Read SEBR SÕNGO, 1998 Ebre‑rãmba 1 Bible Online

Ebre‑rãmba 1 - SEBR SÕNGO, 1998 bible

Ebre‑rãmba 1

¹Wẽnnaam sẽn da tall bãmb no-rɛɛsdbã n pĩnd n gom naoor wʋsg ne tõnd yaab-rãmbã ne manesem buud wʋsgã,

²wakat-kãngã sẽn yaa yaoolem dayã, bãmb tũnuga b Bi-riblã n gom ne tõndo. Wẽnnaam kɩtame tɩ b soog bũmb fãa, la yaa b Bi-riblã la Wẽnnaam tall n naan dũni fãa.

³Bi-ribl‑kãng sẽn yaa b ba wã ziir yãgbã, la b ba wã yalẽ pukrã n zãad bũmbã fãa ne b gomd sẽn tar pãngã. Bãmb sẽn yɩlg nebã n yiis b yel-wẽnã n sa, b zĩnda naab a Wẽnd dɩtg hal saasẽ.

⁴Bãmb yɩɩda malegsã hal zĩig sẽn zãra, la rẽ kɩtame tɩ b paam yʋʋr sẽn yaa toor fasɩ ne malegsã rẽnda.

⁵Sɩd me, malɛɛk bʋg la Wẽnnaam yeel baa vugr tɩ: Fo yaa mam bi-ribla, yaa maam n dog foom dũndã? Wall b yeel me tɩ: Mam na n yɩɩ yẽnda ba, la yẽnda na n yɩɩ mam biiga?

⁶La bãmb sẽn na n wa ne b Bi-ribl kãsengã tẽng zugã, b yeelame yaa: Bɩ Wẽnnaam malegsã fãa waoog-a.

⁷La b goma malegsã yell n yeel yaa: B kɩtame tɩ b malegsã yɩ sobdo, tɩ b tʋmtʋmdbã yɩ bug-vɩlemse.

⁸La bãmb yeela b Bi-riblã yaa: Wẽnnaam, fo naam geer paada wakat sẽn kõn sa, la fo naam dasaarã yaa tɩrlem dasaare.

⁹Fo nonga tɩrlem, la f kisga wẽnga. Wẽnnaam, yaa rẽndã n kɩt tɩ f Wẽnnaamã kõ foom sũ-noogo, la b bas f tũud-n-taasã.

¹⁰Wẽnnaam leb n yeelame yaa: Zu-soaba, yãmba, yãmb yẽbga tẽngã hal sɩngr wẽndẽ, la yaa yãmb nusã n maan saasã.

¹¹B fãa na n sãamame, la yãmba, yãmb paada y zĩigẽ. B fãa na n kʋdga wa futu.

¹²Yãmb na n põd-la wa kobre, la b na n tegs-b-la wa futu. La yãmba, yãmb na n ket n yaa y sẽn yaa bũmb ningã, la yãmb yʋʋm ka na n tall tɛk ye.

¹³La malɛɛk-bʋg la Wẽnnaam yeel baa vugr tɩ: Zĩnd mam dɩtgo, hal tɩ m wa kɩt tɩ f bɛɛbã lebg f nao roagendega?

¹⁴Dẽ yĩnga, malegsã fãa ka sɩɩs sẽn tʋmd Wẽnnaam yĩnga, tɩ Wẽnnaam mi n tʋm-b tɩ b tɩ maan tʋʋmd n sõng neb nins sẽn tog n deeg fãagrã tɩ yɩ b pʋɩɩrã la?