Read SEBR SÕNGO, 1998 A Titi 3 Bible Online

A Titi 3 - SEBR SÕNGO, 1998 bible

A Titi 3

¹Tẽeg-b tɩ b sak soolem taoor dãmba ne pãn-soaadbã, tɩ b yɩ sakdba, la b sak n maan tʋʋm‑sõama fãa.

²Tɩ b ra gom ned wẽng ye, tɩ b ra yɩ zab zabdb ye, la b yɩ neb sẽn baood laafɩ, sẽn nong nebã, n maand sũ-bʋgsem ne nebã fãa.

³Bala, pĩnda tõnd me rag n yaa yalemba, la nin-kɩɩsdba, la neb sẽn bʋdge, la ratem wẽns buud toay-toay la sũ-no-yood n dag n so tõndo. Tõnd dag n vɩɩ pʋ-toog la sũ-kĩir pʋga, tõnd dag n kisa neb a taaba tɩ bãmb me kis tõndo.

⁴La tõnd fãagd a Wẽnnaam sõmblmã la b nonglem nebã fãa yĩngã sẽn puki,

⁵bãmb fãaga tõndo, la ka tõnd sẽn tʋm tʋʋm-tɩrs yĩng ye, la yaa bãmb mengã nimbãan-zoeer yĩng la b fãag tõndo, bãmb soo tõnd ne soob sẽn palemda, tɩ Sɩɩg-sõng tũnug rẽnda n kõ tõnd rogem paalga la vɩ-paalga.

⁶Yaa Sɩɩg-sõng ninga Wẽnnaam sẽn tũnug tõnd fãagd a Zeezi Kiris n sik-a tõnd zug wʋsgã,

⁷tɩ ne bãmb barkã b sã n kɩt tɩ tõnd lebg tɩrse, bɩ tõnd lebg pʋɩt-n-taas ne vɩɩm sẽn kõn sa wã tõnd sẽn gũudã.

⁸Gom-kãnga yaa sɩda, la mam datame tɩ fo togs-a nebã tɩ neb nins sẽn tẽ Wẽnnaamã na wɩng ne tʋʋm‑sõama maanego. Yõwã n be neere la a tar yõod ne ninsaalba.

⁹Lak ne yalem goamã, la rot rɩkre, la ka-wʋmd-taaba, la nokoɛɛma tõog poorẽ. Bala, b ka tar yõodo la b yaa gom vɩɩdo.

¹⁰Ned ning sẽn wat ne welgr sã n paam keoogr vugri, la naoor a yiibu, n ka sak bɩ f lak f meng ne-a.

¹¹Tɩ fo miime tɩ ned a woto basa so-sõngã n dɩk so-wẽngã, n maand yel-wẽna, la a mongda a meng bʋʋm.

¹²Mam sã n wa n tʋm a Artemaas bɩ a Tisik fo nengẽ, bɩ f nang pãng n wa paam maan Nikopoli tẽnga, bala mam yãka yam n na n zĩnd be waooda wẽnde.

¹³Ges tõ-mit a Zenaas ne a Apoloos so-toakã yelle, tɩ bũmb da wa n paoog-b ye.

¹⁴Tõnd nebã me tog n zãmsame tɩ maan tʋʋm-sõamyã n tõog n sõng ne yɛl sẽn dat manegr tao-tao, tɩ bãmb da yɩ neb sẽn ka wat ne baa fɩ ye.

¹⁵Neb nins fãa sẽn be ne maamã pʋʋsda foom. Pʋʋs neb nins sẽn be tẽebã pʋgẽ n nong tõndã. Bɩ Wẽnnaam barkã zĩnd ne yãmb fãa.