Read SEBR SÕNGO, 1998 Ebre‑rãmba 12 Bible Online

Ebre‑rãmba 12 - SEBR SÕNGO, 1998 bible

Ebre‑rãmba 12

¹Dẽ yĩnga, tõnd me sẽn tar kaset dãmb wʋsg sẽn gũbg tõnd a woto wã, bɩ d tõdg zɩɩb fãa la yel-wẽnã sẽn lut tõnd naana wã, la d nang pãng ne zoees ning sẽn be tõnd taoorã,

²n get a Zeezi sẽn yaa tõnd tẽebã sɩngd la a taasdã. Bãmb basa sũ-noog ning b sẽn yet tɩ b na n kõo bãmbã, n sak da-pɩkã n ka zoe yãnd ye, la b zĩi Wẽnnaam geerã rɩtgo.

³Ges-y soab ning yel-wẽn maandbã sẽn nams b yõorã, tɩ yãmb da wa yɛ ye, la tɩ y raood da boog ye.

⁴Yãmb nan ka kɩɩs yel-wẽnã hal tɩ y zɩɩm yi a poorẽ ye.

⁵La yãmb yĩma saglg ning b sẽn sagl yãmba, wa ned sẽn sagend kom-dibli: M biiga, da ges sɩbgr ning Zu-soabã sẽn sɩbgd foomã wa bõn-yaalg ye, la b sã n lengd foom bɩ f da boog f raood ye.

⁶Bala, Zu-soabã sɩbgda ned ning bãmb sẽn nonge, la b sɩbgda biig ning fãa bãmb mengã sẽn sak n deeg wa b biigã ne dasaare.

⁷Sak-y remsgo: Wẽnnaam maanda yãmb wa b kamba. Bala, bi-ribl bʋg la a ba ka remsda?

⁸La yãmb sã n ka paamd sɩbgr ning kamb fãa sẽn paamdã, dẽnd yãmb yaa tãmpĩiba, la y ka yirã soab kamb ye.

⁹Tõnd sẽn paam yĩng ba-rãmb tɩ b ra sɩbgd tõnd tɩ tõnd waoog-bã, tõnd ka tog n sak d sɩɩs ba wã n yɩɩda, tɩ d tõe n paam vɩɩm?

¹⁰Sɩd me, tõnd ba-rãmba dag n sɩbgda tõnd wakat bilf yĩng wa b sẽn tẽed tɩ zemsame, la Wẽnnaam sɩbgda tõnd d sõngr yĩng meng-menga, tɩ tõnd me na welg toor n yɩ sõama wa bãmba.

¹¹Yaa sɩd t'a wakatã, sɩbgr buud fãa ka sũ-noog ye, yaa sũ-sãanga. La kaoosg pʋgẽ, a womda tɩrlem biis sẽn wat ne laafɩ neb nins sẽn paam remsgã yĩnga.

¹²Yaa woto yĩnga, bɩ y zẽk y kamsã sẽn yɛ wã, la y rũmã sẽn ki wã.

¹³Bɩ y naoã tũ so-tɩrse, tɩ sẽn keoosd-a wã da wa bʋdg ye, la b pʋs n paam maagre.

¹⁴Bɩ y bao tɩ laafɩ zĩnd yãmb ne nebã fãa sʋka, la y bao pʋ-peelem, tɩ pʋ-peelem sã n kaẽ, ned ka tõe n yã Zu-soabã ye.

¹⁵Bɩ yãmb ned kam fãa mao n da wa n mong a meng Wẽnnaam barkã ye, tɩ yẽgen-tõaag baa a yembr da wa tobe, n wa ne rãmbgo, n nams neb wʋsg ye.

¹⁶Bɩ y mao tɩ ned baa a yembr da yɩ tʋʋm-dẽgd soaba, wall ned sẽn paoogd neb wa a Ezayu sẽn dɩk a kãosengã n tek ne rɩɩb a yembr tãa wã ye.

¹⁷Yãmb miime tɩ kaoosg zugẽ, a sẽn wa n dat n deeg a ba barkã, b tõdgame, bala a ka tõog n yãnd sor n tũ n tõog t'a ba wã tek yam, baa ne yẽnda sẽn bao barkã ne nintãmã.

¹⁸Sɩda, yãmb ka kolg tãng ning ned sẽn ka tõe n sɩɩse, tɩ bugum zird a zugẽ ye. Yãmb ka kolg lika, wall lik bida, wall sob-kãsenga

¹⁹wall baorgã peebgo, wall goam sẽn yɩ ne pãng wa koɛɛg ning nebã sẽn dag n wʋm n bõos tɩ b ra leb n gom ne bãmb baa gom-bi-yendã ye.

²⁰Bala, b sẽn yeel bãmb tɩ: «Baa sã n yaa rũng n sɩɩs tãngã bɩ b lob-a kugã, ra yaa toog ne bãmba.»

²¹Bũmb nins sẽn maanã da wata ne rabeem wʋsgo, hal t'a Moyiis yeel tɩ yɛɛsg n tar yẽnda t'a rigda.

²²La yãmb kolga Sɩyõ tãngã la Wẽnnaam sẽn vɩ wã tẽnga, sẽn yaa yĩngr Zeruzalɛm, la malegs tus wʋsgã.

²³La tigingã ne kom-dẽemsã b sẽn gʋls b yʋy arzãna sullã pʋgã, la Wẽnnaam sẽn yaa nebã fãa bʋ-kaoodã, la nin-tɩrs sẽn paam n zems zãngã sɩɩse.

²⁴Yãmb kolga a Zeezi sẽn yaa kaool‑paalgã sɛ-yõakdã, la zɩɩm ning b sẽn tall n mese, la sẽn gomã sõama n yɩɩd a Abɛll rẽndã.

²⁵Maan-y gũusgu! Ra tõdg-y n ka kelg ned ning sẽn gomd-a ne yãmbã ye. Bala, neb nins sẽn tõdg n ka kelg a soab sẽn dag n keoogd bãmb tẽng zug ka wã sã n ka põse, tõnd n ka na n põs n yɩɩda, tõnd sã n tõdg n ka kelg ned ning sẽn be arzãn n keoogd tõndã.

²⁶Wakat-kãnga, bãmb koɛɛgã kɩtame tɩ tẽngã rigimdi. La moasã b kãaba tõnd n yeele: Moasã yɛsa, mam na n leb n kɩtame tɩ tẽngã rigimdi, la ka tẽngã bal ye, yĩngr me na n digimdame.

²⁷B sẽn yeel tɩ yɛsã, wilgdame tɩ bũmb nins sẽn digimdã, b na n bak-b-la toore, b sẽn yaa bõn-naandse, tɩ bũmb nins sẽn ka rigimdã na yalse.

²⁸Rẽndã n kɩt tɩ tõnd sẽn na n paam soolem sẽn ka tõe n vigsã, bɩ d yɩ neb sẽn mi d zaamẽ, n maan kaoreng sẽn noom Wẽnnaam sũuri, ne Wẽnnaam sakre la ne rabeem.

²⁹Bala, tõnd Wẽnnaamã yaa bugum sẽn dɩt me.