Read SEBR SÕNGO, 1998 Bʋ‑kaoodba 11 Bible Online

Bʋ‑kaoodba 11 - SEBR SÕNGO, 1998 bible

Bʋ‑kaoodba 11

¹Galaad rao a Zefte rag n yaa tãb-bi gãndaoog halaale. Yẽnda rag n yaa pʋg-yoodr biiga. A ba wã yʋʋr dag n boondame t'a Galaade.

²A Galaad pag meng-mengã roga kom-dibli. La kom-dibli wã sẽn wa n bɩ n bãng b nense, bãmb riga a Zefte, n yeel-a: «Fo ka na n naag tõnd n paam pʋɩɩr tõnd ba wã zakẽ ye. Bala, fo yaa pag a to biiga.»

³Woto kɩtame t'a Zefte zoe n zãag ne a ba-biisã n tɩ zĩnd Toob tẽnga. La nin-yaals n tɩ naag a Zefte n sõngd-a tɩ b kẽnd n zabdẽ.

⁴Sẽn wa n kaoos bilfu, Amo-rãmbã yika zabr ne Israyɛll nebã.

⁵Wakat ning Amo-rãmbã sẽn wa n zabd ne Israyɛll nebã, Galaad kãsem-dãmbã kẽnga Toob tẽng n tɩ bool a Zefte.

⁶Bãmb yeela a Zefte yaa: «Wa-y n lebg-y tõnd tãb-biisã taoor soaba, tɩ d zab ne Amo-rãmbã.»

⁷A Zefte leoka Galaad kãsem-dãmbã yaa: «Yãmb kisga maam, n dig maam tɩ m yi n bas m ba wã zaka. Yãmb sẽn be yel-pakr pʋgẽ moasã wã la yãmb baood mam zĩiga?»

⁸Galaad kãsem-dãmbã yeela a Zefte yaa: «N-yẽe! Yaa tõnd sẽn be yel-pakr pʋgã la d wat n na n kos yãmba, tɩ y wa lʋɩ d taoore, n zab ne Amo nebã, la y lebg tõnd naaba, n soog Galaad nebã fãa.»

⁹A Zefte leoka Galaad kãsem-dãmbã yaa: «Sɩd-sɩdã, yãmb sã n tall maam n kuil tɩ m tɩ zab ne Amo nebã, la Sẽn-Ka-Saab sã n sõng maam tɩ m tõog-ba, maam n na n lebg yãmb naaba.»

¹⁰La Galaad kãsem-dãmbã yeela a Zefte: «Sẽn-Ka-Saab yaa tõnd kaset soaba. Tõnd na n maana wa yãmb sẽn yeelã.»

¹¹Dẽ, a Zefte tũu Galaad kãsem-dãmbã n looge. Israyɛll nebã rɩka a Zefte n kɩt t'a yɩ b taoor soaba, la b tãb-biis naaba. A Zefte yalsa Sẽn-Ka-Saab taoor Mispa n leb n togs goam nins fãa yẽnda sẽn dag n gomã.

¹²A Zefte tʋma neb tɩ b tɩ sok Amo-rãmba rĩm yaa: «Bõe beem n be maam ne yãmb sʋka, tɩ yãmb wat n na n zab ne mam tẽngã?»

¹³Amo-rãmbã rĩm leoka a Zefte nebã yaa: «Yaa tɩ Israyɛll nebã sẽn yi Ezɩpt tẽngã, b wa n deega mam tẽmse, sẽn sɩng ne Arno kʋɩlgã n tɩ tãag Yabok kʋɩlgã ne Zʋrdẽ kʋɩlgã. Lebs-y maam m tẽmsã tɩ ket n maasa.»

¹⁴A Zefte leb n tʋma neb Amo-rãmbã rĩm nengẽ,

¹⁵n yeel tɩ b tɩ yeel-a yaa: «A Zefte yeelame tɩ Israyɛll nebã ka reeg Moaab tẽnga, b leb n ka reeg Amo-rãmbã tẽng me ye.

¹⁶Sɩd me, Israyɛll nebã sẽn yi Ezɩpt tẽngã, bãmb pɩʋʋga we-raoogã, n tɩ ta rudum ko-kãsengã n kẽng Kadɛɛse.

¹⁷Dẽ, Israyɛll nebã tʋma neb tɩ b kẽng n tɩ kos Edom rĩmã t'a bas-b tɩ pɩʋʋg a soolmã n looge, la a ka sak ye. La Israyɛll nebã leb n tʋmame tɩ b tɩ kos Moaab rĩmã me t'a bas tɩ b pɩʋʋg a soolmã n looge, la yẽnda me zãgsame. Woto, Israyɛll nebã kell n paa Kadɛɛse.

¹⁸Dẽ, Israyɛll nebã pãrga we-rasempʋɩɩgã n gilg Edom ne Moaab tẽmsã, n tɩ tũ Moaab soolmã yaangã n looge. Bãmb tɩ siga Arno kʋɩlgã rʋʋnde, n ka sak n kẽ Moaab nebã soolmẽ ye. Bala, Arno kʋɩlgã yaa Moaab tẽngã toadga.

¹⁹Rẽ poore, Israyɛll nebã tʋma neb rĩm a Sihon sẽn yaa Amoor-dãmbã ne Ɛsbon tẽngã rĩmã nengẽ tɩ b tɩ yeel-a tɩ Israyɛll nebã yeelame, tɩ b kotame t'a bas tɩ b pɩʋʋg a tẽngã n loog n kẽng b sẽn tog n kẽngẽ wã.

²⁰La rĩm a Sihon sẽn ka bas yard ne Israyɛll nebã yĩnga, a ka sak tɩ b pɩʋʋg a soolmã n loog ye. Woto, a tigma a tãb-biisã n kẽng Yahats n tɩ zab ne Israyɛll nebã.

²¹Sẽn-Ka-Saab sẽn yaa Israyɛll Wẽnnaamã kɩtame tɩ bãmb nebã tõog a Sihon ne a nebã fãa. La Israyɛll nebã reega Amoor-dãmba soolem zãnga.

²²Israyɛll nebã tõog n deega Amoor-dãmbã soolem zãnga, sẽn sɩng ne Arno kʋɩlgã sẽn be goabgã, n tɩ tãag Yabok kʋɩlgã sẽn be rɩtgã, la sẽn sɩng ne we-rasempʋɩɩgã sẽn be yaangã n kell n tall n tɩ tãag Zʋrdẽ kʋɩlgã sẽn be nin-taoorã.

²³Sẽn-Ka-Saab sẽn yaa Israyɛll Wẽnnaamã kɩtame tɩ Israyɛll nebã tõog n dig Amoor-dãmbã n deeg b soolmã, tɩ yãmb yik moasã n dat n dig tõnd sẽn yaa Israyɛll nebã n yiisi!

²⁴Yãmb Wẽnnaam a Kemoos sẽn deeg tẽms ning n kõ yãmb tɩ y kẽedẽ wã ka yãmb n so la? Dẽ wã, Sẽn-Ka-Saab sẽn yaa tõnd Wẽnnaamã me sẽn deeg tẽms nins n kõ tõnd tɩ d soogã yaa tõnd dẽnda!

²⁵Yãmb yɩɩda a Sipoor biig a Balak sẽn dag n yaa Moaab rĩmã la? Yãmb yãnda a sẽn tol n bao Israyɛll nebã noore, bɩ yãmb zoe n yãnda a sẽn zab ne-ba?

²⁶Israyɛll nebã sẽn be Ɛsbon ne a tẽn-bãoonegã, la b be Arowɛɛr ne a tẽn-bãoonegã pʋsã, ne tẽms nins fãa sẽn be Arno kʋɩlgã noorã, yaa yʋʋm kobs-tã la woto. La maana a wãn tɩ yãmb ka rig bãmb wakat-kãnga?

²⁷Mam yẽ ka maan yãmb wẽng ye, yaa yãmb n maan maam wẽnga, n yik n baood zabr ne maam. Bɩ Sẽn-Ka-Saab meng sẽn yaa bʋ-kaoodã bʋ yell ning sẽn be Israyɛll nebã ne Amo nebã sʋkã bʋʋd rũndã.»

²⁸Amo-rãmbã rĩm ka kelg koɛɛg ning a Zefte sẽn tʋm yẽnda nengẽ wã ye.

²⁹Sẽn-Ka-Saab Sɩɩgã siga a Zefte zugu. La yẽnda saaga Galaad soolmã ne Manaase soolmã, n kell n tũ Mispa sẽn be Galaadã soolem. Yẽnda yii Mispa n pɩʋʋg n ta Amo nebã soolmẽ.

³⁰A Zefte maanã pʋleng ne Sẽn-Ka-Saab n yeel yaa: «Sẽn-Ka-Saabo, yãmb sã n sõng maam tɩ m tõog Amo nebã,

³¹mam sã n lebg n watẽ, ned ning sẽn na n yɩ-a pipi n yi mam zakẽ wã n seg maamã, mam na n dɩka yẽnda soab n maan maoong sẽn yõogd bugum yãmb yĩnga.»

³²Dẽ, a Zefte pɩʋʋga toadgã n kẽng n tɩ zab ne Amo-rãmbã, la Sẽn-Ka-Saab kɩtame t'a tõog-ba.

³³A Zefte tõoga Amo-rãmbã, sẽn sɩng ne Arowɛɛr n tall n tɩ tãag Minit sẽnẽ, la yaa tẽms pisi. Yẽnda rig-b lame n tɩ tãag Abɛll-Keramim. Amo-rãmbã rɩɩ yãnd Israyɛll nebã taoore.

³⁴A Zefte sẽn lebg n ta a yir Mispa, yẽnda yã a meng bi-puglã sẽn zãad gãngão-bil n wẽedẽ, la a saood n segd yẽnda. Yaool n yaa yẽnda la a bi-yende. Sã n ka bi-pugl-kãnga, a Zefte ka paam bi-ribla wall bi-pugl a to ye.

³⁵A Zefte sẽn yãnda a bi-puglã, yẽnda pãrsa a futu, n yeel yaa: «M ba yee! M biig sõngo, fo kõo maam sũ-sãanga! Fo kẽesa maam yel-kãseng pʋga. Mam goma wʋsg Sẽn-Ka-Saab taoore, la mam ka tõe n lebs m noorã poorẽ ye.»

³⁶Bi-puglã yeela a baaba yaa: «M baaba, sã n yaa tɩ yãmb goma wʋsg Sẽn-Ka-Saab taoore, tɩ Sẽn-Ka-Saab sõng yãmb tɩ y tõog n dok y sũur ne Amo-rãmbã sẽn yaa y bɛɛbã, bɩ y maan maam wa sẽn zems yãmb sẽn pʋlem bũmb ningã.»

³⁷Dẽ, bi-puglã yeela a baaba yaa: «Mam kot-y-la bũmb a yembr bala: Kõ-y maam kiis a yiibu, tɩ m kẽng tãmsã zutu, n bool m zo-rãmb tɩ d yãbe, mam sẽn ka paam n bãng raoã yĩnga.»

³⁸A Zefte yeela a biigã t'a kẽnge. La a kõo yẽnda weer kiis a yiibu. Bi-puglã peega a zo-rãmb tɩ b kẽng tãmsã zut n tɩ yãbe, yẽnda sẽn ka paam n bãng raoã yĩnga.

³⁹Kiis a yiibã sẽn pidi, bi-puglã lebg n waa a ba wã nengẽ. La a Zefte rɩka yẽnda n pids a pʋlengã wa yẽnda sẽn dag n pʋlmã. Bi-puglã kiime n ka bãng rao ye. Dẽ, sẽn sɩng ne wakat-kãnga, b rɩka bõn-kãng tɩ lebg mining Israyɛll buudã sʋka.

⁴⁰Woto, yʋʋmd fãa, Israyɛll kom-pugli wã kẽnd n yãbda Galaad rao a Zefte bi-puglã yĩng rasem a naase.