Read SEBR SÕNGO, 1998 Vẽnegre 18 Bible Online

Vẽnegre 18 - SEBR SÕNGO, 1998 bible

Vẽnegre 18

¹Rẽ zugẽ, mam yãnda malɛɛk a to sẽn tar pãn-kãseng sẽn yi arzãn n sigda, n tar noor sõama la a zĩirã kõo dũniyã vẽenem.

²Malɛɛkã zẽka a koɛɛg ne pãng n yeele: A lʋɩɩme! A lʋɩɩme! Babilond kãsengã lʋɩɩme! Yẽnda lebga zĩn-dãmb yiri, la zĩ-dẽgd fãa, la bõn-yɩgd‑rẽgd fãa, la rũm‑dẽgd buud fãa nebã sẽn kis zĩiga.

³Soolem dãmba fãa sẽn yũ Wẽnnaam sũ-puugr wa reezẽ rãam yẽnda yoobã yĩnga, tɩ dũni rĩm-dãmb maan yoob ne yẽnda, la tɩ dũni lɛɛbdb tũnug yẽnda nag-teedã pãng n lebg arzegs rãmba.

⁴La mam wʋma koɛɛg a to sẽn yi arzãn n yeele: Mam nebã, yi-y tẽngã pʋga, tɩ y ra wa n naag n maan yel-wẽn ning a sẽn maandã, la tɩ y ra wa n naag yẽnda n paam tood nins sẽn na n paam-a wã ye.

⁵Bala, yẽnda yel-wẽnã zamame hal n tãag arzãna, la Wẽnnaam tẽega a ka-tɩrlem tʋʋmã yelle.

⁶Yao-y yẽnda wa yẽnda sẽn yao wã, la y lebs-a a tʋʋmã naoor a yiibu! Wamd ning pʋgẽ a sẽn kiigã, kiig-y-yã a woto naoor a yiib n kõ-a.

⁷Yẽnda sẽn waoog a meng n kẽ nagma pʋgẽ n ta zĩig ningã, kɩt-y t'a toogã ne a sũ-sãangã ta a boto. Bala, a yeta a sũurẽ yaa: Mam zĩi wa rĩm-poaka, mam ka pʋg‑kõore, la mam kõn tol n paam kũum sũ-sãang ye.

⁸Rẽnda yĩngã, yẽnda toodã na n waa daar a yembr pʋgẽ. Bãag sẽn na n kʋ-a, sũ-sãanga, kom, la bugum na n dɩ-a lame. Bala, Zu-soab a Wẽnnaam, sẽn kaood-a yẽnda bʋʋdã yaa pãn-kẽeng soaba.

⁹Dũniyã rĩm-dãmb nins fãa sẽn maan yoob ne tẽn-kãngã, la b paam te-neeb ne yẽnda wã sã n wa yã tẽngã sẽn dɩt bugmã bug-zõose, b na n yãbame n wiis a yĩnga.

¹⁰Bãmb sẽn zoet rabeem tɩ yẽnda toogã na n wa paam bãmbã yĩnga, b na n yalsa yɩɩg n yeel yaa: Kayto! Kayto! Tẽn-kãsengã, Babilond tẽng sẽn tar pãnga! Fo sɩbgr waa wakat a yembr pʋgẽ bala.

¹¹La dũni fãa toandb yãbdame n wiisd yẽnda yĩnga, ned baa a yembr sẽn ka leb n daad bãmb koosmã yĩnga:

¹²Yaa sãnem, la wanzuri, la kug sẽn be yõod wʋsgo, la pɛrl‑dãmba, la lamd gĩs-bãaneg peen-sõamyã, la peen-miu-kẽese, la peen‑fʋlfʋle, la pɛɛl sẽn yaa miuug masɩ, la raoog buud fãa sẽn tar yũ-noogo, la teoog buud fãa sẽn maan ne wob-yẽna, la teed buud fãa sẽn maan ne raad sẽn be yõod wʋsgo, la sẽn maan ne zũudu, la kutu, la kug sẽn boond tɩ marbre,

¹³kanell[7] la ra-pegd buud sẽn tar yũ-noogo, la zẽ-biis sẽn kõt yũ-noogo, la tɩdare, la vãad buud b sẽn boond tɩ miiri, la wisdu, la reezẽ rãam, la kaam, la zom-bãanega, la koodo, la niig ne piisi, la wed-moose, la terok-rãmba, hal baa ninsaalba.

¹⁴Fo sẽn da rat bũmb ning ne f sũur fãa wã loog n basa foom. Bõn-sõamy wã fãa, wall bõn-neebã menemame n bas foom, la ned kõn leb n yãnd-b abada.

¹⁵Toandb nins sẽn tũnug Babilond n lebg arzegs rãmbã sẽn zoet rabeem ne toog ning sẽn na n paam tẽn-kãngã yĩngã, b na n yalsa yɩɩga, n yãbe, n maan sũ-sãanga.

¹⁶Bãmb na n yeelame yaa: Kayto! Kayto! Tẽn-kãsengã sẽn dag n yer peen‑neer fut la fu-miu-kẽesã, la fut sẽn yaa miid mas n nags a meng ne sãnem ne kug-neeb la pɛrl dãmbã!

¹⁷Wakat a yembr pʋgẽ bala, arzegs wʋsg a woto sãamame. Koom kogond zu-soben-dãmbã fãa ne neb nins fãa sẽn be koom kogendã pʋsã, la koom kogendã pʋg tʋmtʋmdbã ne neb nins fãa sẽn tolemd ne koom kogendã dag n yasa yɩɩga,

¹⁸la b sẽn yã bugmã sẽn dɩt tẽngã bug-zõosã, b kelmame n yeele: Tẽn-bʋg n dag n wẽnd tẽn-kãsengã?

¹⁹Bãmb da yugda b zut tom, n yãbda n maand sũ-sãang wa ned n ki, la b kelemdẽ n yetẽ: Kayto! Kayto! Tẽn-kãseng ning sẽn dag n tar paoong wʋsg tɩ neb nins fãa sẽn tar koom kogond ko-kãsengã zugã tũnug be n lebg arzegs rãmbã, wakat a yembr pʋgẽ bala, a lebga rasempʋɩɩga.

²⁰Arzãna, maan sũ-noog ne bũmb ning sẽn paam-a wã. Yãmb me sẽn welg toor Wẽnnaam yĩnga, la tẽn-tʋmdbã ne Wẽnnaam no-rɛɛsdbã, maan-y sũ-noogo. Bala Wẽnnaam sẽn kao tẽngã bʋʋdã, b roka yãmb sũuri.

²¹Dẽ, malɛɛk sẽn tar pãng tebga kugr sẽn wẽnd neer sẽn yaa bedr n lob-a ko-kãsengã pʋgẽ n yeele: B na n tusa Babilond sẽn yaa tẽn-kãsengã a woto ne pãng n lubi, la ned kõn leb n yãnd-a yɛs ye.

²²La ned kõn leb n wʋm pend-wẽedbã, la yʋʋmbã, la wɩɩs ne bar-pɛɛbdbã rãamd fo pʋgẽ ye. Ned kõn leb n yãnd nug-tʋʋmd buud baa a yembr soab beenẽ ye, la ned kõn leb n wʋm neer rãamd beenẽ ye.

²³Fɩtl vẽenem kõn leb n yãg be ye, la ned kõn leb n wʋm pʋg-paal sɩd ne a pʋg-paalã koees beenẽ yɛs ye. Bala, fo toandbã dag n yaa dũni nin-kãsemse, fo belga soolem dãmbã fãa ne f bagrã.

²⁴La b yãnda Wẽnnaam no-rɛɛsdbã ne nin-sõamyã, la neb nins fãa b sẽn kood dũniyã zugã zɩɩm fo pʋgẽ.