Read SEBR SÕNGO, 1998 1 Tɩmote 4 Bible Online

1 Tɩmote 4 - SEBR SÕNGO, 1998 bible

1 Tɩmote 4

¹Sɩɩg-sõng togsa vẽeneg tɩ yaoolem wakate, neb kẽer na n basa tẽebo, n pʋg belgr sɩɩse, la zãmsg zĩn-dãmb sẽn kõta.

²La yaa bɛlgdb sẽn yaa zãmb dãmba, la b sũ-bãngrã sẽn wʋm ne kut sẽn moogã goam n na n kɩt tɩ yɩ a woto.

³B yeta nebã tɩ b da yi kãadem ye, la b bas rɩɩb kẽer n da rɩ ye, tɩ Wẽnnaam yaool n naan rɩ-kãens tɩ neb nins sẽn maand sɩda la sẽn mi sɩdã na rɩ ne bark pʋʋsgo.

⁴Wẽnnaam sẽn naan bũmb ninsã fãa yaa sõama, b sã n dɩt-b ne bark pʋʋsgo.

⁵Bala, bũmb fãa lebgda sõama Wẽnnaam goamã la pʋʋsg yĩnga.

⁶Fo sã n bilg ba-biisã bõn-kãense, fo na n yɩɩ a Zeezi Kiris tʋmtʋmd-sõng sẽn paam dɩlgr ne tẽeb goamã, la ne zãms-sõng fo sẽn tũ sõama wã.

⁷Zãag f meng ne kibay sẽn ka kẽed ne tẽeb yelle, la ne soalem pʋg-yãans sẽn tãoodã.

⁸Mao ne Wẽnnaam sakre. Bala, yĩngã modgr yõod yaa bilfu, la Wẽnnaam sakr bee yõod ne bũmb fãa. A tara vɩɩm ning sẽn be moasã wã kãabgo, la vɩɩm ning sẽn watã yĩnga.

⁹Yaa gomd sãmbg sẽn ka be a pʋgẽ, la sẽn zems tɩ b reeg-a zãnga:

¹⁰Tõnd tʋmdame, la d maoodẽ, bala, tõnd saagr bee ne Wẽnnaam sẽn vɩ la sẽn yaa nebã fãa fãagda, la Kiris tẽedbã fãagd n yɩɩda.

¹¹Fo sẽn tog n sagl nebã tɩ b maane, la f zãms-b bũmb ningã la woto.

¹²Da sak n maan tɩ ned paoog foom f yãadem yĩng ye. Yɩ mamsg neb nins sẽn maand sɩdã yĩnga, ne f noor goamã, ne f kẽnde, ne f nonglem, ne f tẽebo, ne f sõmblem.

¹³Wɩng ne sɛbã kaoreng nebã sʋka, la saglgo, la zãmsgo hal tɩ m wa.

¹⁴Da bas kũun ning bãngr gomd sẽn togse, tɩ kãsem-dãmbã tik foom ne b nus n pʋʋs n kõ foomã tɩ yɩ zaalem ye.

¹⁵Maan tʋʋm‑kãng neere, n dɩk f meng n kõ-a, tɩ nebã fãa na yã tɩ fo kẽngda taoore.

¹⁶Mao n gũus f menga, la f gũus ne zãmsgã. Wɩng ne bõn-kãense, bala, fo sã n maan a woto, fo na n fãaga f menga, la f fãag neb nins sẽn kelgd foomã.