Read SEBR SÕNGO, 1998 2 Pɩyɛɛre 1 Bible Online

2 Pɩyɛɛre 1 - SEBR SÕNGO, 1998 bible

2 Pɩyɛɛre 1

¹Maam a Sɩmo Pɩyɛɛr sẽn yaa a Zeezi Kiris yamba, la b tẽn-tʋmdã n tʋmd seb-kãngã neb nins sẽn paam tẽeb sẽn tar yõod wa tõnd dẽnda nengẽ. Yaa tõnd Wẽnnaamã ne d Fãagd a Zeezi Kiris tɩrlem tʋʋmdã maasem yĩng la d paam-a.

²Bɩ yãmb sẽn bãng Wẽnnaam ne tõnd Zu-soab a Zeezi wã kɩt tɩ y paam bark la laafɩ wʋsgo.

³Wẽnnaam pãngã kõo tõnd bũmb ning fãa sẽn tõe n sõng tõnd tɩ d vɩɩmd Wẽnnaamã tũudum pʋgẽ, la a kɩt tɩ d bãng soab ning sẽn bool-a tõnd tɩ d paam bãmb ziirã ne b sõmblmã.

⁴Yaa bõn-kãens maasem yĩng la b kõ tõnd kãabs nins sẽn yaa sõama la kãsemsã, tɩ yãmb sã n zoe n bas ratem-wẽnsã sẽn be dũniyã n wat ne sãoongã, kãab‑kãens yĩnga, yãmb na paam Wẽnnaam yalẽ wã.

⁵La bõn-kãng yĩng me, maan-y y pãng sẽn tõe fãa, tɩ y tẽebã naag ne sõmblem, tɩ y sõmblmã naag ne bãngre.

⁶La bãngrã pʋgẽ, bɩ y mao n paas yõk-m-menga la yõk-m-menga pʋgẽ, bɩ y paas sũ-tõogo, la sũ-tõogã pʋgẽ, bɩ y paas Wẽnnaam sakre.

⁷La Wẽnnaam sakrã pʋgẽ, maan-y taab ba-biir manesem la ba-biirã manesem pʋgẽ, paas-y nonglem.

⁸Sɩd me, bõn-kãensã sã n be yãmb pʋsẽ, la b sã n paamd pãng be n paasdẽ, b na n kɩtame tɩ yãmb maan tʋʋmã la y wom biis sẽn na n kɩt tɩ yãmb bãng tõnd Zu-soab a Zeezi Kiris n paase.

⁹La ned ning sẽn ka tar bõn-kãens yaa zoanga, la a nina mumame, la a yĩmdame tɩ yẽnda paama pekr ne yel-wẽn nins yẽnda sẽn da maan tɩ loogã.

¹⁰M ba-biisi, yaa woto yĩnga, modg-y n yals-y kãenkãe Wẽnnaam sẽn bool yãmbã pʋgẽ, la b sẽn yãk yãmbã pʋgẽ, yãmb sã n maan woto, yãmb kõn tol n bʋdg n bas y tẽebã ye.

¹¹Yaa woto n na n kɩt tɩ b kõ yãmb noor zãnga, tɩ y kẽ tõnd Zu-soab la d fãagd a Zeezi Kiris soolem sẽn kõn sa wã pʋgẽ.

¹²Yaa woto yĩng tɩ mam na n tẽegd yãmb bõn-kãens daar fãa, baa ne yãmb sẽn zoe n mi-bã, la y sẽn yas kãenkãe sɩd-kãngã pʋgẽ wã.

¹³Mam tagsame tɩ yaa neere, tɩ mam sẽn ket n vɩ yĩn-kiid-kãngã sẽn yaa wa fu-roogã pʋga, bɩ m tẽeg-y tɩ y ra gũs ye.

¹⁴Bala, mam miime tɩ sã n yɩ bilfu, mam na n yii yĩn-kiid-kãngã pʋgẽ, wa tõnd Zu-soab a Zeezi Kiris sẽn vẽneg-a ne maamã.

¹⁵La mam na n modgame tɩ mam loogr poore, bɩ yãmb tõog n tẽegd bõn-kãens yell bũmb fãa pʋgẽ.

¹⁶Sɩd me, tõnd ka tũnug soalem b sẽn tags n naane, n togs yãmb tõnd Zu-soab a Zeezi Kiris pãn-kãsengã la bãmb waoongã yell ye, la yaa tɩ tõnd mens nin yãnda bãmb ziirã.

¹⁷Bala, bãmb deega waoogr la ziir tõnd Ba a Wẽnnaam nengẽ. Yaa bãmb sẽn wa n wʋm naam sẽn be ziirã koɛɛg sẽn gom ne bãmb n yeel tɩ: Ada yaa mam bi-ribl‑nongr sẽn ta mam yam zãnga.

¹⁸Yaa tõnd sẽn wa n be tãn-sõngã zug ne bãmbã la tõnd wʋm koe-kãng sẽn yi arzãn n gome.

¹⁹Tõnd leb n mii vẽeneg tɩ pĩnd-n-bãngr goam sẽn da togsã yaa sɩda. Yaa neer tɩ yãmb ges bõn-kãens wa y sẽn get fɩtl sẽn be zĩ-likẽ n yãgd n gũud hal beoog sẽn na n vẽeg tɩ yibeoog ãdgã yãg yãmb sũyã pʋse.

²⁰Sẽn deng bũmb fãa, bãng-y tɩ ned ka be n tõe n bilg Wẽnnaam gʋls-sõamyã pĩnd-n-bãngr gomd baa a yembr võor ne a meng pãng ye.

²¹Bala, pĩnd-n-bãngr gomd baa a ye zɩ n tol n yɩ ne ninsaal tʋlsem ye, la yaa Sɩɩg-sõng sẽn kõ bũmb ningã la ninsaalbã reegd n togsd Wẽnnaam yĩnga.