Read SEBR SÕNGO, 1998 Bʋ‑kaoodba 1 Bible Online

Bʋ‑kaoodba 1 - SEBR SÕNGO, 1998 bible

Bʋ‑kaoodba 1

¹A Zozoe kũumã zugẽ, Israyɛll nebã soka Sẽn-Ka-Saab yaa: «Yaa bu-bʋg tõnd sʋkã, n tog n lʋɩ taoor n kẽng n tɩ zab ne Kana nebã?»

²Sẽn-Ka-Saab leokame yaa: «Yaa Zʋʋda buudã n tog n lʋɩ taoore, bala, mam ninga tẽngã bãmb nugẽ.»

³Zʋʋda buudã yeela Sɩmyõ buudã sẽn yaa bãmb ba-biisã yaa: «Wa-y n naag-y tõndo, tɩ d kẽng soolem ning b sẽn pʋɩ n kõ tõndã, n tɩ zab ne Kana nebã n deeg tẽngã. Dẽ poore, tõnd me na n naaga yãmb n tɩ zab n reeg y soolmã n kõ-yã.» Dẽ, a Sɩmyõ yagensã kẽng n tɩ naaga Zʋʋda yagensã.

⁴Zʋʋda buudã kẽnga zabrã, la Sẽn-Ka-Saab sõnga bãmb tɩ b tõog Kana nebã ne Perɛɛz-rãmbã, n kʋ b neb tus piig Bezɛke.

⁵Sɩd me, bãmb tɩ mika a Adoni-Bezɛk Bezɛk n zab ne-a, la b tõoga Kana nebã ne Perɛɛz-rãmbã.

⁶La a Adoni-Bezɛk zoeeme, la Israyɛll nebã rig-a lame n tɩ yõke, la b fiuusa a nug-raadã ne a nao-raadã. [1]

⁷La a Adoni-Bezɛk yeelame yaa: «Mam dag n fiuusa nanambs pis-yopoe nus-raad ne b nao-raad tɩ b wat n dɩgsd mam rɩ-kɛl n dɩtẽ. Dẽ wã, yaa Wẽnnaam n dol maam m tʋʋmde.» La b talla a Adoni-Bezɛk n kẽng Zeruzalɛm, la a kii be.

⁸Zʋʋda buudã kẽng n tɩ zaba ne Zeruzalɛm nebã n deeg tẽngã. Bãmb kʋʋ Zeruzalɛm nebã ne zabr sʋʋga la b yõog tẽngã bugum.

⁹Dẽ poore, Zʋʋda buudã kẽngame n na n tɩ zab ne Kana neb nins sẽn be tãmsã sʋkã, la sẽn be-b kunkubẽ wã ne sẽn be-b goabgã.

¹⁰Zʋʋda nebã kẽngame n tɩ zab ne Kana nebã sẽn be Ebrõ, b sẽn dag n boond tɩ Kiryat-Araba wã. La b tõoga Sesayi buudã, Ayimane buudã ne Talmayi buudã.

¹¹La bãmb yii beenẽ n kẽng n tɩ zab ne Debɩɩr nebã. Wakat sẽn looge, b rag n boonda tẽn-kãng tɩ Kiryat-Sefɛɛre.

¹²A Kalɛɛb [2] yeela a nebã yaa: «Ned ning sẽn na n tõog n zab n deeg Kiryat-Sefɛɛre, mam na n dɩka m bi-pugl a Aksa n kõ a soab t'a maan a paga.»

¹³A Kalɛɛb dag n tara yao t'a yʋʋr boondẽ t'a Kenaaze. A Kenaaz rag n tara biig t'a yʋʋr la a Otiniyɛlle, la yaa bi-kãng n tɩ zab n deeg tẽngã. Dẽ, a Kalɛɛb rɩka a bi-pugl a Aksa n kõ-a t'a maan a paga.

¹⁴A Aksa sẽn ta wã, a pẽdga a Otiniyɛll t'a kos a baaba t'a kõ-b pʋʋgo. La pagã siga a bõangã zugu, la a Kalɛɛb sok-a lame yaa: «Fo rata bõe?»

¹⁵A Aksa leokame: «M baaba, maan-y sugri, yãmb sẽn kõ maam zĩig ning sẽn be tẽngã goabgã yaa zĩ-koɛɛng fasɩ. Bɩ y kõ maam ko-bunds zĩis me.» La a Kalɛɛb kõo yẽnda ko-bundsã zĩis nins sẽn be kunkubẽ wã ne sẽn be-b tẽn-nabdrẽ wã.

¹⁶A Moyiis rɛɛmbã sẽn yaa Kɛn nedã yagensã tũu Zʋʋda yagensã n yi komsã tẽngã, n kẽng Zʋʋda weoogã sẽn yegd Araad goabgã, n tɩ zĩnd Amalɛk rãmbã sʋka.

¹⁷Zʋʋda buudã, ne a Sɩmyõ buudã sẽn yaa bãmb saam-biisã tũu taab n tɩ zab ne Kana nebã sẽn dag n be Sefatã. Bãmb sãama tẽngã zãnga, la b boola tẽn-kãng tɩ Horma, sẽn dat n togs tɩ ‹sãoongo.›

¹⁸Zʋʋda buudã leb n deega Gaaza ne a soolmã fãa, la Askalon ne a soolmã fãa, ne Ekrõ ne a soolmã fãa.

¹⁹Sẽn-Ka-Saab zĩnda ne Zʋʋda buudã tɩ b tõog n deeg zĩis nins sẽn be tãmsã sʋkã, la bãmb ka tõog n dig neb nins sẽn be-b tẽn-nabdrẽ wã n deeg b tẽngã ye. Bala, nin-bãmb dag n tara kut saar-dãmba.

²⁰B rɩka Ebrõ n kõ a Kalɛɛb wa a Moyiis sẽn dag n yeelã. La a Kalɛɛb tõog n diga a Anak buud a tãabã tɩ b yi beenẽ.

²¹A Benzame buudã ka tõog n dig Zebuus-rãmbã sẽn dag n be Zeruzalɛmã n deeg tẽngã ye. Dẽ kɩtame tɩ Zebuus-rãmbã kell n pa Zeruzalɛm ne a Benzame yagensã hal tɩ ta rũndã.

²²A Zozɛf yagensã me kẽng n tɩ zaba ne Betɛll nebã, la Sẽn-Ka-Saab zĩnda ne bãmba.

²³Bãmb tʋma gũudb tɩ b kẽng n tɩ ges Betɛll tẽngã. Tẽn-kãng yʋʋr dag n boondame tɩ Luuzi.

²⁴Gũudbã yãnda ned a yembr sẽn yit tẽngã pʋg n sok-a yaa: «D kotame tɩ f wilg tõnd d sẽn tõe n tũ zĩig ning n kẽ tẽngã pʋga. Woto, tõnd na n maan-f-la neere.»

²⁵La raoã wilg-b-la b sẽn tõe n tũ zĩig ning n kẽ tẽngã pʋga. Dẽ, bãmb kʋʋ tẽngã neb zãnga, la b basa rao ning sẽn wilg bãmb zĩigã ne a zakã rãmb tɩ b põse.

²⁶Raoã kẽnga Hɛt-rãmbã soolmẽ, la a tɩ tilga tẽng beenẽ n pʋd tẽngã yʋʋr tɩ Luuzi. Yaa yʋ-kãng n kell n pa tɩ ta rũndã.

²⁷A Manaase yagensã ka tõog n dig Bɛt-Seyã nebã ne b tẽn-bãoonegã, Taanak nebã ne b tẽn-bãoonegã, Door nebã ne b tẽn-bãoonegã, Yibleyam nebã ne b tẽn-bãoonegã, la b ka tõog n dig Megido nebã ne b tẽn-bãoonegã n deeg b tẽmsã me ye. Dẽ, Kana nebã kell n pa tẽngẽ be.

²⁸La Israyɛll nebã sẽn wa n paam pãnga, b modga Kana nebã tɩ b tʋmd bãmb tʋʋm-wɛglã, la b ka tõog n dig-b n deeg tẽngã ye.

²⁹Efrayiim yagensã ka tõog n rig Kana nebã sẽn dag n be Gezɛɛrã n deeg b tẽngã ye. Dẽ, Kana nebã kell n paa Efrayiim nebã sʋk Gezɛɛre.

³⁰Zabulõ yagensã ka tõog n dig Kitron ne Nahaloll nebã n deeg b tẽngã ye. Dẽ, Kana nebã paa Zabulõ nebã sʋka, la Zabulõ nebã modga bãmb tɩ b tʋmd bãmb tʋʋm-wɛglã.

³¹Asɛɛr yagensã ka tõog n dig neb nins sẽn be Ako ne Sɩdõ la sẽn be-b Halaabe, ne sẽn be-b Akziibã la sẽn be-b Helã wã, ne sẽn be-b Afik ne Rehoobã n deeg b tẽngã ye.

³²Woto, Asɛɛr nebã kell n vɩɩmda Kana nebã sẽn yaa tẽngã rãmbã sʋka, bala, b ka tõog n dig bãmb n deeg b tẽngã ye.

³³Neftali yagensã ka tõog n dig Bɛt-Semees ne Bɛt-Anat nebã n deeg b tẽngã ye. La bãmb kell n paa Kana nebã sẽn yaa tẽngã nebã sʋka, la b modga Bɛt-Semees ne Bɛt-Anat nebã tɩ b tʋmd bãmb tʋʋm-wɛglã.

³⁴Amoor-dãmbã riga Dan yagensã n lebs tãmsã zutu, n ka bas-b tɩ b sig tẽn-nabdrẽ wã ye.

³⁵Amoor-dãmbã kell n modg n paa Haar-Herɛɛs ne Ayalõ la Salbim, la a Zozɛf yagensã pãng yɩɩga bãmba, n modg-b tɩ b tʋmd bãmb tʋʋm-wɛglã.

³⁶Amoor-dãmbã tẽng toadg sɩnga ne Akrabim tãngã rʋʋdga, n tall n tãag Sela n ket n tutẽ.