Read SEBR SÕNGO, 1998 Zake 1 Bible Online

Zake 1 - SEBR SÕNGO, 1998 bible

Zake 1

¹Wẽnnaam la Zu-soab a Zeezi Kiris tẽn-tʋmd a zak n gʋlsd buud piig la a yiibã sẽn sãeegã, n pʋʋsd-ba.

²M ba-biisi, makr buud toay-toay sẽn tõe n paam yãmbã, ges-y-b wa bũmb sẽn wat ne yãmb sũ-noog zãnga,

³yãmb sẽn mi tɩ y tẽebã makr wata ne sũ-marã yĩnga.

⁴La yaa tɩlɛ tɩ sũ-mar maan a tʋʋmd sẽn zems zãnga, tɩ yãmb zems zãnga la y yɩ neb sẽn bɩ, la tɩ bũmb da paoog yãmb ye.

⁵Yam sã n paoog yãmb ned a yembre, bɩ a kos Wẽnnaam sẽn kõt nebã fãa ne yamleoog n ka lengdẽ wã, la b na kõ-a yamã.

⁶La a sã na n kos bɩ a kos ne tẽeb n da sãmb ye: Bala, ned ning sẽn sãmbd wẽnda wa ko-kãseng ko-pɛm sobg sẽn lengd la a zẽkdẽ.

⁷Bɩ ned a woto da tags t'a na n paama bũmb Zu-soabã nengẽ ye.

⁸A yaa ned sẽn yaa yam a yiib soaba, t'a yam yuusd a sẽn maandã fãa pʋgẽ.

⁹Bɩ ba-biig sẽn yaa naong soab maan sũ-noog ne Wẽnnaam sẽn waoog-a wã.

¹⁰La bɩ arzɛk soab maan sũ-noog ne Wẽnnaam sẽn ning yẽnda paoogr zĩigẽ wã. Bala, yẽnda na n looga wa mood puudu.

¹¹Wĩntoog zẽkame tɩ zĩig fãa wɩnge. A kʋɩɩsa moodã, la a puudã sʋʋgame, la a ra-sãndã menemame. Arzɛk soab me na n zelga a woto a tʋʋma pʋse.

¹²Ned ning sẽn yas kãenkãe makr pʋgẽ la sũ-noog soaba. Bala, makrã zugẽ, a na n paama vɩɩm sẽn yaa keoor Zu-soabã sẽn kãab neb nins sẽn nong bãmbã.

¹³Bɩ ned baa a yembr sẽn paamd makr da yeel tɩ yaa Wẽnnaam n makd yẽnda ye. Bala, wẽng ka tõe n mak Wẽnnaam, la bãmb mengã ka makd ned baa a yembr ye.

¹⁴La ned kam fãa paamda makre, a mengã ratem sẽn tusd-a n belgd-a wã yĩnga.

¹⁵La yĩngã ratem sã n dɩk pʋga, a rogda yel-wẽnde. La yel-wẽndã sã n wa n bɩ, a wata ne kũum.

¹⁶M ba-bi-nongdse, da tudg-y y mens ne yel-kãng ye:

¹⁷Kũun-sõng fãa la kũun sẽn zems zãng fãa yita yĩngri, vẽenem ba wã nengẽ. Tekre, wall toeoong ka be bãmb pʋgẽ baa bilf ye.

¹⁸Bãmb n dog tõnd wa sẽn zems b raabo, sɩd-goamã maasem yĩnga, tɩ tõnd na lʋɩ bãmb bõn-naandsã fãa taoore.

¹⁹M ba-bi-nongdse, bãng-y yõwã neere: Woto, bɩ ned fãa wɩng ne kelgre, la a maag ne goamã, la a maag ne sũ-yikri.

²⁰Bala, ninsaal sũ-yikr ka wat ne tɩrlem Wẽnnaam nifẽ ye.

²¹Yaa woto yĩnga, bas-y rẽgd buud fãa, la pʋ-toog fãa, la y reeg gomd ning b sẽn bʋd yãmb pʋgẽ la sẽn tõe n fãag yãmb sɩɩsã ne sũ-bʋgsem.

²²Yɩ-y koe-sakdba, la y ra yɩ koe-kɛlgdb bala, n belgd y mens ne tagsd sẽn ka sɩd ye.

²³Bala, ned sã n kelgd gomdã n ka sakdẽ, a soab wẽnda wa ned sẽn get a meng nen-gɛtgẽ,

²⁴la a sã n ges n sa, a loogdame, la tao-tao bala a yĩmda a sẽn dag n yaa to-to.

²⁵La ned ning sẽn get tõog sẽn zems zãngã, sẽn yaa lohorem tõogã, la a maoodẽ, n ka kelgd bal la a yĩmdẽ wã, la a maood n sakdẽ wã, nin‑kãng na paam Wẽnnaam bark a sẽn maandã pʋgẽ.

²⁶Ned sã n tẽed t'a yaa wẽn-tũuda, n yaool n ka tõe a zelemde, a belgda a menga, la nin-kãng wẽn-tũudma yaa zaalem bala.

²⁷Ba a Wẽnnaam taoore, wẽn-tũudum sẽn yaa yɩlemde, n ka tar wada, yaa tɩ kẽng n ges kɩɩbse la pʋg‑kõap b yel-pakr pʋse, la tɩ gũus f meng ne dũni rẽgdo.