Read SEBR SÕNGO, 1998 Ebre‑rãmba 3 Bible Online

Ebre‑rãmba 3 - SEBR SÕNGO, 1998 bible

Ebre‑rãmba 3

¹Yaa woto yĩnga, m ba-biis sẽn welg toor Wẽnnaam yĩnga, la sẽn naag n paam Wẽnnaam boolgã, bɩ y ges a Zeezi sẽn yaa maan-kʋʋd kãsem Wẽnnaam sẽn tʋme, tõnd tẽebã tʋʋm pʋgẽ wã.

²Bãmb maana sɩd ne a soab ning sẽn yãk bãmbã, wa a Moyiis sẽn maan sɩd ne Wẽnnaam wẽnd doogã pʋgẽ wã.

³Sɩd me, b gesame t'a Zeezi toga ne ziir sẽn yaa kãseng n yɩɩd a Moyiis dẽndã, wa ro-metã sẽn tog ne ziir n yɩɩd roogã mengã.

⁴Bala, roog fãa yaa ned n me, la soab ning sẽn me-a bũmb fãa wã yaa Wẽnnaam.

⁵Sã n yaa ne a Moyiisi, a maana sɩd ne bũmb fãa wẽnd doogẽ wã, n yɩ tʋmtʋmda, n na n kɩs bũmb ning b sẽn pĩnd n togs a yellã kaseto.

⁶La a Zeezi maanda sɩd ne wẽnd doogã, bãmb sẽn yaa Wẽnnaam Bi-riblã. Tõnd n yaa bãmb roogã, sã n yaa tɩ tõnd kell n talla raoodo, la saag-sõng ning tõnd sẽn yet tɩ d tarame wã kãenkãe hal tɩ ta wakat saabo.

⁷Rẽnda n kɩt t'a wa Sɩɩg-sõng sẽn yetã: Rũndã, yãmb sã n wʋm bãmb koɛɛga,

⁸bɩ y ra keng y sũyã wa yãmb ba-rãmbã sẽn maan kɩɩsgã wakate, makrã wakat weoogẽ wã,

⁹zĩig ning bãmb sẽn mak maam n na n gese, zĩig ning b sẽn yã tʋʋm nins mam sẽn maanã yʋʋm pis-naasã ye.

¹⁰Rẽndã n kɩt tɩ mam sũur sãam ne zamaan‑kãng nebã, n yeel yaa: «Bãmb sũyã bʋdgda wakat fãa, la b ka bãng mam sẽn datã ye.»

¹¹La m sũ-puugrã pʋgẽ, mam wẽename n yeele: «Hakɩɩka, b ka na n paam vʋʋsg ning mam sẽn na n kõ-bã ye.»

¹²Dẽ yĩngã, m ba-biisi, gũus y mens tɩ ned baa a yembr yãmb sʋkã da tall sũur sẽn yaa wẽng la sẽn ka tẽeda, hal t'a wa wẽnemd n bas Wẽnnaam sẽn vɩ wã ye.

¹³Ayo! Wakat ning tɛk ned sẽn tõe n yeel tɩ ‹rũndã›, bɩ y sagl taaba, tɩ yel-wẽnã belgr da wa kɩt tɩ ned sũur riglim ye.

¹⁴Bala, b kɩtame tɩ tõnd lebg Kirisã tũud-n-taase, la yaa tõnd sẽn na n kell n tall d pipi pel-kɛgengã kãenkãe,

¹⁵wakat ning b sẽn yeel tɩ: Rũndã, yãmb sã n wʋm bãmb koɛɛga, bɩ y ra keng y sũyã wa yãmb ba-rãmbã sẽn maan kɩɩsgã wakatã ye.

¹⁶Yãmb sẽn gesã, yaa ãnda rãmb n wʋm Wẽnnaam koɛɛgã la b kell n bao Wẽnnaam noore, sã n ka neb nins a Moyiis sẽn tall n yiis Ezɩptã?

¹⁷La ãndã rãmb la Wẽnnaam sũur sãam ne yʋʋm pis-naasã, sã n ka b rãmb nins sẽn maan yel-wẽnã, b rãmb kũum sẽn pa weoogẽ wã?

¹⁸La yaa ãnda rãmb la Wẽnnaam kãab n yeel tɩ b kõn paam vʋʋsg ning bãmb sẽn na n kõ wã, sã n ka b rãmb nins sẽn kɩɩsã?

¹⁹Woto, tõnd yãame tɩ b ka tõog n kẽ be, b ka-tẽebã yĩnga.