Read SEBR SÕNGO, 1998 Zake 3 Bible Online

Zake 3 - SEBR SÕNGO, 1998 bible

Zake 3

¹M ba-biisi, bɩ yãmb neb wʋsg da bao tɩ lebg karen-saam-dãmb ye. Bala, yãmb miime tɩ tõnd karen-saam-dãmbã bʋʋd na n yɩɩ toog n yɩɩda.

²Tõnd fãa tudgda ne tuudg buud wʋsgo. Ned sã n ka tudg ne a goamã, a yaa ned sẽn zems zãnga, n tõe n gãd a yĩngã tõre.

³Tõnd sã n ningd wiid noy salba tɩ b na sak tõndo, tõnd kɩtdame tɩ b yĩngã kẽnd tõnd sẽn datẽ.

⁴Ges koom-kogl-bɛdã me, baa b sẽn yaa bɛd to-to, tɩ sob-kãseng tusd-ba, yaa koom-koglg wẽnemdedg-bil bal n kɩtd tɩ koglgã teesd a soabã sẽn datẽ.

⁵Woto me, zelemd yaa yĩngã wil-bil a yembre, la a waoogda a meng ne bũmb kãsemse. Ges-y bug-bil bal sẽn tõe n yõog we-kãsengã.

⁶Zelemd me yaool n yaa bugum, a yaa wẽng zĩ-kãsenga. Zelemd bee tõnd yĩnga wila sʋka, a rẽgemda yĩngã tõre, la a wɩngda tõnd vɩɩmã tõr t'a lebg basɩ. A bugmã yita bug-tẽnga.

⁷Ninsaal wõra we-rũmsã buud fãa, liuuli buud fãa bõn-vuuds buud fãa, koomẽ rũms buud fãa, n kɩt tɩ b sakd yẽnda.

⁸La ned baa a yembr ka tõe n tõog a zelemd t'a sak-a ye. A yaa wẽng ned sẽn ka tõe n wõr n tõog ye. A pida ne zẽnem-kʋʋdga.

⁹Tõnd pʋʋsda Zu-soabã sẽn yaa tõnd ba wã bark ne d zelemdã, la yaa ne yẽnda me la tõnd kãabd neb nins Wẽnnaam sẽn naan n wẽneg b mengã.

¹⁰Bark la kãab-wẽng yita noor a yembr pʋgẽ. M ba-biisi, a ka tog n yɩɩ a woto ye.

¹¹Dẽ yĩnga, ko-noog ne ko-tood tõe n bula ko-nif a yembrẽ?

¹²Dẽ yĩnga m ba-biisi, kankang tõe n woma oliiv‑rãmb sɩda, bɩ reezẽ tɩɩg tõe n woma kankama? Ko-nif sẽn yiisd ko-yamsem ka tõe n yiis ko-noog ye.

¹³Ãnda yãmb sʋkã n yaa yam soaba, t'a yam weke? Bɩ a yel-manesem-sõngã wilg a tʋʋm sẽn yɩt ne bʋgsem la yam.

¹⁴La sũ-ki-toaag sã n be yãmb sũuri, tɩ geesem-geesem me beẽ, da waoog-y y mense, la y da yag zĩrẽ n kɩɩs sɩdã ye.

¹⁵Yam‑kãng ka yam sẽn yit yĩngr ye. A yita tẽng zug n yaa yĩng rẽnda, la zĩn-dãmb dẽnda.

¹⁶Bala, sũ-kĩir la geesem-geesem sẽn be zĩig ningã, zũnglug la maan wẽns buud fãa bee be.

¹⁷Yam sẽn yit yĩngrã yaa sõama zãnga, la sẽn paase, a baooda laafɩ, a wata ne sũ-bʋgsem, la sugri, la a pida ne nimbãan-zoeere la bi-sõamyã fãa, la a ka be bakre, la zãmb ye.

¹⁸Tɩrlem bil bʋta laafɩ pʋgẽ, la yaa laafɩ baoodbã n bʋt-a.