã, la a tẽngã ne a soolmã n ning fo nugẽ.

²Fo sẽn maan Zeeriko ne a rĩmã to-to wã, f na n maana Ayi ne a rĩmã me a woto. La y sã n tõog tẽngã, bɩ y wʋk te-zɛɛdmã ne rũmsã n sooge. Bɩ f yãk tãb-biis n tʋm tɩ b tɩ soond Ayi tẽngã poore.»

³A Zozoe yika ne a tãb-biisã fãa n na n tɩ zab ne Ayi. A Zozoe yãka tãb-biis sẽn yaa gãndaad tus a tãabo, n tʋm bãmb ne yʋngo.

⁴La a Zozoe yeel-b lame yaa: «Kelg-y-yã, yãmb na n kẽnga tẽngã poor n tɩ soonde. Da zãag-y ne tẽngã wʋsg ye. La y segl y mens n gũudẽ.

⁵La maam ne neb nins fãa sẽn be ne maamã, na n kolga tẽngã. La wakat ning b sẽn wat n yi n na n seg tõnd wa b sẽn maan pĩndã, d na n lebgame n zoetẽ tɩ b rigd tõndo.

⁶B na n yiime n digd tõndo, la tõnd na n maana a woto hal n tall-b n zãag ne tẽngã. Bala, b na n yeelame: Tõnd digd-b lame tɩ b zoet wa pĩndã. La tõnd sẽn ket n zoetã wakate,

⁷bɩ y yi n kẽ tẽngã. Sẽn-Ka-Saab sẽn yaa yãmb Wẽnnaamã na n kɩtame tɩ y tõog-a.

⁸Yãmb sã n ta tẽngã, bɩ y yõog-a bugum. Maan-y wa Sẽn-Ka-Saab sẽn yeelã. Gũus-y y mens n maan wa mam sẽn yeel yãmbã.»

⁹A Zozoe yeela bãmb tɩ b kẽnge. La bãmb kẽng n tɩ soonda Betɛll ne Ayi sʋka, Ayi tẽngã nin-taoore. A Zozoe kell n paa nebã sʋk yʋn-kãnga.

¹⁰A Zozoe yika yibeoog pĩnd n saag n ges nebã. La yẽnda ne Israyɛll kãsem-dãmbã lʋɩɩ nebã taoor n na n tɩ zab ne Ayi.

¹¹A Zozoe ne tãb-biisã fãa kẽngame n kolg Ayi tẽngã. La bãmb sẽn pẽneg tẽngã, bãmb tilga b tãb-sikã Ayi tẽngã rɩtgo. Long n dag n be bãmb ne Ayi tẽngã sʋka.

¹²A Zozoe yãka raop sẽn kolg tus a nu n kɩt tɩ b kẽng n tɩ soond Betɛll ne Ayi sʋka, Ayi tẽngã nin-taoore.

¹³Tãb-biisã sẽn tilg b tãb-sikã n sɛ, tɩ sẽn nan wa-bã be tẽngã rɩtgo, tɩ sẽn nan na n wa sõng-bã be tẽngã nin-taoorã, a Zozoe paa nebã sʋk yʋn-kãnga, longã pʋga.

¹⁴Dẽ, Ayi rĩmã sẽn yã woto, yẽnda ne a nebã fãa yika tao-tao n yi n na n tɩ zab ne Israyɛll nebã tãngã sigdg sẽn be Araba tẽn-nabdrã neng taoorã. La Ayi rĩmã rag n ka mi tɩ neb n solg tẽngã nin-taoor ye.

¹⁵A Zozoe ne Israyɛll nebã basame tɩ Ayi nebã rigd-b tɩ b zoet n teesd weoogã sẽnẽ.

¹⁶B wẽe kũng tɩ Ayi nebã fãa yi n na n dig Israyɛll nebã. Bãmb diga a Zozoe rãmb n zãag ne tẽngã.

¹⁷Ned ka kell Ayi ne Betɛll tẽngã sẽn ka yi n na n dig Israyɛll nebã ye. La b basa b tẽngã noy vɩɩdo, n ka page, n na n zoe n babs Israyɛll nebã.

¹⁸Sẽn-Ka-Saab yeela a Zozoe yaa: «Rɩk f kãn-dibgã sẽn be fo nugẽ wã n tees Ayi. Bala, mam kɩtame tɩ f na n tõog tẽngã.» A Zozoe tẽega kãnda sẽn dag n be yẽnda nugẽ wã, n tees Ayi tẽngã.

¹⁹Wakat-kãng bala, neb nins sẽn dag n soondã yii soondgã zĩigẽ tao-tao n zoe n kẽ tẽngã n yãmbe, n ning-a bugum.

²⁰La Ayi nebã sẽn wẽnemd n ges poorẽ, bõe la wã. B yãnda b tẽngã bug-zõos sẽn zẽkd n kuiis yĩngri. La b ned kam fãa gĩin maagame, la bãmb ka tar sẽn zoet n kẽ zĩig ning ye. La Israyɛll neb nins sẽn dag n zoet n teesd weoogã sẽnẽ wã wẽnemdame n zab ne sẽn digd-b bãmbã.

²¹A Zozoe ne Israyɛll nebã fãa sẽn yã tɩ neb nins sẽn dag n soondã tõoga tẽngã t'a bug-zõosã zẽkd n kuiis yĩngrã, b wẽnemdame n zab ne Ayi nebã.

²²Israyɛll neb a taabã yii tẽngẽ wã n seg bãmba, la Israyɛll nebã gũbga Ayi nebã zĩigã fãa tɩ b be sʋka. Israyɛll nebã kʋʋ bãmb tɩ ned ba a yembr ka põs ye.

²³La b yõka Ayi rĩmã vɩɩg n tall-a n kẽng a Zozoe nengẽ.

²⁴Israyɛll nebã sẽn kʋ Ayi tẽngã neb nins sẽn dag n digd bãmb n teesd weoogẽ wã, n ka bas tɩ Ayi ned ba a yembr põsã, Israyɛll nebã fãa lebg n kẽe Ayi tẽngã n kʋ neb nins sẽn ketã ne zabr sʋʋse.

²⁵Neb nins sẽn ki badaarã sõor yaa neb tus piig la a yiibu, pagbã ne raopã sẽn naag taaba. Yaa Ayi nebã fãa.

²⁶A Zozoe kell n tẽega a nugã ne kãn-dibgã hal tɩ b kʋ Ayi nebã fãa zãng n sɛ.

²⁷Dẽ, Israyɛll nebã wʋka tẽngã te-zɛɛdmã ne rũmsã n soog wa Sẽn-Ka-Saab sẽn dag n yeel a Zozoe wã.

²⁸A Zozoe yõoga Ayi tẽngã bugum n kɩt t'a lebg raboog hal tɩ ta rũndã.

²⁹B luula Ayi rĩmã tɩɩg zugu, la b bas-a-la beenẽ hal tɩ ta zaabre. La wĩndgã sẽn kẽ, a Zozoe kɩtame tɩ b sik kũumã tɩɩgã zugu, n tɩ lob tẽngã noore. La b zama kug a zugu, la kugã keta beenẽ hal tɩ ta rũndã.

³⁰Dẽ, a Zozoe mee tẽn-kugr Eball tãngã zug n kõ Sẽn-Ka-Saab sẽn yaa Israyɛll Wẽnnaamã.

³¹Yẽnda mee tẽn-kugrã wa sẽn zems Sẽn-Ka-Saab tʋmtʋmd a Moyiis sẽn dag n yeel Israyɛll nebã tɩ be a Moyiis tõodã sebr pʋgẽ wã: Yaa tẽn-kugr sẽn maan ne kug-mum kut sẽn nan ka tol n sɩɩs-b ye. La b maana maand sẽn yõogd bugum zãng tẽn-kugrã zug Sẽn-Ka-Saab yĩnga, la b maan zems-n-taar maand beenẽ.

³²La a Zozoe yalsa Israyɛll nebã fãa nifẽ n gʋls tõod nins a Moyiis sẽn dag n gʋlsã kugã zutu.

³³Israyɛll nebã ne b kãsem-dãmbã ne b gʋlsdbã, la b bʋ-kaoodbã, ne nebã fãa, la tẽng-n-dãmbã ne sãambã fãa yalsame n gũbg tɩ b nensã tees kaoolã koglgã. B fãa nensã dag n teesa a Leevi buudã sẽn yaa maan-kʋʋdbã sẽn tʋk Sẽn-Ka-Saab kaoolã koglgã. Pʋɩ-sʋk rag n yasa Garizim tãngã sẽnẽ tɩ pʋɩ-sʋk yas Eball tãngã kɩreng sẽnẽ. La bũmbã fãa maana wa sẽn zems Wẽnnaam tʋmtʋmd a Moyiis sẽn dag n yeel tɩ b maanã, la b ninga Israyɛll nebã barka.

³⁴Rẽ zugẽ, a Zozoe karma tõodã koees gilli, kãab-noodã la kãab-wẽnsã, wa sẽn gʋls tɩ be tõodã sebr pʋgẽ wã.

³⁵A Zozoe karma bũmb nins fãa a Moyiis sẽn dag n gʋlsã, Israyɛll nebã ne b pagbã la b kambã ne bu-zẽmsã sẽn dag n be bãmb sʋkã nifẽ, n ka kell bũmb ye.