Read SEBR SÕNGO, 1998 Vẽnegre 17 Bible Online

Vẽnegre 17 - SEBR SÕNGO, 1998 bible

Vẽnegre 17

¹Dẽ poore, malegs a yopoe wã sẽn da zãad laas a yopoe wã, b ned a yembr waa n goma ne maam n yeele: Wa tɩ m na n wilga foom pʋg-yood‑kãsengã sẽn zĩ ko-kãsemsã zutã bʋʋdo.

²Yaa ne yẽnda la dũniyã rĩm-dãmbã maan yoobo, la dũni nebã ra yũu yẽnda yoobã reezẽ rãam tɩ b nens yilim.

³Malɛɛkã rɩka maam m tagsgã pʋgẽ n kẽng weoogẽ. La mam yãnda pag sẽn zao rũng sẽn yaa miuug masɩ, n pid ne yʋy sẽn paoogd Wẽnnaam, la a tara zut a yopoe ne yɩɩl piiga.

⁴Pagã ra yera fuug sẽn yaa miu-kẽega, la miuug mas n nags a meng ne sãnem la kug‑neeba, la pɛrl‑dãmba. Pagã rag n zãada sãnem laag a nugẽ, la laagã rag n pida ne tʋʋm-wẽnse, la ne pagã yoobã rẽgdo.

⁵Yʋʋr n da gʋls pagã rĩirẽ, yaa yel-solemde: Babilond kãsengã, dũni pʋg-yoaadbã ne tʋʋm-wẽns ma.

⁶Mam yãame tɩ neb nins sẽn welg toorã, ne a Zeezi kaset dãmbã zɩɩm yilimd pagã nenga. Mam sẽn yãnd-a wã, linga maam wʋsgo.

⁷La malɛɛkã soka maam yaa: Bõe yĩng tɩ yaa lingr ne foom? Mam na n togsa foom pagã ne rũng ning sẽn zɩt yẽnda, n tar zut a yopoe ne yɩɩl piigã yel-solemdã.

⁸Rũng ning fo sẽn yã wã rag n beeme, la a ka leb n beẽ ye. A na n yii bog-zulungẽ wã n kẽng sãoong zĩigẽ. La dũni neb nins yʋy sẽn ka gʋls vɩɩm sebrã pʋgẽ hal dũni naaneg wẽndẽ wã sã n yãnd rũngã, a na n yɩɩ lingr ne bãmba, rũngã sẽn dag n be, n wa ka leb n beẽ la a na n leb n pukã yĩnga.

⁹Bãngr sẽn yɩt ne yam n tog n zĩnd ka: Zut a yopoe wã yaa tãms a yopoe nins pagã sẽn zao b zutã.

¹⁰Leb n yaa rĩm-dãmb a yopoe. Bãmb b nu n lʋɩ t'a yembr beẽ, t'a to wã nan ka wa nand ye, la a sã n wa wa, a tog n dɩɩ naam wakat bilfu.

¹¹Rũng ning sẽn dag n be, n ka leb n be wã meng yaa rĩm a nii soaba. Yẽnda me yaa rĩm-dãmb a yopoe wã ned a yembre. La a rabda sãoong zĩigẽ.

¹²Yɩɩl piigã fo sẽn yã wã yaa rĩm-dãmb piig sẽn nan ka reeg soolem ye, la b reegda pãn-tõog wa rĩm-dãmbã lɛɛr a yembr yĩng ne rũngã.

¹³Bãmb yam yaa a yembre, la b kõta rũngã b pãngã ne b pãn-tõogã.

¹⁴Bãmb na n zaba ne pe-bilã. La pe-bilã na n tõog-b lame, tɩ bõe bãmb yaa zu-soben-dãmb Zu-soabã la rĩm-dãmbã Dĩmã. La neb nins b sẽn boolã, neb nins b sẽn tũusã, ne neb nins sẽn maand sɩdã, n be ne pe-bilã na n tõog-b lame me.

¹⁵Malɛɛkã yeela maam yaa: «Koom nins fo sẽn yãnd tɩ pʋg-yoodrã zĩ b zutã, yaa nebã, la neb kʋʋndo, ne soolem‑dãmba, la goam buud toay-toayã nebã.

¹⁶Yɩɩl piigã fo sẽn yãndã, n paas rũngã na n kisga pʋg-yoodrã, n dees a futã n bas-a a zaala, la b wãb a nemdã, la b ning-a bugum t'a rɩ tẽma.

¹⁷Bala, Wẽnnaam ninga bãmb sũyã pʋs tɩ b maan Wẽnnaam daabo, la b naag taab yam a yembre, n dɩk b naamã n kõ rũngã hal tɩ Wẽnnaam goamã wa paam pidsgu.

¹⁸La pagã fo sẽn yã wã yaa tẽn-kãseng ning sẽn so-a dũniyã rĩm-dãmbã.»