Read SEBR SÕNGO, 1998 2 Tɩmote 1 Bible Online

2 Tɩmote 1 - SEBR SÕNGO, 1998 bible

2 Tɩmote 1

¹Maam a Poll sẽn yaa a Zeezi Kiris tẽn-tʋmda, Wẽnnaam daab yĩnga, sẽn zemsd ne vɩɩm kãabg ning sẽn be a Zeezi Kiris pʋgẽ wã

²n gʋlsd m bi-nongr a Tɩmote. Bɩ barka, la nimbãan-zoeere, la laafɩ sẽn yit ba a Wẽnnaam la tõnd Zu-soab a Zeezi Kiris nengẽ wã zĩnd ne foom.

³Mam pʋʋsda Wẽnnaam ning mam yaab-rãmbã sẽn dag n sakdã, la mam me sẽn sakd ne sũur kaset sẽn yaa yɩlemdã barka. La mam ka basd tɩ pʋd fo yell m pʋʋsg pʋgẽ, wĩntoog ne yʋng ye.

⁴Bala, mam ket n tẽra fo nintãmã, la mam data ne m sũur fãa n leb n yãnd-fo, tɩ m sũurã tõe n pid ne sũ-noogo.

⁵Mam ket n tẽra tẽeb ning fo sẽn tara, sẽn ka kalem ne zãmbã yelle. Tẽ-kãng dag n zĩnda ne f yaab a Loyiisi, la ne f ma a Eniisi, la mam mii m sũurẽ t'a bee ne foom me.

⁶Rẽ n kɩt tɩ mam sagend foom tɩ f yãdg Wẽnnaam kũunã fo sẽn deeg ne mam nus-tikrã bugum.

⁷Bala, ka rabeem Sɩɩg la Wẽnnaam kõ tõnd ye, la yaa pãnga, la nonglem, la yam Sɩɩga.

⁸Da zoe yãnd ne Zu-soabã kaset fo sẽn tog n kɩsã ye, la f ra zoe yãnd mam yĩnga, mam sẽn be bi-bees roogẽ bãmb yĩngã yĩng ye. Ayo! Naag maam n nams koe-noogã yĩnga, Wẽnnaam pãngã sõngr yĩnga.

⁹Yaa bãmb n fãag tõndo, la b bool tõnd bool-sõngo. La ka tõnd tʋʋm yĩng ye, yaa bãmb mengã tʋlsem la bark ning b sẽn maan tõnd a Zeezi Kiris pʋgẽ hal sẽn deng wakat sẽn ka sɩngrã wakatã yĩnga.

¹⁰Bark‑kãng lebga vẽeneg moasã ne tõnd fãagd a Zeezi Kiris pukrã. Bãmb kɩtame tɩ kũum pãng sa, la b kɩt tɩ vɩɩm la yĩng sẽn ka kiidã yell yɩ vẽenega, koe-noogã maasem yĩnga.

¹¹Wẽnnaam yãka maam tɩ m yɩ koe-no-kãng moaanda, a tẽn-tʋmda, a karen-saamba.

¹²Mam sakda namsg koe-noogã yĩnga, la yãnd ka tar maam ye. Bala, mam mii m sẽn tẽ a soabã, la mam mii m sũur pʋgẽ tɩ b tara pãng tɩ gũ bũmb ning bãmb sẽn ning mam nugẽ wã hal tɩ da-kãng ta.

¹³Gom-sõamy nins fo sẽn deeg mam nengẽ wã, tall rẽ tɩ yɩ mamsg fo yĩnga, tẽeb pʋgẽ, la nonglem sẽn be a Zeezi Kiris pʋgẽ wã me pʋgẽ.

¹⁴Bũmb ning sẽn be fo pʋgẽ wã, tall-a, Sɩɩg-sõng sẽn vɩ tõnd pʋgẽ wã maasem yĩnga.

¹⁵Fo miime tɩ neb nins fãa sẽn be Aazi wã basa maam. A Fizɛll ne a Hɛrmozɛn bee bãmb sʋka.

¹⁶Bɩ Zu-soabã sudg a Onezifoor zaka rãmb barka. Bala, a belsa maam naoor wʋsgo, la mam bãensã yãnd ka tall-a ye.

¹⁷A pʋs n baoo maam ne a sũur fãa, a sẽn wa Rommã, hal n yãnd maam.

¹⁸Bɩ Zu-soabã kɩt t'a paam bãmb nimbãan-zoeer da-kãnga[1]. Fo mii sõngr ninga fãa a sẽn sõng maam Efɛɛsã n yɩɩd neb a taabã sẽn mi.