Read SEBR SÕNGO, 1998 Bʋ‑kaoodba 20 Bible Online

Bʋ‑kaoodba 20 - SEBR SÕNGO, 1998 bible

Bʋ‑kaoodba 20

¹Israyɛll nebã fãa naaga taab noor a yembre, n yi sẽn sɩng ne Dan buudã sẽn be rɩtgã, n tall n tɩ tãag Bɛɛr-Seba sẽn be goabgã, ne Galaad soolmã sẽn be yaangã, n wa tigim taab Sẽn-Ka-Saab taoor Mispa.

²Israyɛll buudã fãa kãsem-dãmb zãng tigma taab ne Wẽnnaam nebã. Bãmb sõorã rag n yaa tãb-biis tus kobs-naas sẽn kẽnd ne nao n zãad zabr sʋʋse.

³Benzame nebã wʋmame tɩ Israyɛll nebã kẽnga Mispa. Dẽ, Israyɛll nebã yeela pagã sɩdã t'a togs bãmb yel-be-kãngã sẽn yɩ to-to.

⁴Dẽ, Leevi nedã sẽn yaa pag ning b sẽn kʋ wã sɩdã yeelame: «Maam ne m pʋg-rɩkdgã kẽnga Gɩbeya sẽn yaa Benzame soolmã n na n tɩ yõg gãag sobendo.

⁵Gɩbeya tẽnga taoor dãmb yika ne yʋngo, n wa gũbg roog ning mam sẽn dag n be a pʋgẽ wã, n na n zab ne maam. Yaa mam mengã la b rag baood n na n kʋ. La b baas n modga mam pagã n yõg-a hal t'a ki.

⁶Dẽ, mam dɩka m pagã, n pas-a n tʋm Israyɛll buudã soolmã zĩiga fãa. Bala, nin-bãmbã sẽn maan bũmb ningã yaa yel-beed meng-meng Israyɛll pʋgẽ.

⁷Israyɛll nebã, yãmb fãa la sẽn be ka wã la! Yẽs-y ne taaba, n yãk yam zĩ-kãngã bala, ne yãmb sẽn na n maan bũmb ninga!»

⁸Dẽ, nebã fãa naaga taab noor a yembr n yik n yeele: «Tõnd ned ba a yembr ka na n kẽ a fu-roogẽ wall a lebg n kuil a yir ye.

⁹Ad tõnd sẽn na n maan Gɩbeya nebã bũmb ninga: Tõnd na n maana poeere, n bãng d sẽn na n tɩ zab ne-b to-to.

¹⁰Israyɛll buudã fãa sʋka, tõnd na n yãka neb piig neb koabg pʋgẽ, la d yãk neb koabg neb tusr pʋgẽ, la neb tusr neb tus-piig pʋgẽ. Nin-bãmb na n kẽngame, n tɩ bao rɩɩb n wa kõ Israyɛll neb nins sẽn kẽng n na n tɩ sɩbg Gibeya sẽn be Benzame soolmẽ wã nebã, wa sẽn zems yel-beed ning b sẽn maan Israyɛll pʋgẽ wã.»

¹¹Dẽ, Israyɛll nebã fãa naaga taab noor a yembr n na n tɩ zab ne Gɩbeya tẽngã.

¹²Israyɛll buudã tʋma neb tɩ b kẽng Benzame buudã fãa nengẽ n tɩ sok-b yaa: «Maana a wãn tɩ yel-beed a woto wa tʋmd yãmb sʋka?

¹³Tõnd datame tɩ yãmb yiis nin-yood nins sẽn be Gɩbeya wã n kõ tõnd tɩ d kʋ, n yiis wẽngã Israyɛll nebã sʋka.» La Benzame nebã ka kelg Israyɛll nebã sẽn yaa b saam-biisã goam ye.

¹⁴Benzame buudã neb yii b tẽmsẽ wã n tɩ tigim taab Gɩbeya n na n zab ne Israyɛll nebã.

¹⁵Badaare, b sõda Benzame buudã tãb-biisã sẽn yi b tẽmsẽ wã n wa wã, la b sõorã yaa neb tus pisi la a yoob sẽn zãad zabr sʋʋse, Gɩbeya tẽngã gãndaad kobs-yopoe wã sõor sẽn ka naage.

¹⁶Tãb-bi-kãensã fãa sʋka, gãndaad kobs-yopoe n dag n be beenẽ n yaa goaba. Bãmb ned ba a ye ka lobgd zoobg ne loaabg n yõsg ye.

¹⁷La b sõda Israyɛll nebã, n ka naag Benzame buudã neb ye. Israyɛll tãb-biisã sõor yaa tus kobs-naas sẽn zãad zabr sʋʋse, n mi zabr sõama.

¹⁸Dẽ, Israyɛll nebã yikame n kẽng Betɛll n na n tɩ sok Wẽnnaam yaa: «Yaa bu-bʋg tõnd sʋkã, n tog n lʋɩ taoor tɩ d kẽng n tɩ zab ne Benzame nebã?» La Sẽn-Ka-Saab leokame tɩ yaa Zʋʋda buudã n tog n lʋɩ taoore.

¹⁹Israyɛll nebã yika yibeoog pĩnda, n tɩ tilg b tãb-sikã n na n zab ne Gɩbeya nebã.

²⁰Woto, Israyɛll nebã sũu tãpo, n teedg n na n zab ne Benzame nebã, la b sega taab Gɩbeya neng taoore.

²¹Benzame buudã yii Gɩbeya n tɩ zab ne Israyɛll nebã, la badaare, b kʋʋ Israyɛll neb tus pisi la a yiibu.

²²Israyɛll nebã kẽnga Sẽn-Ka-Saab taoor n tɩ yãb tɩ wĩntoog kẽ. Bãmb soka Sẽn-Ka-Saab yaa: «Tõnd tog n lebg n kẽng n tɩ zaba ne Benzame buudã sẽn yaa tõnd saam-biisã bɩ?» La Zu-soabã yeel-b lame tɩ b kẽng n tɩ zab ne-ba. Dẽ, Israyɛll nebã paama raoodo, n leb sũ tãp zĩig ning bãmb sẽn dag n zĩnd pipi daarã.

²³

²⁴Rasem a yiibã daare, Israyɛll nebã kolgame n na n zab ne Benzame buudã.

²⁵Benzame nebã yii Gɩbeya badaar sẽn yaa rasem a yiibã daarã n na n seg Israyɛll nebã, la bãmb kʋʋ Israyɛll neb tus piig la nii. La neb nins sẽn ki wã yaa neb sẽn tõe n tall zabr sʋʋg n zabe.

²⁶Dẽ, Israyɛll tãb-biisã ne nebã fãa kẽnga Betɛlle, n tɩ pa be n yãb Sẽn-Ka-Saab taoore, la b loe noor badaar hal tɩ ta zaabre, la b maan maand sẽn yõogd bugum, la zems-n-taar maando, n kõ Sẽn-Ka-Saabo.

²⁷Wakat-kãng tɩ Sẽn-Ka-Saab kaoolã koglgã rag n bee Betɛlle, la yaa a Aarõ biig a Eleyazaar biig a Fineyaas n dag n yaa maan-kʋʋda. Dẽ, Israyɛll nebã soka Sẽn-Ka-Saab n na n bãng b sã n tog n kẽng n tɩ zaba ne Benzame buudã sẽn yaa b saam-biisã, bɩ b ka tog n kẽnge. La Sẽn-Ka-Saab leokame n yeele: «Kẽng-y-yã! Bala beoogo, mam na n kɩtame tɩ y tõog Benzame nebã.»

²⁸

²⁹Woto, Israyɛll nebã kɩtame tɩ neb kẽng n tɩ soond n gũbg Gɩbeya.

³⁰Dẽ, rasem a tãabã daare, Israyɛll nebã kẽngame n tɩ zab ne Benzame buudã. Bãmb kẽng n tɩ sũu tãp Gɩbeya tẽngã noor wa raasenkamã.

³¹La Benzame nebã yiime n na n seg Israyɛll nebã n zabe. Dẽ, Israyɛll nebã basame tɩ Benzame nebã rig-b n zãag ne Gɩbeya tẽngã. Benzame nebã sɩngame n kʋʋd Israyɛll nebã Betɛll ne Gɩbeya soayã zut wa raasenkamã, hal n tɩ kẽ weoogã la b kʋʋ Israyɛll neb sẽn kolg pis-tã.

³²Benzame buudã rag n tagsdame tɩ bãmb tõoga Israyɛll nebã wa pĩndã, n digd-b tɩ b zoetẽ. La Israyɛll nebã rag n yetame: «Wa-y tɩ d zoe, tɩ b pʋg tõnd n zãag ne b tẽngã n ta soayã zutu.»

³³Dẽ, Israyɛll nebã fãa yii bãmb sẽn be zĩig ningã, n kẽng n tɩ sũ tãp Baall-Tamaar n na n zabe. Dẽ, Israyɛll neb nins sẽn dag n soond n gũbg tẽngã yii Geba tẽn-nabdrẽ wã, zĩig ning bãmb sẽn dag n soondã n na n zabe.

³⁴Israyɛll gãndaad tus piigã b sẽn dag n yãk Israyɛll buudã fãa pʋgẽ wã kẽng n tɩ teedga Gɩbeya tẽngã neng taoore. Zabrã yɩɩ toog wʋsgo, la Benzame buudã rag n ka mi tɩ toog n na n paam-b ye.

³⁵Sẽn-Ka-Saab kɩtame tɩ Israyɛll nebã tõog Benzame buudã n dig-b tɩ b zoe. La badaare, Israyɛll nebã kʋʋ Benzame buudã tãb-biis tus pisi la a nu, la neb koabga. Neb nins sẽn ki-bã rag n yaa tãb-biis sẽn zãad zabr sʋʋs n zabdẽ.

³⁶La Benzame nebã mikame tɩ Israyɛll nebã tõoga bãmba. Israyɛll nebã rag n targame n bas Benzame nebã, bala, bãmb dag n teega neb nins sẽn dag n tɩ soond n gũbg Gibeya wã.

³⁷Neb nins sẽn dag n soondã yii tao-tao n kẽ Gɩbeya tẽngã n kʋ neb nins fãa sẽn dag n be tẽngã pʋgã ne zabr sʋʋse.

³⁸Israyɛll nebã rag n seda ne b neb nins sẽn dag n tɩ soondã, n yeel-b tɩ b sã n kẽ Gɩbeya tẽngã, bɩ b kɩt tɩ bug-zõos yi tẽngã pʋgẽ n zẽke.

³⁹Dẽ, Israyɛll nebã wẽnemdame n na n zab ne Gɩbeya nebã. La Benzame nebã sẽn dag n zoe n kʋ Israyɛll neb kolga pis-tã, la b rag n tagsdame tɩ b leb n tõoga Israyɛll nebã wa pĩndã.

⁴⁰La Wakat-kãng bala, bug-zõos n sɩng n nukd Gɩbeya tẽnga pʋga. Benzame nebã sẽn wẽnemd n ges b poorẽ, b mikame tɩ tẽngã tõr dɩt bugum t'a bug-zõosã tʋkd n kuiis yĩngri.

⁴¹Dẽ, Israyɛll nebã wẽnemdame n zabd ne Benzame nebã. Benzame nebã sẽn mik tɩ lebga yell ne-bã, rabeem kãseng yõk-b lame.

⁴²Dẽ, Israyɛll nebã riga Benzame nebã tɩ b zoe n tees we-rasempʋɩɩgã sẽnẽ. La ne rẽ fãa, Benzame nebã ka tõog n põs zabrã ye. Bala, Israyɛll neb nins sẽn dag n kẽ-b Gibeya tẽngã yi n naaga Israyɛll neb a taabã tɩ b gũbg Benzame nebã sʋka, n kʋ-b zãnga.

⁴³Bãmb gũbga Benzame nebã, n dig-b n tɩ tãag Gɩbeya tẽngã wĩndg sẽn yitẽ, n sãam-ba.

⁴⁴Benzame nebã tãb-biis tus piig la a nii n pa zabrẽ wã. Bãmb fãa rag n yaa gãndaado.

⁴⁵Benzame neb nins sẽn dag n zoe n kẽ we-rasempʋɩɩgã n tees Rimo pĩigã sẽnẽ wã sʋka, Israyɛll nebã paama bãmb neb tus a nu sorã zut n kʋ. La b kell n diga bãmb n tãag Gɩdeyom n kʋ bãmb neb tus a yiibu.

⁴⁶Benzame neb nins sẽn pa zabrã pʋgẽ badaarã sõor yaa tãb-biis tus pisi la a nu sẽn zãad zabr sʋʋse. Bãmb fãa rag n yaa gãndaado.

⁴⁷La baoosgo, Benzame neb nins sẽn dag n zoe n kẽ we-rasempʋɩɩgã n tees Rimo pĩigã sẽnẽ wã sʋka, neb kobs-yoob n põse. Bãmb paa beenẽ kiis a naase.

⁴⁸Dẽ, Israyɛll nebã lebg n waa Benzame nebã nengẽ n tɩ kʋ-b fãa ne zabr sʋʋga. B sãama tẽngã zãnga, n kʋ baa ne rũmsã, la ne bõn-vɩɩlɩ nins fãa sẽn be tẽngã pʋgã. Israyɛll nebã yõoga tẽms nins fãa bãmb sẽn tɩ mik beenẽ wã bugum.