Read SEBR SÕNGO, 1998 2 Tesalonik‑rãmba 1 Bible Online

2 Tesalonik‑rãmba 1 - SEBR SÕNGO, 1998 bible

2 Tesalonik‑rãmba 1

¹A Poll ne a Sɩlvẽ la a Tɩmote n gʋlsd Tesalonik wẽnd doogã rãmb sẽn be tõnd ba a Wẽnnaam pʋgẽ la Zu-soab a Zeezi Kiris pʋgẽ wã.

²Bɩ ba a Wẽnnaam la Zu-soab a Zeezi ning yãmb barka la b kõ yãmb laafɩ.

³D ba-biisi, tõnd tog n pʋʋsda Wẽnnaam bark yãmb yĩng n ka basdẽ ye, la yaa bũmb sẽn zemse, bala, yãmb tẽebã paasdame, tɩ nonglem ning yãmb sẽn tar taab yĩngã paasdẽ.

⁴Woto, tõnd me pẽgda d mens yãmb yĩng Wẽnnaam nin-tũusdsã sul pʋsẽ, yãmb modgrã ne y tẽebã yĩnga, nebã sẽn namsd yãmbã pʋgẽ la toodã sẽn sigd yãmbã pʋgẽ.

⁵Yõwã wilgdame tɩ Wẽnnaam bʋʋdã yaa tɩrga, tɩ b na kɩt tɩ yãmb zems ne Wẽnnaam soolem kõom, soolem ning yãmb sẽn sakd namsgã yĩnga.

⁶Bala, ne Wẽnnaam, a zemsame tɩ b kɩt tɩ neb nins sẽn namsd yãmbã namse,

⁷la b kɩt tɩ yãmb sẽn namsdã, bɩ y lagem ne tõnd n paam vʋʋsg wakat ning Zu-soab a Zeezi sẽn na n puk arzãn ne malegs sẽn tar pãnga.

⁸Bãmb na n waa bug-vɩleng pʋgẽ, n sɩbg neb nins sẽn ka mi Wẽnnaam la neb nins sẽn ka sakd tõnd Zu-soab a Zeezi koe-noogã.

⁹Sɩbgr sẽn segd ne-b la b na n paame: Sãoong sẽn paad wakat sẽn kõn sa, n zãag ne Zu-soabã yãabo la ne bãmb pãngã ziiri,

¹⁰wakat ning Zu-soabã sẽn na n wa tɩ neb nins bãmb sẽn so wã waoog bãmb da-kãnga, tɩ neb nins sẽn tẽed bãmbã na ges bãmbã. La yãmb yaool n tẽe kaset ning tõnd sẽn kɩsã.

¹¹Yaa woto yĩng la tõnd pʋʋsd yãmb yĩng n ka basdẽ ye, tɩ tõnd Wẽnnaamã na kɩt tɩ yãmb yɩ neb sẽn zemsd ne boolg ning b sẽn bool yãmbã, la tɩ b na pids saag-sõama nins yãmb sẽn tar ne tʋʋm-sõamy wã maanegã, la b kɩt tɩ yãmb tẽebã tʋʋmd zems zãnga.

¹²Woto, yãmb na waoog tõnd Zu-soab a Zeezi yʋʋre, la bãmb me na waoog yãmba, wa sẽn zemsd tõnd Wẽnnaam la ne Zu-soab a Zeezi Kiris nimbãan-zoeerã.