Read SEBR SÕNGO, 1998 A Titi 1 Bible Online

A Titi 1 - SEBR SÕNGO, 1998 bible

A Titi 1

¹Maam a Poll sẽn yaa Wẽnnaam tʋmtʋmda la a Zeezi Kiris tẽn-tʋmd sẽn na paas Wẽnnaam nin-tũusdsã tẽebo la kɩt tɩ b bãng sɩd sẽn wat ne

²wẽn-tũudum, n paam tẽeb pidsg gũudum ne vɩɩm sẽn kõn sa wã, Wẽnnaam sẽn yaa sɩd soabã sẽn dag n kãab hal tɩ dũni nan ka naana.

³La wakat sẽn ta, b puka b koɛɛgã koe-mooneg ninga bãmb sẽn kõ maana pʋgẽ, wa sẽn zems noor ninga tõnd fãagd a Wẽnnaam sẽn kõ wã.

⁴Maam n tʋmd seb‑kãnga a Tit sẽn yaa mam meng biig tẽeb pʋgẽ wã, tẽeb ning sẽn yaa tõnd fãa rẽndã nengẽ, bɩ f paam bark la laafɩ sẽn yit tõnd ba a Wẽnnaam la d fãagd a Zeezi Kiris nengẽ.

⁵Mam basa foom Kɛrɛt tẽng tɩ f maneg bũmb ning sẽn ket n tog n manegã, la f maan wa mam sẽn dag n wilg foom tɩ f yãk wẽnd-dot kãsem-dãmb tẽng fãa pʋgẽ wã.

⁶Bãmb tog n yɩɩ neb sẽn ka tar yelle, la sẽn tar pag a yembr bala, la sẽn tar kamb sẽn yaa tẽedbã n ka maand tʋʋm dẽgdo, n yaa kom-sakdse.

⁷Sɩd me, togame tɩ karen-saamb sẽn yaa Wẽnnaam tʋʋma yel-gɛtã yɩ ned sẽn ka tar yell ye, karen-saamb ka tog n yɩ tɩta-neda la sũur sẽn yikd tao-tao ye, a ka tog n yɩ rã-yũuda, a ka tog n yɩ zab-zabda la ned sẽn baood paoong ne zãmb ye.

⁸Yẽnda tog n yɩɩ ned sẽn maand sãamba sãando la a yɩ maan-neer zoa, la a yɩ ned sẽn tagsd sõama, la a ya nin-tɩrga la pʋ-peelem soaba la tõog-m-meng soaba.

⁹Yẽnda tog n gãda sɩd koɛɛgã kãenkãe wa b sẽn dag zãms-a to-to wã tɩ yẽnda tõe n sagl neb a taabã wa sẽn zems tõ-sõamyã la a tõog kɩɩsdbã.

¹⁰Sɩd me, neb wʋsg n be n yaa kɩɩsdba, la gom-vɩɩd-rãmba, ne bɛlgdba, sẽn yɩɩd fãa yaa tɩ yaa zũnsã sʋk la b be.

¹¹F tog n kɩtame tɩ b sĩndi. Bãmb lubda zags zãnga n zãmsd nebã bũmb sẽn ka zems ye, n baood paoong ne zãmbo.

¹²Kɛrɛt-dãmbã ned a yembr sẽn yaa bãmb meng no-rɛɛs dag n yeelame yaa: «Wakat fãa Kɛrɛt nebã yaa zĩrẽ-be-rãmbã, pʋ‑to-rãmba, yão-be-neb sẽn yaa kʋɩɩmba.»

¹³Kaset‑kãnga yaa sɩda, rẽ wã yĩnga, bɩ f leng-b ne

¹⁴pãnga tɩ b paam tẽeb sẽn yaa sõama, tɩ b ra wa tũ Zʋɩf-rãmbã soalmã, la ninsaalbã tõodã sẽn basd sɩdã ye.

¹⁵Bũmba fãa yaa yɩlemd ne neb nins sẽn yaa yɩlma. La neb nins sẽn maand yel-wẽna la sẽn ka Kiris tẽedbã, baa fʋɩ ka yɩlemd ne bãmb ye. Bãmb yamã ne b sũ-bãngrã rẽgmame.

¹⁶B yetame tɩ b mii Wẽnnaam la b kɩɩsda Wẽnnaam ne b mensã tʋʋmã, bãmb yaa wẽns tɩ looge, la kɩɩsdba la neb sẽn ka tol n tõe n maan tʋʋm sõng ye.