Read SEBR SÕNGO, 1998 Ebre‑rãmba 5 Bible Online

Ebre‑rãmba 5 - SEBR SÕNGO, 1998 bible

Ebre‑rãmba 5

¹Sɩd me, maan-kʋʋd kãsem fãa b sẽn yãk ninsaalb sʋkã, yaa t'a na tʋm Wẽnnaam tʋʋm ninsaalb sʋka, n maan yel-wẽnã sugr maoong n yõk Wẽnnaam sɛɛga.

²Yẽnda tõe n wʋma zɩtbã ne neb nins sẽn bʋdgã võore, bala yẽnda mengã bee pãn-komsem pʋgẽ.

³Yaa pãn-komsem‑kãng yĩng la yẽnda tog n maan yel-wẽnã sugr maand n yõk Wẽnnaam sɛɛg a mengã yĩnga, la nebã me yĩnga.

⁴Ned baa a yembr ka tõe n bao waoogr n yik n kẽes a meng maan-kʋʋr kãoseng tʋʋmd pʋgẽ ye. Yaa Wẽnnaam n boond a soaba, wa b sẽn bool a Aarõ mengã.

⁵Woto me, ka Kiris n bao ziir‑kãng n lebg maan-kʋʋd kãsem ye. Yaa soab ning sẽn yeel-a tɩ: «Fo yaa mam bi-ribla, yaa maam n dog foom rũndã.»

⁶n leb n yeel zĩig a to tɩ: «Fo yaa maan-kʋʋd wakat sẽn kõn sa yĩnga, wa sẽn zems a Melkisedɛk sẽn yaa to-to wã.»

⁷Wakat ning a Zeezi sẽn dag n dɩk yĩngã, yaa bãmb n pʋʋs n kos Wẽnnaam ne kelemse, la ne nintãm. Bãmb pʋʋs n kosa a soab sẽn tõe n põsg bãmb ne kũumã. B paama leokre, b sõmblmã yĩnga,

⁸la baa ne bãmb sẽn yaa Wẽnnaam Bi-riblã, namsg ning bãmb sẽn namsã zãmsa bãmb sakre.

⁹La b sẽn wa n kɩt tɩ bãmb zems zãnga, bãmb waa ne fãagr sẽn kõn sa, neb nins fãa sẽn sakd bãmbã yĩnga.

¹⁰Wẽnnaam yeelame tɩ b Bi-riblã yaa maan-kʋʋd kãsem sẽn wẽnd a Melkisedɛke.

¹¹Tõnd tara bũmb wʋsg sẽn na gom yel-kãng wɛɛngẽ, la bũmb kẽer bilsg yaa toogo. Bala, yãmb wʋmbã yaa maasga.

¹²Sẽn kaoos n ta moasã, tɩ yãmb da tog n yɩ karen-saam-dãmbã, yãmb leb n datame tɩ b zãms yãmb Wẽnnaam yel-soalmã pipi koees sẽn yaa naana wã. Yãmb leb n tõdgda rɩ-taok n dat bĩisim.

¹³La ned ning fãa sẽn ket n yẽsemd bĩisim nan ka mi tɩrlem ne ka-tɩrlem goam n bak ye, bala a yaa biiga.

¹⁴Rɩ-taok yaa neb sẽn bɩ yĩnga, neb nins sẽn mao n mi sõama ne wẽng n bakã yĩnga.