Read SEBR SÕNGO, 1998 Vẽnegre 19 Bible Online

Vẽnegre 19 - SEBR SÕNGO, 1998 bible

Vẽnegre 19

¹Rẽ poore, mam wʋma koe-kãseng arzãn pʋgẽ sẽn wẽnd neb kʋʋng wʋsg koees sẽn yet yaa: Haleluya! Fãagre, la ziiri, ne pãng yaa tõnd Wẽnnaamã n so,

²bãmb bʋ-kaoorã sẽn yaa sɩd la tɩrgã yĩnga. Wẽnnaam kaoo pʋg-yood‑kãsengã sẽn dag n sãamd dũni ne a yoobã bʋʋdo. La Wẽnnaam doka b tʋmtʋmdbã sũuri, yẽnda sẽn daag bãmb zɩɩmã yĩnga.

³La b leb n yeela naoor a yiib soab yaa: Haleluya! La yẽnda bug-zõos zẽkda zamaan woo zamaane.

⁴Kãsem-dãmbã pisi la a naasã ne bõn-vɩɩs a naasã wõgemdame n waoog Wẽnnaam sẽn zao geerã zugã n yeel tɩ ãmina! Haleluya!

⁵Koɛɛg yii geerẽ wã n yeel yaa: Yãmb fãa sẽn yaa Wẽnnaam tʋmtʋmdbã, yãmb dãmb sẽn zoet bãmbã, nin-tals la nin-kãsemse, pẽg-y tõnd Wẽnnaamã.

⁶La mam wʋma koɛɛg sẽn wẽnd wa neb kʋʋng wʋsg koeese, n wẽnd wa ko-kãsems koeese, n wẽnd wa sa-kelems kãsems koees sẽn yet yaa: Haleluya! Bala tõnd Zu-soab a Wẽnnaam Sẽn‑Tõe‑Fãa wã zĩndga b naam.

⁷D maan sũ-noog n kɩdme, la d waoog bãmba. Bala pe-bilã pʋg-peegrã daar taame, la bãmb pʋg-paalã segla a meng n sɛ.

⁸B kõo pʋg-paalã peen‑neer fuug sẽn pɩnd n ka tar rẽgd t'a yeelge. peen-neer fuugã yaa nin-sõamyã wã tʋʋm sõamyã.

⁹Malɛɛkã yeela maam yaa: Gʋlse: Bark bee neb nins b sẽn bool tɩ b wa pe-bilã pʋg-peegr tigrã zutu! La a yeela maam yaa: Koe-kãngã yaa Wẽnnaam meng goamã.

¹⁰La mam wõgemda yẽnda taoor n na n waoog-a, la a yeela maam yaa: Da saag n maan a woto ye! Mam yaa fo tʋmd-n-taaga, la fo ba-biis nins sẽn tar a Zeezi kasetã tʋmd-n-taaga. Waoog Wẽnnaam! Wẽnnaam no-rɛɛsdbã goam yita a Zeezi kasetã pʋga.

¹¹Dẽ poore, mam yãnda arzãn sẽn pake, la mam yãnda wed-moaag sẽn yaa pɛɛlga. Ned ning sẽn zao-a weefã yʋʋr la a Sɩd-maanda, la a Sɩd-sɩda. Bãmb bʋʋda bʋʋdã ne tɩrlem, la b zabd ne tɩrlem.

¹²Bãmb ninã yaa wa bug-witim. Maanf-rãmb wʋsg n fõg bãmb zugã. Bãmb tara yʋʋr sẽn gʋls tɩ ned baa a yembr ka mi, sã n ka bãmb mengã bala,

¹³la b yera fu-taok sẽn los zɩɩmẽ. Bãmb yʋʋr la a Wẽnd-gomde.

¹⁴Sodaasã sẽn be arzãnã dag n zaoo wed-peels n pʋgd bãmba, n yer peen‑neer fut sẽn yaa peels la yɩlma.

¹⁵Zabr sʋʋg sẽn dɩt n dag n yit b noorẽ wã n na n sɩbg soolem dãmbã. Bãmb na n zãa kut dasaar n dɩlg-ba. Bãmb na n taba bũmb nins sẽn be Wẽnnaam Sẽn‑Tõe‑Fãa wã sũ-puugr sẽn yaa kãsengã reezẽ rãam wẽkr koglgã pʋgẽ wã.

¹⁶Bãmb tara yʋʋr sẽn gʋls b fuugã zug la b geerã zugu: rĩm-dãmb Rĩma, la zu-soben-dãmb Zu-soaba.

¹⁷Mam yãnda malɛɛk sẽn yas wĩntoogã pʋgẽ. Yẽnda zẽka a koɛɛg ne pãng n yeel bõn-yɩgdɩ wã fãa sẽn yɩgd yĩngrã yaa: wa-y n tigm-y taab Wẽnnaam tig‑kãsengã yĩnga,

¹⁸tɩ y tõe n dɩ rĩm-dãmb nemdo, sodaas nanambs nemdo, pãens rãmbã nemdo, wed-moos ne b rʋʋdbã nemdo, neb fãa nemdo, burkĩmb la yembse, nin-tals ne nin-kãsemse.

¹⁹Mam yãnda rũngã ne dũni rĩm-dãmbã ne b sodaasã sẽn tigim taab n na n zab ne soab ning sẽn zao-a wed-pɛɛlgã, la ne a sodaasã.

²⁰La b yõka rũngã ne zãmb no-rɛɛs ning sẽn dag n maan bõn-yɛɛsds rũngã taoor n belg neb nins sẽn deeg rũngã bãndã la b wõgemded yẽnda bõn-naandgã taoorã. B loba bãmb b yiibã fãa vɩɩs bugum mogr pʋgẽ zĩig ning kidbr sẽn dɩtã.

²¹La sʋʋg ning sẽn dag n yit soab ning sẽn zao wed-moaagã zugã noorẽ wã kʋʋ neb a taabã. La bõn-yɩgdɩ wã fãa rɩɩ bãmb nemdã n tɩge.