Read SEBR SÕNGO, 1998 1 Tɩmote 2 Bible Online

1 Tɩmote 2 - SEBR SÕNGO, 1998 bible

1 Tɩmote 2

¹Dẽ, mam saglg yaa tɩ y reng n kos Wẽnnaam, n pʋʋse, n yõk sɛɛga, la y pʋʋs Wẽnnaam bark nebã fãa yĩnga:

²rĩm-dãmb yĩnga, neb nins fãa sẽn so naamã yĩnga, tɩ tõnd tõe n vɩ ne laafɩ la bãane, ne Wẽnnaam sakre, la ne waoogre.

³Yaa woto n be neer Wẽnnaam nifẽ, la a noom bãmb sẽn yaa tõnd fãagdã.

⁴Bãmb daab yaa tɩ nebã fãa paam fãagre, la b tõog n bãng sɩdã.

⁵Bala, Wẽnnaam a yembr tãa bal n be, sɛ-yõakd a yembr tãa bal n be Wẽnnaam ne nebã sʋka: Yaa rao sẽn boond t'a Zeezi Kirisi,

⁶soab ning sẽn kõ a meng tɩ ra nebã fãa wã. Yõwã yaa kaset sẽn kɩs a wakate.

⁷Wẽnnaam yãka maam tɩ m moon kaset‑kãnga, la m yɩ tẽn-tʋmda (mam yeta sɩda, mam ka yagd ye,) la m zãms bu-zẽmsã ne tẽebo la ne sɩda.

⁸Dẽ, mam datame tɩ nebã zẽk nus sẽn yaa yɩlma, n pʋʋs Wẽnnaam zĩig fãa, tɩ sũ-kiiri la no-koɛɛm kaẽ ye.

⁹Sã n yaa ne pagbã, b tog n yera fut sẽn yaa sõama n zems gesgo, la ne sik-m-menga. Bɩ b nagmã ra yɩ zutã pãnengo, wall sãnem, wall kĩndi, wall fut ligd sẽn yaa toog yeelgrẽ ye.

¹⁰Ayo! B tog n nagsa b mens ne tʋʋm‑sõamyã maanego, wa sẽn zems pagb sẽn sakd Wẽnnaam sẽn tog n maane.

¹¹Pagbã tog n deega zãmsg sĩndim la sakr meng-meng pʋgẽ.

¹²Mam ka kõt pag noor t'a zãms nebã, wall a soog rao ye. A tog paa sĩndim pʋgẽ.

¹³Bala, Wẽnnaam deng n naana a Ãdem pipi, n yaool n naan a Ɛɛve.

¹⁴La sẽn paase, ka a Ãdem la waafã belg n tõog ye. Yaa pagã n sak belgrã, n kɩɩs Wẽnnaam noor n beeg bãmba.

¹⁵Baoosgo, a na n paama fãagre, a sẽn lebg ma wã yĩnga, a sã n modg ne tẽebo, la nonglem, la welg toor Wẽnnaam yĩnga, la gũus-m-menga.