Read SEBR SÕNGO, 1998 Vẽnegre 2 Bible Online

Vẽnegre 2 - SEBR SÕNGO, 1998 bible

Vẽnegre 2

¹Gʋls Efɛɛs wẽnd doogã gũud n yeel-a yaa: Ad bũmb ning a soab sẽn zãad ãds a yopoe ne a rɩtgo, la a kẽnd sãnem fɩtl-dogends a yopoe wã sʋkã sẽn yeta:

²«Mam mii tʋʋm nins y sẽn maanã, la y sẽn tʋmd to-to, la m mii y modgrã. Mam miime tɩ yãmb ka tõe n sak tɩ nin-wẽns zĩnd ne-y ye. Yãmb maka neb nins sẽn yet tɩ b yaa tẽn-tʋmdb n yaool n ka tẽn-tʋmdbã n gese, la yãmb mikame tɩ b yaa zĩrẽ yagdba.

³Yãmb nangda pãnga, yãmb namsa mam yʋʋrã yĩnga, la yãmb ka boog y raood ye.

⁴La yell ning mam sẽn tar ne yãmba, yaa tɩ yãmb basa y pipi nonglmã.

⁵Dẽ wã, bɩ y tẽeg zĩig ning yãmb sẽn lʋɩ wã. Tek-y yam n kos sugri, la y leb n tʋm y pipi tʋʋmã. Sã n ka rẽ, mam na n waa yãmb nengẽ, la m na n yiisa yãmb fɩtl-doagendgã a zĩigẽ, sã n ka tɩ yãmb teka yam n kos sugri.

⁶Baoosgo yãmb tara bõn-sõng a yembre: yaa tɩ yãmb kisa Nikolayit-dãmba[1] tʋʋmã, tʋʋm nins mam me sẽn kisã.»

⁷Bɩ ned ning sẽn tar-a tʋb kelg bũmb ning Sɩɩg-sõng sẽn yet wẽnd-dotã: Mam na n kõo tõaagd fãa noor t'a rɩ vɩɩm tɩɩgã sẽn be Wẽnnaam Paraadi pʋgẽ wã biisi.

⁸Gʋls Ismirn wẽnd doogã gũud n yeel-a yaa: Sẽn yaa-a dẽenem la yaoolem soabã, sẽn dag n ki-a n leb n vʋʋgã yetame yaa:

⁹«Mam bãnga yãmb yel-pakrã ne y naongã, la yãmb yaool n yaa arzegs rãmba, la mam bãnga kãnegr ning neb nins sẽn yet tɩ b yaa Zʋɩf-rãmb n yaool n ka Zʋɩf-rãmba, la b ya Sʋtãanã karen-doogã rãmb sẽn kãnegd yãmbã.

¹⁰Da maan-y rabeem ne namsg ning y sẽn na n namsã ye. Gese, Sʋtãanã na n kẽesa yãmb neb kẽer bi-bees roogo, sẽn na n yɩl n mak yãmba, la yãmb na n paama namsg rasem piiga. Kell‑y n maan-y neer hal tɩ ta kũum, la mam na kõ yãmb vɩɩm maanfo.»

¹¹Bɩ ned ning sẽn tar tʋb kelg bũmb nins Sɩɩg-sõng sẽn yet wẽnd-dotã. Kũum a yiib soabã ka na n sɩɩs ned ning sẽn na n paam-a tõogrã ye.

¹²Gʋls Pɛrgam wẽnd doogã gũud n yeel-a yaa: Soab ning sẽn zãad-a zabr sʋʋg sẽn tar noy a yiib sẽn dɩtã yetame yaa:

¹³«Mam mii yãmb sẽn be zĩig ningã: zĩ-kãng yaa a Sʋtãan geere. Yãmb talla mam yʋʋrã, la yãmb ka bas y tẽeb ne maam baa wakat ning b sẽn kʋ mam kaset tɩrg soab a Ãntipaas yãmb sʋka, zĩig ning a Sʋtãan sẽn be wã.

¹⁴La mam tara yell bilf ne yãmba. Yaa tɩ neb n be yãmb sʋkã n tũud a Balaam zãmsgã. Yẽnda ra zãmsa a Balak t'a maan bẽdg n kɩt t'a Israyɛll yagensã rɩ wẽnd-naands maand nemdo, la b maan yoobo, tɩ rẽ lub-ba.

¹⁵Yãmb me tara neb kẽer me sẽn sakd Nikolayit-dãmbã[2] zãmsgo.

¹⁶Dẽ wã, bɩ y tek yam n kos sugri, sã n ka rẽ, bilf sã n paase, mam na n waa yãmb nengẽ, la m na n zaba ne bãmb ne m noorẽ zabr sʋʋgã.»

¹⁷Bɩ sẽn tar-a tʋb kelg bũmb nins Sɩɩg-sõng sẽn yet wẽnd-dotã. Mam na n kõo ned ning sẽn na n tõogã man sẽn solge, la kug-pɛɛlga. Kugrã zugu, yʋ-paalg n gʋls be ned baa a yembr sẽn ka mi, sã n ka ned ning sẽn deegd-a kugrã.

¹⁸Gʋls Tɩyatɩɩr wẽnd doogã gũud n yeel-a yaa: Ad Wẽnnaam Bi-riblã, sẽn tar-a nin sẽn wẽnd bug-witim t'a nao wẽnd wa zũudã sẽn yeta:

¹⁹«Mam bãnga yãmb tʋʋmã, la y nonglmã, ne y tẽebã, la y tʋʋm‑sõamyã, ne y sũ-marã, la y yaoolem tʋʋmã sẽn yaa wʋsg n yɩɩd y pipi tʋʋmã.

²⁰La mam tara yell ne yãmba: yaa tɩ yãmb basa pag a Zezabɛll t'a zãmsd nebã. A yetame t'a yaa no-rɛɛsa, n zãmsd nebã la a belgd mam tʋmtʋmdbã tɩ b maand yoobo, la b wãbd wẽnd-naands maand nemdo.

²¹Mam kõo yẽnda weer t'a tek yam n kos sugr a yoobã yĩnga, la yẽnda ka rat n kos sugr ye.

²²Gese, mam na n gãneg-a-la tẽnga, la to-kãseng pʋga, yẽ ne neb nins sẽn maand yoob ne yẽnda wã, sã n ka tɩ b teka yam n bas b tʋʋmã.

²³Mam na n kɩtame tɩ kũum kʋ a kambã, la wẽnd-dotã fãa na n bãngame tɩ mam yaa soab ning sẽn feesd tagsd la sũyã, la mam na n yaoo yãmb ned kam fãa wa sẽn zems a tʋʋmã.

²⁴La yãmb Tɩyatɩɩr neb a taabã fãa sẽn ka sakd zãms-kãngã, la sẽn ka bãng a Sʋtãan yel-solgdsã wa b sẽn mi n yetã, mam yeta yãmb tɩ m ka na n zɩlg yãmb zɩɩb a to ye.

²⁵Bũmb ning sẽn be bala, yaa tɩ y tall bũmb nins yãmb sẽn tarã kãenkãe hal tɩ mam wa.

²⁶Ned ning sẽn na n tõoge, la ned ning sẽn na n tall-a mam tʋʋmã hal tɩ wakat ta, mam na n kõo yẽnda noor t'a soog soolem dãmba.

²⁷Yẽnda na n zãa naam dasaar sẽn yaa kut n soog-ba, wa b sẽn wãad tãnd lagdo, wa mam meng sẽn deeg m ba nengẽ wã.

²⁸La mam na n kõo yẽnda yibeoog ãdga.

²⁹Bɩ sẽn tar-a tʋb kelg bũmb nins Sɩɩg-sõng sẽn togsd mam wẽnd-dotã.»