Read SEBR SÕNGO, 1998 Vẽnegre 1 Bible Online

Vẽnegre 1 - SEBR SÕNGO, 1998 bible

Vẽnegre 1

¹Woto yaa a Zeezi Kiris vẽnegr Wẽnnaam sẽn kõ bãmb tɩ b wilg b nonglem yembsã bũmb nins sẽn tog n zĩnd wakat bilf sã n paase. La a Zeezi Kiris tʋma b malɛɛk t'a wilg b tʋmtʋmd a Zã bõn-kãense.

²Yaa yẽnda n yɩ kaset soaba, n togs nebã Wẽnnaam goamã la a Zeezi Kiris kasetã, n wilg bũmb nins fãa yẽnda sẽn yã wã.

³Bark bee neb nins sẽn karemd pĩnd-n-bãngr gom-kãensã wã zutu, la neb nins sẽn kelgdã, la b sakd bũmb nins sẽn gʋls tɩ be a pʋgẽ wã zutu. Bala wakatã kolgame.

⁴Maam a Zã n tʋmd seb‑kãngã wẽnd-dot a yopoe wã sẽn be Aazi Porvẽnsã pʋgẽ wã. Bɩ soab ning sẽn be, la sẽn dag n be la sẽn watã, n paas sɩɩs a yopoe wã sẽn be bãmb geerã taoorã, la a Zeezi Kiris sẽn yaa kaset soab sẽn yaa tɩrga, la pipi soab Wẽnnaam sẽn vʋʋg n bas kũum la dũniyã rĩm-dãmbã Rĩmã ning yãmb zut barka, la b kõ-y bãane. Soab ning sẽn nonga tõndo, n pek tõnd ne b zɩɩmã

⁶n yiis d yel-wẽnã, n maan tõnd tɩ d lebg soolem maan-kʋʋdb bãmb ba a Wẽnnaam yĩngã, bãmb n tog ne ziiri la pãng zamaan woo zamaane! Ãmina!

⁷Ade bãmb wata ne sawato. Ninsaal fãa na n yãnda bãmba, hal baa ne neb nins sẽn dag n kõs bãmbã. La buudã fãa sẽn be dũni zugã na n wiisa bãmb yĩnga. N-yẽe! Ãmina!

⁸Zu-soab a Wẽnnaam yetame yaa: Maam la Alfa la Omega, soab ning sẽn be moasã, la sẽn dag n be, la sẽn watã, soab ning sẽn Tõeyã fãa wã.

⁹Maam a Zã sẽn yaa yãmb ba-biigã, la sẽn naag yãmb n paamd namsgo, la sẽn naag yãmb n tar pʋɩɩr ne Wẽnnaam soolem, la m naag n maood a Zeezi tũudmã pʋgẽ wã, mam dag n bee Patmoos sẽn yaa tẽng koom sẽn gũbgi, Wẽnnaam goamã la a Zeezi kasetã yĩnga.

¹⁰Zu-soabã daare, Sɩɩg-sõng pida maam, la mam wʋma koe-kãseng sẽn wẽnd baorg koɛɛg m poorẽ.

¹¹A da yetame yaa: Gʋls bũmb nins fo sẽn ne wã sebr zug n tʋm wẽnd-dot a yopoe wã sẽn be Efɛɛse, la Ismirn, la Pɛrgam, la Tɩyatɩɩr, la Sard, la Filadɛlfi ne Laodiise.

¹²Mam wẽnemdame n na n ges ned ning sẽn da gomd-a ne maamã. La mam sẽn wẽnemde, mam yãnda sãnem fɩtl-dogends a yopoe,

¹³la ned sẽn be fɩtl-dogends a yopoe wã sʋka, n wẽnd Ninsaal Bi-ribla. B rag n yera fuug sẽn sig n ta b naoã, la b ra sẽbga b yãoog ne sãnem sẽbdga.

¹⁴B zugã zoobd rag n yaa peels wa pe-kõbdo la wa lamdo. B ninã ra yaa wa bug-witim.

¹⁵B naoã ra yaa wa zũud b sẽn zug boaag pʋgẽ t'a mooge, la b koɛɛgã ra yaa wa ko-kãsemsã bʋrgo.

¹⁶Bãmb da zãada ãds a yopoe ne b rɩtgo. Zabr sʋʋg sẽn tar noy a yiib sẽn dɩt n da yit bãmb noorẽ wã. La bãmb nengã ra yaa wa wĩntoogo, wakat ning a sẽn yãgd ne a pãng tɛkã. Fɩtl dogends a yopoe.

¹⁷Mam sẽn yãnd-bã, mam lʋɩɩ b taoor n yaa wa kũum. Bãmb tika maam ne b nug-rɩtg n yeel yaa: Da maan rabeem ye!

¹⁸Mam yaa dẽenem la yaoolem soaba, soab ning sẽn vɩ. Mam dag n kiime, la ad-ma, mam vɩɩme, zamaan woo zamaane. Mam tara kũum ne kɩɩm-kulg kʋɩlen-biisi.

¹⁹Dẽ wã, gʋls bũmb nins fo sẽn yã, bũmb nins sẽn be moasã, la bũmb nins sẽn na n yaool n maanã.

²⁰Ad ãds a yopoe wã fo sẽn yã mam rɩtgã ne sãnem fɩtl-dogends a yopoe wã yel-solemdã võore: Ãds a yopoe wã yaa wẽnd-dot a yopoe sẽn be tẽms a yopoe wã gũudba, la sãnem fɩtl-dogends a yopoe wã yaa wẽnd-dot a yopoe wã sẽn be tẽms a yopoe wã.