Read SEBR SÕNGO, 1998 Vẽnegre 16 Bible Online

Vẽnegre 16 - SEBR SÕNGO, 1998 bible

Vẽnegre 16

¹Mam wʋma koe-kãseng sẽn yi wẽnd doogẽ wã n yeel malegs a yopoe wã yaa: Kẽng-y n tɩ kiig-y Wẽnnaam sũ-puugrã sẽn be laas a yopoe wã pʋsã dũniyã zugu.

²Pipi soabã kẽngame n tɩ kiig sẽn be yẽnda laagẽ wã dũniyã zugu. La nod-kɛgeng sẽn yaa toaag yõka neb nins sẽn dag n tar rũngã gʋlsem bãnde la b wõgemded bõn-naandgã taoorã.

³Malɛɛk a yiibẽ soabã kiiga sẽn be yẽnda laagẽ wã ko-kãsengã pʋgẽ, la a lebga zɩɩm wa kũum zɩɩm. La bõn-vɩɩs nins fãa sẽn dag n be ko-kãsengã pʋgã kiime.

⁴Malɛɛk a tãabẽ soabã kiiga sẽn be yẽnda laagẽ wã kʋɩlsã ne ko-bundsã pʋse, la b lebga zɩɩm.

⁵La mam wʋma koomã malɛɛkã sẽn yeel yaa: yãmba, soab ning sẽn dag n be, la sẽn be moasã, n welg toorã, yãmb sẽn kao bʋʋdã a woto wã zemsame.

⁶Bala, bãmb daaga neb nins sẽn welg toorã la yãmb no-rɛɛsdbã zɩɩm, la yãmb kõ-b-la zɩɩm tɩ b yũ. Rẽ segda ne bãmba.

⁷La mam wʋma koɛɛg sẽn yi tẽn-kugrẽ wã n yeel yaa: Hakɩɩka, Zu-soab a Wẽnnaam Sẽn‑Tõe‑Fãa, yãmb bʋʋda kaoob yaa sɩda, la tɩrga.

⁸Malɛɛk a naasẽ soabã kiiga sẽn be yẽnda laagẽ wã wĩntoogã zugu. La b kõo wĩntoogã pãng t'a yõog ninsaalbã ne bugum,

⁹la tʋʋl-kãseng yõoga nebã. Bãmb paooga Wẽnnaam ning sẽn tar-a noor ne to-kãensã yʋʋre, la b ka tek yam n kos sugr n na n kõ Wẽnnaam waoogr ye.

¹⁰Malɛɛk a nu soabã kiiga sẽn be yẽnda laagẽ wã rũngã geerã zugu. La yẽnda soolmã lebga lik bida. Toogã kɩtame tɩ ninsaalbã rũmd b zɛlma.

¹¹La toodã ne noadã sẽn tar bãmbã yĩnga, b paooga saasẽ Wẽnnaamã, la b ka tek yam n kos sugr b tʋʋm wẽnsã yĩng ye. Sũ-puugr laaga.

¹²Malɛɛk a yoob-n-soabã kiiga sẽn be yẽnda laagẽ wã kʋɩl-kãseng ning sẽn boond tɩ Efartã zugu. La kʋɩlgã koom kʋɩɩme tɩ lebg sor rĩm-dãmb nins sẽn yit yaangã yĩnga.

¹³Mam yãnda sɩ-rẽgd a tãab sẽn wẽnd wa loms sẽn yit dargõ wã noorẽ la rũngã noorẽ la belgr no-rɛɛsã noorẽ.

¹⁴Bãmb yaa sɩɩse, zĩn-dãmb sẽn maand bõn-yɛɛsdse, la sẽn kẽngd dũni gill fãa rĩm-dãmbã nengẽ n na n tɩ tigs-b Wẽnnaam sẽn tõe fãa ra-kãsenga sẽn yaa zabr daarã yĩnga.

¹⁵Ad mam wata wa wagdre. Bark bee ned ning sẽn ka gõe la sẽn yer a futu, sẽn na yɩl la a ra kẽn beelle, la tɩ nebã kõn yã‑a yãndã zugu.

¹⁶B tigma nanambsã zĩig a yembr sẽn boond ne Ebre goam tɩ Harmagedõ.

¹⁷Malɛɛk a yopoe soabã kiiga sẽn be yẽnda laagẽ wã pemsmã pʋga. La koe-kãseng yii geerẽ wã, wẽnd doogẽ wã n yeel yaa: Maaname n sɛ!

¹⁸La sa-yãgb ne koeese, la sa-kelems ne tẽn-digimdg sẽn ya kãseng zĩndame, la hal ninsaalb sẽn be dũni zug tɛka, tẽn-digimdg sẽn yaa kãseng a woto nan ka tol n zĩnd ye.

¹⁹Tẽn-kãsengã welga zĩis a tãabo. Soolem toay-toayã tẽms lʋɩɩme, la Wẽnnaam tẽega Babilond kãsengã yelle, n na n kɩt t'a yũ bãmb sũ-puug-kãsengã reezẽ rãamã sẽn be laagẽ wã.

²⁰Koomã sẽn gũbg tẽms ninsã fãa zoeeme, la ned ka leb n yã tãmsã ye.

²¹La sapɩlem zɩslem sẽn kolg kɩlo pis-naas yii yĩngr n dʋʋg ninsaalbã zutu. La sapɩlmã toog yĩnga, nebã paooga Wẽnnaam. Bala to-kãng talla pãng tɩ looge.