Read SEBR SÕNGO, 1998 1 Zã 2 Bible Online

1 Zã 2 - SEBR SÕNGO, 1998 bible

1 Zã 2

¹Mam kom-bãoonego, m gʋlsda yãmb bõn-kãngã sẽn na yɩl tɩ y ra maan yel-wẽn ye. La ned sã n maan yel-wẽnã, tõnd tara sɛ-yõakd sẽn be d ba wã nengẽ: Yaa tɩrlem soab a Zeezi Kirisi.

²B talla a Zeezi meng n maan maoong tõnd yel-wẽnã sugr kũun yĩnga, la ka tõnd bal yel-wẽnã yĩng ye, la dũni nebã fãa me yel-wẽnã yĩnga.

³Tõnd sã n sak Wẽnnaam tõodã, dẽ tõnd miime tɩ d bãnga bãmba.

⁴Ned ning sẽn yet t'a mii Wẽnnaam la a yaool n ka sakd b tõodã, yẽnda soab yaa zĩrẽ yagda, la sɩd ka be yẽ pʋgẽ ye.

⁵La ned ning sẽn sakd Wẽnnaam goamã, a wilgdame t'a nonga Wẽnnaam sɩd-sɩda. Ad tõnd sẽn tõe n bãng to-to tɩ d bee bãmb pʋgẽ:

⁶Sẽn yet-a tɩ yẽnda paada Wẽnnaam pʋgẽ, tog n kẽnda wa a Zu-soabã sẽn dag n kẽndã.

⁷M kom-nongdse, ka tõ-paalg la mam gʋlsd yãmb ye, yaa tõ-kʋdg yãmb sẽn dag n paam hal sɩngrẽ wã. Tõ-kʋdg kãng yaa koɛɛg ning yãmb sẽn dag n wʋmã.

⁸Mam sẽn gʋlsd yãmbã yaa tõ-paalg me. Yel-kãng yaa sɩd Zu-soabã pugẽ, la yãmb pʋse. Bala, lik bida wã loogdame, la vẽenem sɩd-sɩdã zoe n yãgdame.

⁹Ned ning sẽn yet t'a bee vẽenemẽ n yaool n kis a ba-biiga, a ket n bee lik bida pʋgẽ.

¹⁰Ned ning sẽn nong a ba-biig bee vẽenemẽ bũmb ka be n na n lub-a ye.

¹¹La ned ning sẽn kis a ba-biig bee lik bida pʋgẽ. Yẽ kẽnda likã pʋgẽ, n ka mi a sẽn dabdẽ ye, bala likã kɩtame t'a ninã ka ne ye.

¹²Kom-bãoonego, mam gʋlsda yãmb tɩ bala, Kiris yʋʋrã yĩnga yãmb paama y yel-wẽnã sugri.

¹³Ba-rãmba, mam gʋlsda yãmb tɩ bala, yãmb sẽn bãng soab ning sẽn be-a hal sɩngr wẽndẽ wã yĩnga. Kom-bɩɩse, mam gʋlsda yãmba, tɩ bala, yãmb tõoga wẽng soabã. Kom-bãoonego, mam gʋlsa yãmba, tɩ bala, yãmb bãnga d ba wã.

¹⁴Ba-rãmba, mam gʋlsa yãmba, tɩ bala, yãmb bãnga soab ning sẽn be hal sɩngr wẽndẽ wã. Kom-bɩɩse, mam gʋlsa yãmba, tɩ bala, yãmb tara pãnga, tɩ Wẽnnaam goamã be yãmb pʋgẽ, la tɩ y tõoga wẽng soabã.

¹⁵Da nong-y dũni wã, wall bũmb ning sẽn be a pʋgẽ wã ye. Ned sã n nong dũni wã, d ba wã nonglem ka be a soab pʋgẽ ye.

¹⁶Bala, bũmb nins fãa sẽn be dũniyã pʋgã, sã n ya yĩng ratem wẽngã, la ninã sẽn get bũmb nins n datã, la wilg-m-meng arzegs sẽn wat ne wã ka yit Wẽnnaam nengẽ ye, a yita dũni nengẽ.

¹⁷Dũni loogdame la a ratem wẽngã me loogdame. La ned ning sẽn maand Wẽnnaam daab paada wakat sẽn kõn sa.

¹⁸Mam kom-bãoonego, moasã yaa yaoolem wakate. Wa yãmb sẽn dag n wʋm tɩ Kiris kɩɩsd n watã, ad Kiris kɩɩsdb wʋsg n be moasã. Rẽ kɩtame tɩ tõnd miẽ tɩ yaa yaoolem wakate.

¹⁹Bãmb yii tõnd sʋka, la b rag n ka tõnd neb ye. Tɩ bõe, bãmb sã n dag n yaẽ tõnd nebã, b dag n na n paa ne tõndo. La b sẽn maan to-to wã wilgda vẽeneg tɩ ka nebã fãa n yaa tõnd neb ye.

²⁰Yãmb mensã paamame tɩ soab ning sẽn welg-a toorã kõ yãmb b Sɩɩgã, la yãmb fãa tara bãngre.

²¹Mam sẽn gʋls yãmbã, ka tɩ yãmb ka mi sɩdã ye, la yaa yãmb sẽn mi-a wã yĩnga, la zĩrẽ sẽn ka yit sɩd pʋgẽ wã yĩnga.

²²Ãnda la zĩrẽ yagdã, sã n ka ned ning sẽn kɩɩsd t'a Zeezi ka Kirisã? Ned ning sẽn yet t'a ka mi d ba wã ne b bi-riblã yaa Kiris kɩɩsda.

²³Ned ning fãa sẽn yet t'a ka mi bi-riblã ka tar ba wã me ye, la ned ning sẽn yet t'a mii biigã, a tara ba wã me.

²⁴Sã n yaa ne yãmba, koɛɛg ning yãmb sẽn dag n wʋm hal sɩngrẽ wã tog n paa yãmb pʋse. Bũmb ning yãmb sẽn wʋm hal sɩngrẽ wã sã n pa yãmb pʋse, yãmb me na n paa bi-riblã ne ba wã pʋga.

²⁵Ad bũmb ning Kiris sẽn kãab tõndã: Yaa vɩɩm sẽn kõn sa.

²⁶Mam gʋlsa yãmb bõn-kãense, neb nins sẽn belgd yãmba wɛɛngẽ.

²⁷La ne yãmba, Sɩɩg-sõng ning yãmb sẽn deeg bãmb nengẽ wã bee yãmb pʋse, la yãmb ka baood tɩ b zãms yãmb ye. La wa bãmb Sɩɩgã sẽn zãmsd yãmb bũmb fãa wã, tɩ yaa sɩdã, la ka zĩrẽ wã, woto me, bɩ y pa ne Kiris wa Sɩɩg-sõng sẽn zãms yãmb to-to wã.

²⁸La moasã, mam kom-bãoonego, bɩ y pa Kiris pʋga, tɩ bãmb sẽn na n wa pukã wakate, bɩ tõnd paam pɛl-kɛgenga, tɩ bãmb waoongã daare, yãnd kõn yõk tõnd bãmb taoor ye.

²⁹Yãmb sã n miẽ tɩ Kirisã yaa tɩrlem soaba, bɩ y bãng tɩ ned ning fãa sẽn maand sẽn yaa tɩrg yaa Wẽnnaam biiga.