Read SEBR SÕNGO, 1998 A Fɩlmo 1 Bible Online

A Fɩlmo 1 - SEBR SÕNGO, 1998 bible

A Fɩlmo 1

¹Maam a Poll sẽn yaa bi-bɛɛg a Zeezi Kiris yĩnga ne d ba-biig a Tɩmote n tʋmd seb-kãngã tõnd zo-nongr la

²d tʋmd-n-taag a Fɩlmo nengẽ, ne d ba-bi-poak a Apiya la tõnd soda-taag a Arsɩp ne a Zeezi tẽedbã sẽn tigimd fo zakẽ wã.

³Bɩ tõnd ba a Wẽnnaam la Zu-soab a Zeezi Kiris sik b bark la b laafɩ yãmb zutu.

⁴Mam pʋʋsda m Wẽnnaamã bark daar fãa n tẽegd

⁵fo yell m pʋʋsgã pʋga. Bala, mam wʋmda b sẽn gomd fo sẽn tar nonglem ning Wẽnnaam nebã fãa yĩngã la fo sẽn tẽed Zu-soab a Zeezi wã.

⁶Mam kota Wẽnnaam tɩ fo sẽn lagem tõnd n tar tẽeb ningã na kɩt tɩ nebã bãng bõn-sõama nins fãa sẽn maand tõnd sʋk a Zeezi Kiris yĩnga.

⁷Ba-biiga, mam paama sũ-no-kãsenga ne belsgo, fo nonglmã yĩnga, bala, fo yĩnga, Wẽnnaam nebã sũy paama belsgo.

⁸Yaa woto yĩnga, baa mam sẽn tar lohorem wʋsg Kiris pʋgẽ tɩ gʋls n wilg foom f sẽn tog n maana,

⁹mam nong n yõka foom sɛɛg ne nonglem n yɩɩda. Yaa maam a Polle, nin-kẽem a Polle, la sẽn paas moasã, mam bee bi-bees roog a Zeezi Kiris yĩnga.

¹⁰Mam kota foom m biig a Onezɩm yĩnga mam sẽn dog m balgr pʋgẽ wã.

¹¹Pĩnda, yẽnda ra ka tar yõod ne foom ye, la moasã yẽnda na n talla yõod ne foom wala a sẽn tar yõod ne maamã.

¹²Mam lebs n tʋmd-a-la fo nengẽ, yẽnda wẽnda wa mam meng bala.

¹³Mam da nongẽ lame n kɩt t'a pa ne maam, n deeg fo zĩigẽ n sõng maam, mam sẽn be bi-bees roog moasã koe-noogã yĩngã.

¹⁴La mam da ka rat n maan baa fʋɩ tɩ ka tũ ne fo noor ye. Tɩ fo yel-sõmda ra yɩ ne modgr ye, la a na n yɩɩ ne yamleoogo.

¹⁵Tõe t'a Onezɩm sẽn loog n bas foom wakat bilf yĩnga yaa sẽn na n yɩl tɩ f leb n deeg-a wakat fãa yĩnga.

¹⁶La ka tɩ reeg-a wala yamb ye, la yaa reegr sẽn yaa neer n yɩɩd yamba, reeg yẽnda wa ba-bi-nongre. Yẽnda yaa mam ba-bi-nongre, la a leb n yaa fo ba-bi-nongr n yɩɩda. Sã n yaa yĩnga pʋga wala sã n yaa Zu-soaba tũudum pʋga.

¹⁷Dẽ wã, fo sã n get maam wa f zoa, bɩ f reeg a Onezɩm wa fo sẽn deegd mam mengã.

¹⁸La yẽnda sã n da beega foom wala a sã n tara fo samde, bɩ f geelg yõwã wa mam dẽnda.

¹⁹Mam a Poll n gʋlsd gom-kãnga ne mam menga nug tɩ m na n yao-f lame. La mam ka na n yeel foom tɩ fo tara samde, la fo menga yaa maam n so ye.

²⁰N-yẽe, m ba-biiga, bɩ f maan yel-sõm-kãngã Zu-soabã yĩng n kõ maam, bels mam sũur Kiris tũudmã pʋgẽ.

²¹Yaa mam sẽn mi tɩ fo na n sakame wã yĩng la mam sẽn gʋlsd foomã, n miẽ tɩ f na n sak n maaname tɩ yɩɩd mam sẽn kot-fã.

²²La f kell n segl gãag zĩig mam yĩnga, bala yãmb pʋʋsgã yĩnga mam tara tẽeb tɩ b na n basa maam n kõ yãmba.

²³A Epafras sẽn be bi-bees roog pʋg ne maam a Zeezi Kiris yĩnga pʋʋsda foom,

²⁴la a Mark ne a Aristark la a Demaas la a Luk sẽn yaa mam tʋmd-n-taasã me pʋʋsda foom.

²⁵Bɩ tõnd Zu-soab a Zeezi Kiris barkã soog yãmb sũyã.