Read SEBR SÕNGO, 1998 Bʋ‑kaoodba 7 Bible Online

Bʋ‑kaoodba 7 - SEBR SÕNGO, 1998 bible

Bʋ‑kaoodba 7

¹A Zedyõ b sẽn boond t'a Zerubaallã, ne tãb-biis nins fãa sẽn dag n be ne yẽnda wã yika tõd-beoogo, n kẽng n tɩ tilg b tãb-sikã n pẽneg Harood ko-bundmã zĩiga. La Madiyã nebã tãb-sik rag n bee a Zedyõ rãmb tãb-sikã rɩtgo, sẽn sɩng ne Moore kunkubrã n tall n tɩ tãag tẽn-nabdrã.

²Sẽn-Ka-Saab yeela a Zedyõ yaa: «Tãb-biisã sẽn be ne foomã sõor yaa wʋsg tɩ looge. Mam sã n kɩt tɩ b tõog Madiyã nebã, Israyɛll nebã na n wuka b mens n yeel tɩ yaa ne bãmb meng pãng la b tõog n fãag b mense.

³Rẽ wã, bɩ f moon n yeel tãb-biisã fãa, tɩ ned ning sẽn yɛɛsd n digda, bɩ a yi Galaad tãngã zug ka moas-moasã bal n lebg n kuili.» Zĩig pʋgẽ bala, raop tus pisi la a yiib n yi tãb-biisã sʋk n lebg n kuili, n bas neb tus-piiga.

⁴La Sẽn-Ka-Saab yeela a Zedyõ yaa: «Nebã ket n yaa wʋsgo. Kɩt tɩ b kẽng koomã noore, la beenẽ, mam na n yãka sẽn tog n tũ-b foomã n kõ-fo. Mam sẽn na n yeel tɩ ned ning tũ foom, yaa yẽnda soab n na n tũ foom. La ned ning mam sẽn na n yeel t'a ka tog n tũ foomã, a ka tog n tũ ye.»

⁵Dẽ, a Zedyõ talla nebã n kẽng koomã noore, la Sẽn-Ka-Saab yeela yẽnda yaa: «Welg neb nins fãa sẽn na n kaad koomã ne b nus n legd wa baasã toore, la f welg neb nins sẽn na n yĩgimd b rũmã zut n yũud koomã me toore.»

⁶Neb nins sẽn dag n kaad koomã ne b nus n yũudã sõor yaa raop kobs-tã, la neb nins sẽn ketã fãa yĩgimda b rũmã zut n na n yũ koomã.

⁷Dẽ, Sẽn-Ka-Saab yeela a Zedyõ yaa: «Mam na n talla neb kobs-tã wã sẽn leg koomã n kɩt tɩ f tõog Madiyã nebã, n tõog n fãag Israyɛll nebã. La sã n yaa ne neb a taabã sẽn ketã, ned kam fãa lebg n kuil a yiri.»

⁸Bãmb reesa neb nins sẽn tog n kuilã rɩɩbã ne b bardã, la b bas-b tɩ b kuili. A Zedyõ kuilsa Israyɛll nebã fãa, la a peeg neb kobs-tã wã bala. Madiyã nebã tãb-sik rag n bee tẽn-nabdrẽ wã, t'a Zedyõ ne a tãb-biisã be kunkubrã zugu.

⁹Badaar yʋngo, Sẽn-Ka-Saab goma ne a Zedyõ n yeel-a: «Yik n kẽng Madiyã nebã tãb-sik zĩigẽ, bala, mam kõta foom pãng tɩ f tõog-ba.

¹⁰Fo sã n zoet rabeem n ka rat n kẽng f yembre, bɩ f peeg f rakõor a Pura tɩ y kẽng n kolg b tãb-sikã.

¹¹Maag-y y meng n kelg b goamã. Dẽ, f pɛlg na n yɩɩ kãenkãe, tɩ f kẽng n tɩ zab ne-ba.» Dẽ, a Zedyõ ne a rakõor a Pura kẽngame n kolg bɛɛbã tãb-sikã pipi gũudbã sẽn beẽ wã.

¹²Madiyã-rãmba, Amalɛk-rãmb ne yaang nebã fãa yiime n tigim taab tẽn-nabdrẽ wã, n yaa wʋsg wa sʋyã, tɩ b yʋgma wã sõor yaa wʋsg wa ko-kãsengã noor bĩisrã.

¹³A Zedyõ sẽn kolgã, yẽnda wʋma ned a yembr sẽn togsd a tũud-n-taag a zãmsdo, n yetẽ: «Mam zãmsa zãmsdo. Ade, mam yãnda bur sẽn maan ne Oorz[6] zom, t'a bilimd n pɩʋʋgd tõnd tãb-sikã, la a bilmame n tɩ wẽ fu-roogã, la fu-roogã lʋɩɩ tẽnga. La a zũndg-a-la zãng n leeb-a n lubi.»

¹⁴Raoã tũud-n-taagã yeelame: «Yõwã ka bũmb a to, yaa Israyɛll rao a Zoaas biig a Zedyõ zabr sʋʋgã bala. Wẽnnaam dɩka Madiyã nebã ne b tãb-sikã n ning a Zedyõ nugẽ.»

¹⁵A Zedyõ sẽn wʋm zãmsdã ne a bilgrã sẽn yaa bũmb ningã, yẽnda wõgemda tẽnga, la a lebg n waa Israyɛll nebã tãb-sikẽ wã n wa yeele: «Yik-y-yã, yik-y tɩ Sẽn-Ka-Saab rɩka Madiyã nebã ne b tãb-sikã n ning yãmb nugẽ.»

¹⁶A Zedyõ welga neb kobs-tã wã sul a tãabo, n kõ bãmb ned kam fãa baorgo, ne rʋg-vɩʋʋgo, tɩ bug-vɩleng sag-rʋk fãa pʋgẽ.

¹⁷A Zedyõ yeela nebã: «Yãmb tog n geta maam, la mam sẽn na n maan bũmb ningã, bɩ yãmb me maan woto. Mam sã n wa ta tãb-sikã noore, bɩ yãmb me maan wa mam sẽn na n maanã.

¹⁸Maam ne neb nins sẽn be ne maamã sã n wa n peeb d bardã, bɩ yãmb fãa sẽn karg n gũbg tãb-sikã me peeb y bardã, la y yetẽ: Yaa Sẽn-Ka-Saab ne a Zedyõ yĩnga.»

¹⁹A Zedyõ ne neb koabg sull a yembr sẽn tũud yẽnda taa Madiyã nebã tãb-sikã noor yʋn-sʋka. Yaa wakat ning b sẽn tekd gũudbã. Bãmb peeba b bardã n wã rʋgdã b sẽn dag n zãadã.

²⁰A Zedyõ nebã sul a tãabã fãa naaga taab n peeb b bardã, la b wã rʋgdã, la b gãd bug-vɩlemsã ne b gobse, la b zãad bardã ne b rɩtg n na n peebe, la b zẽk b koees n yetẽ: «Zabr sʋʋgã yaa Sẽn-Ka-Saab ne a Zedyõ yĩnga.»

²¹Bãmb ned kam fãa kell n yals a zĩigẽ tɩ b gũbg tãb-sikã. La Madiyã nebã fãa sẽn be tãb-sikẽ wã yikame n zoetẽ. Bãmb dag n kaasdame la b zoet n kẽed moogo.

²²Israyɛll tãb-biis kobs-tã wã peeba b bardã, la Sẽn-Ka-Saab kɩtame tɩ neb nins fãa sẽn be Madiyã nebã tãb-sikẽ wã wẽnemd n kɛ taab ne zabr sʋʋse. Tãb-sikã nebã fãa zoeeme hal n tɩ ta Bɛt-Sita sẽn be Sereya sẽnẽ wã, hal n tãag Abɛll-Mehola sẽn pẽ Tabatã noore.

²³Israyɛll nebã tigma taaba: Neftali buudã, Asɛɛr buudã ne Manaase buudã zãnga, la b riga Madiyã nebã.

²⁴A Zedyõ tʋma neb tɩ b saag Efrayiim soolem nins fãa sẽn be tãmsã sʋkã n moon n yeele: «Yi-y n seg-y Madiyã nebã, zoe-y n tɩ reng-y-b n deeg koomã zĩisi, hal n tɩ tãag Bɛt-Bara ne Zʋrdẽ kʋɩlgã.» Dẽ, Efrayiim nebã fãa tigma taaba, la b reega koomã zĩisi, hal n tãag Bɛt-Bara ne Zʋrdẽ kʋɩlgã.

²⁵Bãmb tõog n yõga Madiyã nebã nanambs a yiibã. Yaa a Orɛɛb ne a Zeebe. Bãmb kʋ a Orɛɛb Orɛɛb kugrã zugu, la b kʋ a Zeebe, Zeeb reezẽ rãam wẽkr koglgã zĩigẽ. La bãmb riga Madiyã nebã, la b tall a Orɛɛb ne a Zeeb zutã n kẽng n tɩ kɩs a Zedyõ Zʋrdẽ kʋɩlgã rʋʋnde.