Read SEBR SÕNGO, 1998 Ebre‑rãmba 9 Bible Online

Ebre‑rãmba 9 - SEBR SÕNGO, 1998 bible

Ebre‑rãmba 9

¹Pipi kaoolã me dag n tara a tõod sẽn kẽed ne kaorengã la a wẽnd doogã sẽn yaa tẽng zug bũmbã yelle.

²Sɩd me, b dag n tilga wẽnd doogo. A pipi pʋgã pʋgẽ, b sẽn boond tɩ zĩ-sõngã, fɩtl-doagendga la taabl ne burã b sẽn kõ Wẽnnaamã n dag n be be.

³La fu-lilldig a yiib soabã poore, zĩig ning sẽn yaa sõama fasɩ wã da bee be.

⁴Tɩdar yõogr zĩig sẽn yaa sãnem ne kaoolã koglg sẽn lud zãng ne sãnem, tɩ sãnem tʋkã mandã sẽn be a pʋgẽ wã, n paas a Aarõ rasaar ning sẽn da ning-a puudã, la kaoolã kug-wals be a pʋgẽ wã bee be.

⁵Kãabg koglgã zugu, Serubẽ-rãmb sẽn tar ziir n be be, tɩ b maasmã lut sugr kũunã zĩiga.[1] D ka na n yals n wegs a yellã n gom moasã ye.

⁶Bũmb fãa sẽn tar a zĩig woto wã, maan-kʋʋdbã kẽeda wẽnd doogã pipi ro-pʋgẽ wã, wakat ning fãa b sẽn tʋmd kaorengã tʋʋmã.

⁷La ro-pʋg a yiib soabã pʋgẽ, yaa maan-kʋʋd kãsmã bal n kẽed be vugr yʋʋmde. La a ka kẽed be tɩ ka ne zɩɩm a sẽn wat ne a meng yĩnga la soolmã nebã yĩng ye.

⁸Ne bõn-kãnga, Sɩɩg-sõng wilgame tɩ sor dag n nan ka pak tɩ nebã tõe n kẽ zĩig sẽn welg toor fasɩ wã pʋgẽ, wakat ning tɛk pipi wẽnd doogã sẽn ket n be wã ye.

⁹A yaa mamsg sẽn wilgd bũmb ning sẽn be moasã wã. A wilgdame tɩ ne ned ning sẽn pʋʋsd-a Wẽnnaamã sũ-bãngre, kũunã ne maandã sẽn kʋʋdã ka kɩtd tɩ ned zems zãng ye.

¹⁰Tõ-kãensã yaa yĩng yell tõodo, sẽn kẽed ne rɩɩbo, la bõn-yũudlɩ, la pegsg buud toay-toay yelle, tɩ ya tɩlɛ tɩ nebã tũ hal tɩ ta tedgr wakate.

¹¹La Kirisã waame n yaa bõn‑sõamã nins sẽn watã maan-kʋʋd kãsma. Bãmb pɩʋʋga wẽnd doog sẽn yaa kãsenga la sẽn zems zãng n yɩɩd pĩnd soabã: ro-kãng ka ninsaal nug n me ye, dat n yeelame t'a ka me ne bũmb nins sẽn naan tɩ tõnd neẽ wã ye.

¹²Ro-kãng la bãmb pɩʋʋg n kẽ zĩig sẽn welg toor sẽn yɩɩd fãa wã pʋgẽ vugr bal wakat fãa yĩnga. Bãmb ka kẽ be ne boees bɩ nag-bi zɩɩm ye, yaa ne b mengã zɩɩm. Yɩɩ woto la b fãag tõnd ne fãagr sẽn paad wakat sẽn kõn sa.

¹³Bala, boeesã ne lolsã zɩɩm, la nag-sadg tompeglem b sẽn yugl neb nins sẽn dẽgmã sã n manegda bãmba, n yɩlgd bãmb yĩnsã,

¹⁴Kirisã zɩɩm n yɩɩda. Bãmb sẽn dɩk b meng n kõ Wẽnnaam tɩ rẽgd tosb kaẽ, Sɩɩg sẽn paad wakat sẽn kõn sa yĩngã, bãmb na n yɩlga tõnd sũ-bãngrã n yiis tʋʋm nins sẽn yaa kũumã, tɩ tõnd tõe n tʋm Wẽnnaam sẽn vɩ wã yĩnga.

¹⁵Rẽnda n kɩt tɩ Kirisã ya kaool‑paalgã sɛ-yõakda, tɩ ne kũum ning sẽn ki tɩ beegr nins sẽn beeg pipi kaoolã pʋgẽ wã na paam sugrã, neb nins b sẽn boolã paama kãabg tɩ b na n paama pʋɩɩr sẽn paad wakat sẽn kõn sa.

¹⁶Bala, ned sã n bas koɛɛg a kũum poor yĩnga, rẽndame tɩ b sɩd yã t'a soabã kiime.

¹⁷Sɩd me, koɛɛg kũum poor yĩng ka tar yõodo, sã n ka a soabã kũum poor ye. Bala, a soabã sã n ket n vɩ, gomdã ka tõe n maan bũmb ye.

¹⁸Rẽnda n kɩt tɩ pipi kaoolã ka sɩng tɩ ka yɩ ne zɩɩm daagr ye.

¹⁹Sɩd me, a Moyiis sẽn wilg nebã fãa Wẽnnaam yeelsmã fãa yembr-yembr wa tõogã sẽn yetã, a rɩka nag-bi ne boeese, la koom, la pe-kõbd sẽn ning monem, la izop n mes sebrã menga, la nebã fãa n yeele:

²⁰Woto yaa kaool ning Wẽnnaam sẽn yeel tɩ y maanã zɩɩm.

²¹A mesa wẽnd doogã la kaorengã teedã fãa ne zɩɩmã a woto me.

²²Sã n yaa ne tõogã, yaa ne zɩɩm la sẽn kolg bũmbã fãa lebgd yɩlemde. La zɩɩm sã n ka raage, sugr ka be ye.

²³Dẽ, dag n yaa tɩlɛ tɩ kɩreng a yembre, bũmb nins sẽn mamsd sẽn be-b arzãnã paam yɩlgr a woto, la kɩreng a to me, arzãn bũmbã sẽn yaa sɩd-sɩdã me paam yɩlgr ne maoong sẽn yaa sõama n yɩɩda.

²⁴Bala, Kiris ka kẽ manegr doog ning neb nus sẽn ti n mams a meng-mengã ye, la yaa arzãna, n na n yals Wẽnnaam taoor moasã tõnd yĩnga.

²⁵Bãmb ka kẽ be n na n maand b meng maoong naoor wʋsg wa maan-kʋʋd kãsmã sẽn kẽed manegr doogẽ wã yʋʋmd fãa ne bũmb a to zɩɩmã ye.

²⁶Bala, sã n da yaa a woto, Kiris rag n na n namsẽ‑la naoor wʋsg dũni naaneg tɛk tɩ ta moasã. La moasã sẽn yaa yaoolem wakatã, bãmb puka vugr bala, n na n sãam yel-wẽnã ne b meng sẽn yɩ maoongã pãnga.

²⁷A wa a sẽn be ned fãa zug tɩ ki vugr bala (la kũumã poore, bʋʋd n watã),

²⁸woto me, Kiris sẽn kõ b meng vugr bal n na n tʋk neb wʋsg yel-wẽnã, b na n puka naoor a yiib soaba, la ka yel-wẽnã yĩng ye, la yaa neb nins sẽn gũud bãmb n na n paam fãagrã yĩnga.