Read SEBR SÕNGO, 1998 Ebre‑rãmba 7 Bible Online

Ebre‑rãmba 7 - SEBR SÕNGO, 1998 bible

Ebre‑rãmba 7

¹A Melkisedɛk dag n yaa Salɛm dĩma, la saasẽ-saasẽ Wẽnnaamã maan-kʋʋda. A kẽngame n tɩ seg a Abrahaam sẽn tɩ tõog rĩm-dãmb n lebg n watẽ wã, n ning-a barka.

²Yaa yẽnda la a Abrahaam kõ bũmb fãa piig pʋɩɩre. La d sã n na n bilg a yʋʋrã võore, pipi a yaa tɩrlem dĩma, tɩ Salɛm rĩungã pʋgle, sẽn dat n togs tɩ laafɩ rĩmã.

³A ka tar ba, a ka tar ma, n ka tar yaab roog ye. A ka tall sɩngre, la a vɩɩmã ka tall tɛk ye. B kɩtame t'a yɩ wa Wẽnnaam Bi-riblã, la a yaa maan-kʋʋd wakat sẽn ka sɛt yĩnga.

⁴Ges-y soab ning tõnd yaab a Abrahaam mengã sẽn yãk zabrã te-zɛɛdem piig pʋɩɩr n kõ wã, n bãng a sẽn ya kãseng to-to!

⁵A Leevi yagens nins b sẽn kõ maan-kʋʋr tʋʋmdã, tõogã kõ-b-la noor tɩ b reeg piig pʋɩɩr Israyɛll nebã sẽn yaa bãmb ba-biisi, la a Abrahaam yagensã nengẽ.

⁶A Melkisedɛk sẽn ka be a Leevi yaab roogã pʋgẽ wã deega a Abrahaam piig pʋɩɩre, a ninga soab ning sẽn paam kãabgã barka.

⁷Nokoeemd kae tɩ yaa sẽn yɩɩd-a wã n ningd sẽn ka ta-a yẽnda wã zug barka.

⁸La ka wã, yaa nin-kiids n deegd piig pʋɩɩrã, la be wã, yaa ned gʋls sõamyã sẽn kɩt kaset t'a vɩɩme.

⁹Moasã, a Leevi sẽn deegd piig pʋɩɩrã, a ra zoe n yaoo a piig pʋɩɩre, a Abrahaam yaoodã pʋgẽ.

¹⁰Bala, wakat ning a Melkisedɛk sẽn tɩg n seg a Abrahaamã, rẽ t'a Leevi da ket n bee a Abrahaam zɩɩmẽ.

¹¹Sã n yaa tɩ Leevi rãmbã maan-kʋʋrã tʋʋmd wata ne zemsgo, tõog ning Wẽnnaam sẽn kõ b nebã yẽbga maan-kʋʋrã tʋʋmd zugu. Bõe yĩng tɩ b leb n dat tɩ maan-kʋʋd sẽn yaa wa a Melkisedɛk la ka wa a Aarõ wa?

¹²Bala, maan-kʋʋrã tʋʋmd sã n toeeme, yaa tɩlɛ tɩ tõogã me toeeme.

¹³Sɩd me, ned ning yell b sẽn gom woto wã yaa buud a to neda, la ned baa a yembr buud‑kãng sʋk ka be tẽn-kugrã tʋʋmdẽ ye.

¹⁴Bala, yaa vẽeneg tɩ tõnd Zu-soabã yaa Zʋʋda neda, la a Moyiis ka gom buud‑kãng yell n kẽes maan-kʋʋrã wɛɛngẽ ye.

¹⁵A yellã leb n yaa vẽeneg n yɩɩd wakat ning ned sẽn wa n yaa wa a Melkisedɛkã

¹⁶n yaa maan-kʋʋd a to wã. Ka ne ninsaalb tõog yãkr la a lebg maan-kʋʋdã ye, la yaa ne vɩɩm sẽn ka sãamd pãnga.

¹⁷Bala, b kɩsa a kaset n yeele: Fo yaa maan-kʋʋd wakat sẽn kõn sa yĩnga, wa a Melkisedɛke.

¹⁸Sɩd me, b kiisa tõog sẽn dag n be, a pãn-komsem la a ka-yõodã yĩnga,

¹⁹(bala tõogã ka tõog tɩ baa fɩ zems ye), la b waa ne saag-sõng sẽn yaa sõama n yɩɩd pĩnd soabã. Saag-sõng‑kãng maasem yĩnga tõnd kolgda Wẽnnaam.

²⁰La Wẽnnaam ka maan t'a Zeezi yɩ maan-kʋʋd tɩ wẽeneg ka wẽen ye.

²¹Sɩda, ka yɩ ne wẽeneg la neb a taabã lebg maan-kʋʋdb ye. La a Zeezi lebga maan-kʋʋd ne wẽenego, la yaa soab ning sẽn yeel tɩ: Zu-soabã wẽename, la b ka na n lebs b noor poorẽ ye. B yeelame yaa: Fo yaa maan-kʋʋd wakat sẽn kõn sa yĩnga.

²²Woto kɩtame t'a Zeezi lebg kaool sẽn yaa sõama n yɩɩdã zãada.

²³Sẽn paase, maan-kʋʋdb kãens sõor yɩɩ wʋsgo, tɩ bõe kũum da gɩdgda bãmb tɩ b ka tõe n kẽng taoor ne b tʋʋmã ye.

²⁴La a Zeezi sẽn paad wakat sẽn kõn sa wã yĩnga, bãmb maan-kʋʋrã yaa bũmb b sẽn ka tõe n deeg n kõ ned a to ye.

²⁵Dẽ me n kɩt tɩ bãmb tõe n fãag neb nins sẽn tũnugd bãmb n kolgd Wẽnnaamã hal sõama, bala bãmb vɩɩ wakat fãa n yõkd sɛɛg b yĩnga.

²⁶Yaa maan-kʋʋd kãsem a woto la tõnd sɩd tog n paame: Ned sẽn welg toor Wẽnnaam yĩnga, n ka tar yelle, ned sẽn ka rog-b ye, n bak ne yel-wẽn-maandbã, la b zẽk-b lame n kẽng saasẽ.

²⁷Ka tɩlɛ tɩ b maand maand daar fãa wa maan-kʋʋd kãsem-dãmbã sẽn dengd n maan maoong b mens yĩnga, n yaool n maan neb a taabã yĩngã ye. Bãmb maana maoong a yembr tãa wakat fãa yĩnga, la yaa b meng la b tall n maan maoongã.

²⁸Sɩd me, tõogã yãkda neb sẽn yaa pãn-komsem dãmb tɩ b yɩ maan-kʋʋd kãsem-dãmba. La wẽeneg ning sẽn be sẽn deng tõogã waoongã yãka Wẽnnaam Bi-riblã tɩ b yɩ maan-kʋʋd kãsma, la bãmb zemsa zãng wakat sẽn ka sɛta.